పూనమ్‌ ఫిర్యాదుతో శ్రీరెడ్డికి మూడినట్లేనా.?

గత కొంతకాలంగా హీరోయిన్‌ పూనమ్‌ కౌర్‌పై దుష్ప్రచారం చేసేలా కొన్ని వీడియోలు సోషల్‌ మీడియాలో దర్శనమిస్తున్నాయి. వీడియోలు మాత్రమే కాదు, ఆడియో టేపులూ సోషల్‌ మీడియాలో కలకలం సృష్టించాయి. పూనమ్‌ కౌర్‌ పెద్దగా పేరున్న సినిమాలేమీ చేయలేదు. కానీ ఆమె పేరు మాత్రం మార్మోగిపోతూనే ఉంది. అది కూడా పవన్‌ కళ్యాణ్‌ పేరుతో ముడిపెట్టిన కొన్ని గాసిప్స్‌ కారణంగానే. పవన్‌ కళ్యాణ్‌, పూనమ్‌ కౌర్‌ మధ్య ఏదో ఉందని కొన్ని గాలి వార్తలు ప్రచారంలోకి వచ్చాయి. వాటిని పవన్‌ కళ్యాణ్‌ కానీ, పూనమ్‌ కౌర్‌ కానీ, ఇప్పటి వరకూ సీరియస్‌గా తీసుకోలేదు.

తాజాగా పూనమ్‌ కౌర్‌ పోలీసులనాశ్రయించింది. తనపై దుష్ప్రచారం జరుగుతోందనీ, ఆ దుష్ప్రచారం వల్ల తన వ్యక్తిగత ప్రతిష్టకు భంగం కలుగుతోందనీ, ఫిర్యాదులో పేర్కొంది ఈ నటి. ఇదిలా ఉంటే, పూనమ్‌ కౌర్‌ని పవన్‌ కళ్యాణ్‌ మోసం చేశాడంటూ ఈ అంశానికి అత్యంత జుగుప్సాకరంగా ప్రాధాన్యతనిస్తూ, సోషల్‌ మీడియాలో శ్రీరెడ్డి సంచలన పోస్టింగులు పెడుతూ వస్తోంది. ఈ నేపథ్యంలో అందరి దృష్టీ శ్రీరెడ్డి మీదనే పడింది. పూనమ్‌ కౌర్‌ తన ఫిర్యాదులో శ్రీరెడ్డి పేరును పరోక్షంగా ప్రస్తావించారని ప్రచారం జరుగుతోంది. అదే కనుక నిజమైతే శ్రీరెడ్డి చిక్కుల్లో పడ్డట్లే.

తెలుగు సినీ పరిశ్రమలో అవకాశాల పేరుతో లైంగిక వేధింపులకు పాల్పడుతున్నారంటూ కొందరు సినీ ప్రముఖులపై సంచలన ఆరోపణలు చేస్తూ శ్రీరెడ్డి అర్ధ నగ్న నిరసన తెలపడం, ఆ తర్వాత అనూహ్యంగా ఆమె పవన్‌ కళ్యాణ్‌కి వ్యతిరేకంగా టర్న్‌ తీసుకోవడం, తెలిసిన విషయమే. తెర వెనక పెద్దలు కొందరు ఆమెతో పవన్‌ కళ్యాణ్‌ని తిట్టించారనీ, అప్పట్లో వార్తలు వచ్చాయి. ఓ దశలో ఆమె జుగుప్సాకరమైన తీరును తెలుగు మీడియా సైతం తట్టుకోలేకపోయింది. దాంతో శ్రీరెడ్డికి తెలుగు మీడియాలో ప్రాధాన్యత లేకుండా పోయింది.

చెన్నైకి వెళ్లిపోయి, అక్కడేదో కొంత గందరగోళం చేసి మళ్లీ హైద్రాబాద్‌కి తిరిగొచ్చిన శ్రీరెడ్డి పూనమ్‌ కౌర్‌ పేరును అడ్డం పెట్టుకుని పవన్‌ కళ్యాణ్‌పై జుగుప్సాకరమైన సోషల్‌ యుద్ధం చేస్తూ వచ్చింది. ఈ క్రమంలోనే పూనమ్‌, పవన్‌ కళ్యాణ్‌ మధ్య పుకార్లను పెంచేసింది. రాజకీయంగా పవన్‌ కళ్యాణ్‌ని దెబ్బ కొట్టే క్రమంలో శ్రీరెడ్డి, పూనమ్‌ కౌర్‌ పరువును బజారుకీడ్చేసింది. అయితే ఈ విషయంలో పూనమ్‌ కౌర్‌ చాలా హుందాగా వ్యవహరించింది. జరుగుతున్న దుష్ప్రచారంపై ఇంతవరకూ పెదవి విప్పలేదు. ఇప్పుడు పోలీసుకలు ఫిర్యాదు చేయడం ద్వారా తన విజ్ఞతను చాటుకుంది ఆమె.

పూనమ్‌ కౌర్‌ మాత్రమే కాదు, శ్రీరెడ్డి బాధితుల్లో చాలా మందే ఉన్నారు. వాళ్లంతా ఒకరి తర్వాత ఒకరు పోలీసుల్ని ఆశ్రయించేందుకు సిద్ధమవుతున్నారనీ సమాచారమ్‌. జనసేన పార్టీ తరపున కూడా శ్రీరెడ్డిపై చర్యల కోసం న్యాయపోరాటం చేయబోతున్నట్లు తెలుస్తోంది. సోషల్‌ మీడియాని ఎలా ఉపయోగించకూడదో శ్రీరెడ్డిని చూస్తే అర్ధమవుతుంది. నచ్చని వ్యక్తిని విమర్శించడం తప్పు కాకపోవచ్చు. ఆ విమర్శల తీవ్రతను జుగుప్స స్థాయికి చేర్చేసి ఆ స్థాయిని కూడా దాటించేస్తే పరిస్థితులు తీవ్రంగానే ఉంటాయి.

యూట్యూబ్‌ ఛానెళ్ల పుణ్యమా అని బూతు ప్రచారానికి ఆకాశమే హద్దుగా మారింది. షర్మిలా, లక్ష్మీపార్వతి, పూనమ్‌ కౌర్‌.. ఇలా బాధితులు ఎందరో. దురదృష్టమేంటంటే, బాధపెట్టేవారిలో శ్రీరెడ్డి లాంటి మహిళలు కూడా ఉండడం.