బిగ్‌ స్టోరీ: రఫేల్‌ వచ్చేస్తోంది.. యుద్ధం తప్పదా.?

‘‘రఫేల్‌ యుద్ధ విమానాలు వుంటే.. పాకిస్తాన్‌కి అసలు సిసలు ‘దెబ్బ’ కొట్టి చూపించేవాళ్ళం..’’ అంటూ కొన్నాళ్ళ క్రితం సాక్షాత్తూ ప్రధాని నరేంద్ర మోడీ ఓ కార్యక్రమంలో సంచలన వ్యాఖ్యలు చేశారు. యురీ, పుల్వామా ఘటనల తర్వాత పాకిస్తాన్‌ని ‘దెబ్బ తీయాలనే’ కసి సగటు భారతీయుడిలో మరింత పెరిగిందన్నది నిర్వివాదాంశం. సర్జికల్‌ స్ట్రైక్స్‌ ద్వారా పాకిస్తాన్‌ని దెబ్బకొట్టగలిగినా.. అది ‘చావు దెబ్బ’ అయితే కాదు.

ప్రస్తుతం యుద్ధ ప్రాతిపదికన రఫేల్‌ యుద్ధ విమానాల్ని భారత్‌ తీసుకొస్తోంది. ఫ్రాన్స్‌ నుంచి మొత్తం ఐదు రఫేల్‌ యుద్ధ విమానాలు బయల్దేరగా, వీటిల్లో రెండు శిక్షణ విమానాలు కాగా, మిగతావి పూర్తి యుద్ధతంత్రం కోసం వినియోగించేవి. వీటితోపాటు ఇంకో రఫేల్‌ విమానం ఇప్పటికే ఇండియాకి చేరుకుంది ఫ్రాన్స్‌ నుంచి. గత కొద్ది రోజులుగా భారత్‌ – చైనా మధ్య పరిస్థితులు ఉద్రిక్తంగా మారిపోయాయి. గల్వాన్‌ లోయలో భారత సైనికులపై చైనా సైనికుల మారణ కాండ నేపథ్యంలో చైనాకి భారత్‌ సత్తా చూపించాల్సిందేనని కేంద్రంలోని మోడీ సర్కార్‌ పట్టుదలతో వున్నట్లు కన్పిస్తోంది.

కానీ, చైనాతో భారత్‌ పూర్తిస్థాయి యుద్ధం వస్తే.. యుద్ధ రంగాన నిలబడగలుగుతుందా.? అన్న విషయమై భిన్నాభిప్రాయాలు వున్నాయి. ఇప్పటికే చైనా సరిహద్దుల్లో భారత వాయుసేనకు చెందిన పోరాట విమానాలు, హెలికాప్టర్లను మోహరించడం జరిగింది. ఇవన్నీ శతృదేశానికి మన సత్తా చూపించేందుకే. అయితే, వీటితో ఇప్పటికిప్పుడు యుద్ధం చేసేస్తామని చెప్పడానికి వీల్లేని పరిస్థితి. ముందస్తుగా భారతదేశం ఏ దేశమ్మీదా దాడి చేయదు. ఇది భారత్‌ తనంతట తాను విధించుకున్న స్వీయ నిబంధన.

అయితే, కరోనా వైరస్‌ ప్రపంచాన్ని వణికిస్తున్నప్పటికీ, రికార్డు సమయంలో రఫేల్‌ యుద్ధ విమానాల్ని ఫ్రాన్స్‌ నుంచి రప్పించడమంటే ఈ వ్యవహారాన్ని అంత తేలిగ్గా కొట్టి పారేయడానికి వీల్లేదు. చైనా సంగతి పక్కన పెడితే, దాయాది పాకిస్తాన్‌ మళ్ళీ రెచ్చిపోతోంది. ఈ పరిస్థితుల్లో పాకిస్తాన్‌ని చావు దెబ్బ తీస్తే, చైనా కూడా ఒళ్ళు దగ్గర పెట్టుకుంటుందనీ, తద్వారా యుద్ధం చేయకుండానే చైనాని అదుపులో పెట్టవచ్చనీ విశ్లేషకులు అభిప్రాయపడుతున్నారు.

ఏదిఏమైనా.. యుద్ధమంటే ఆషామాషీ వ్యవహారం కానే కాదు. పైగా, పాకిస్తాన్‌ మీదకు భారత్‌ వెళితే.. చైనా రెచ్చిపోయే అవకాశాలెక్కువ. చైనాతో పంచాయితీ పెట్టుకున్నా, పాక్‌ నుంచీ ముప్పు తప్పదు. సో, ఏకకాలంలో రెండు దేశాలతో భారత్‌ యుద్ధం చేయాల్సి రావొచ్చు. అందుకే.. సరిహద్దులో సర్వసన్నద్ధంగా వుండేందుకే.. ఈ ఏర్పాట్లు.. అన్నది రఫేల్‌ రాకపై రక్షణ రంగ నిపుణుల అభిప్రాయం.