రఘురామా.. జగన్‌ సర్కార్‌పై ఈ డిమాండ్‌ సబబేనా.!

యువజన శ్రామిక రైతు కాంగ్రెస్‌ పార్టీ లోక్‌సభ సభ్యుడు రఘురామకృష్ణరాజు సొంత పార్టీకే కొరకరాని కొయ్యిలా తయారయ్యారు. ‘మా ముఖ్యమంత్రి మీద నాకు చాలా చాలా ప్రేమాభిమానాలు వున్నాయి..’ అంటూనే, వైఎస్‌ జగన్‌ ప్రభుత్వంపై ఎప్పటికప్పుడు సంచలన విమర్శలు చేస్తూనే వున్నారు. ఇటీవల మరణించిన టీడీపీ నేత కిషోర్‌ విషయమై రఘురామ చూపుతున్న అత్యుత్సాహం అంతా ఇంతా కాదు. దీన్ని ప్రభుత్వ హత్యగా ఆయన అభివర్ణిస్తున్నారు.

‘తూర్పుగోదావరి జిల్లాలో దళిత యువకుడిపై పోలీసులు నీఛంగా వ్యవహరిస్తే మా ముఖ్యమంత్రిగారు కఠిన చర్యలు తీసుకున్నారు.. గుంటూరు జిల్లాలో ఓ దళిత యువకుడి మరణానికి కారణమైన పోలీసులపై మా ప్రభుత్వం చర్యలు తీసుకుంది. మరి, కిషోర్‌ విషయంలో అధికారులపై ఎందుకు చర్యలు తీసుకోకూడదు.? కరోనా క్యాపిటల్‌గా వున్న సమయంలో కర్నూలుకి ఆయన్ని తరలించి, కరోనా రోగుల మధ్య వుంచడం పోలీసుల తప్పిదమే. ఈ తప్పిదానికి పాల్పడిన పోలీసులపై కఠినమైన చర్యలు తీసుకోవాల్సిందే.. మా ప్రభుత్వం ఆ చర్యలు తీసుకుంటుందని ఆశిస్తున్నాను’ అంటూ తాజాగా ఓ ఇంటర్వ్యూలో రఘురామకృష్ణంరాజు చెప్పుకొచ్చారు.

సోషల్‌ మీడియాలో ప్రభుత్వానికి వ్యతిరేకంగా పోస్టింగ్స్‌ పెట్టాడన్నది కిషోర్‌పై ఆరోపణ. పోలీసులు అరెస్ట్‌ చేశారు.. కర్నూలుకి తరలించి మెజిస్ట్రేట్‌ ముందు హాజరు పరిచారు. ఈ క్రమంలో ఆయనకు కరోనా సోకినట్లు ప్రచారం జరుగుతోంది. ఈ విషయమై అధికారుల్ని సస్పెండ్‌ చేయాలని రఘురామ డిమాండ్‌ చేయడం భావ్యమేనా.? అన్న ప్రశ్న సర్వత్రా ఉత్పన్నమవుతోంది. ఇదిలా వుంటే, మంత్రి అవంతి శ్రీనివాస్‌ తనపై చేసిన ఆరోపణల్ని తిప్పికొట్టారు రఘురామ. ‘నా రాజీనామా గొడవ ఆయనకెందుకు.? ఆయన ఇప్పటికే చాలా పార్టీలు మారారు. ప్రజారాజ్యం, టీడీపీ.. ఇప్పుడు వైసీపీ.. ఆయనకి నన్ను విమర్శించే నైతిక హక్కు లేదు..’ అని రఘురామ ఎద్దేవా చేశారు.

‘మూడు రాజధానులకు నేను వ్యతిరేకం కాదు. కానీ, అమరావతిని ఎగ్జిక్యూటివ్‌ క్యాపిటల్‌గా చెయ్యాలి. మీరంటే ప్రత్యేక విమానాల్లో తిరుగుతారు.. మీకు నచ్చినవారికి ప్రత్యేక విమానాలు సమకూరుస్తారు.. ప్రజలందరికీ ప్రత్యేక విమానాలు వుండవు కదా..’ అంటూ ముఖ్యమంత్రి వైఎస్‌ జగన్‌పైనే సెటైర్లు వేశారు నర్సాపురం ఎంపీ. ‘నాపై అనర్హత వేటు వేయాలన్న మా పార్టీ పెద్దల కోరిక నెరవేరదు. అందుకే, మంత్రులు ఇతర ముఖ్య నేతలు నా మీద అడ్డగోలు విమర్శలు చేస్తున్నారు..’ అంటూ రఘురామకృష్ణ తనదైన స్టయిల్లో విరుచుకుపడ్డారు.