కేసీఆర్ సభకూ ప్రకృతీ సహకరించలేదు

హుజూర్ నగర్ ఉప ఎన్నికల నేపథ్యంలో అక్కడ గురువారం జరగాల్సిన టీఆర్ఎస్ అధినేత కేసీఆర్ బహిరంగ సభ రద్దైంది. భారీ వర్షం రావడంతో మైదానం మొత్తం నీళ్లు నిలిచిపోయి చిత్తడిగా మారడంతో సభను రద్దు చేయాలని నిర్ణయం తీసుకున్నారు. సీఎం కేసీఆర్ హైదరాబాద్ నుంచి హుజూర్ నగర్ కు హెలికాప్టర్ లో వెళ్లాలని నిర్ణయించుకున్నారు. అయితే, వర్షం కారణంగా సీఎం హెలికాప్టర్ ప్రయాణానికి పౌర విమానయాన శాఖ అనుమతి ఇవ్వలేదు.

దీంతో ఆయన వెళ్లే పరిస్థితి లేకపోవడం.. మరోవైపు భారీ వర్షం రావడంతో సభను రద్దు చేశారు. ఈ విషయాన్ని టీఆర్ఎస్ ఎమ్మెల్సీ పల్లా రాజేశ్వర్ రెడ్డి వేదికపై నుంచి ప్రకటించారు. అయితే, సభ జరిగినా.. జరగకున్నా విజయం మాత్రం తమదేనని ధీమా వ్యక్తంచేశారు. ప్రచారంలో భాగంగా నియోజకవర్గంలోని ఏడు మండలాల్లో టీఆర్ఎస్ వర్కింగ్ ప్రెసిడెంట్ రోడ్డు షోలు నిర్వహించాలని తొలుత భావించారు. అనంతరం రోడ్డు షోల బదులు సీఎం కేసీఆర్ సభ పెట్టాలని నిర్ణయించి, ఆ మేరకు ఏర్పాట్లు చేశారు. 44

అయితే, సరిగ్గా సభ జరగాల్సిన సమయానికి కొద్ది సేపటి ముందు నుంచీ భారీ వర్షం కురవడంతో సభను రద్దు చేయక తప్పలేదు. కాగా, టీపీసీసీ చీఫ్ ఉత్తమ్ కుమార్ రెడ్డి ఎంపీగా ఎన్నిక కావడంతో హుజూర్ నగర్ అసెంబ్లీ నియోజకవర్గంలో ఉప ఎన్నికల అనివార్యమైంది. కాంగ్రెస్ కంచుకోటగా ఉన్న ఈ స్థానంలో ఎలాగైనా గులాబీ జెండా ఎగురవేయాలని టీఆర్ఎస్ పట్టుదలతో ఉంది.

అయితే, ఆర్టీసీ కార్మికుల సమ్మె విషయంలో సర్కారు అనుసరించిన వైఖరితో పలు వర్గాల్లో అధికార పార్టీపై వ్యతిరేకత ప్రబలినట్టు తెలుస్తోంది. ఇది ఉఫ ఎన్నికల ఫలితంపై ఎలాంటి ప్రభావం చూపిస్తందో అని టీఆర్ఎస్ శ్రేణులు కాస్త ఆందోళన చెందుతున్నాయి. అయితే, విజయంపై ఎలాంటి అనుమానాలు వద్దని, మెజార్టీతో సంబంధం లేకుండా గెలుపు మాత్రం పక్కా అని టీఆర్ఎస్ నేతలు ధీమా వ్యక్తంచేస్తున్నారు.