ఏది న్యాయం.? ఏది అన్యాయం.? అసలేది రాజకీయం.?

అనుకూల తీర్పు వస్తే.. న్యాయం గెలిచినట్లు.. ప్రతికూల తీర్పు వస్తే.. అన్యాయమే రాజ్యమేలుతున్నట్లు. ఇదీ కోర్టుల విషయంలో రాజకీయ పార్టీల తీరు. ఆ పార్టీ.. ఈ పార్టీ.. అన్న తేడాల్లేవు. అన్ని రాజకీయ పార్టీలదీ ఇదే తంతు. నిజానికి, ఏదన్నా కోర్టులో తీర్పు వచ్చిందంటే, దాన్ని అప్పీల్ చేసుకునే అవకాశం వుంటుంది.. సవాల్ చేసుకోవడానికి వీలుంటుంది.. అన్ని అవకాశాలున్నప్పుడు.. తీర్పుల మీద అభ్యంతకర వ్యాఖ్యలు ఎందుకు చెయ్యాలి.? ఎవరో ఓడినట్లు.. ఎవరో గెలిచినట్లు.. ఇంకెవరికో షాక్ తగలినట్లు ఎందుకు వ్యవహరించాలి.? రాజకీయ నాయకులకు కోర్టుల, కేసులు కొత్తేమీ కాదు. వచ్చిన తీర్పుల్ని సవాల్ చేయడం రాజకీయ నాయకులు, పార్టీలకు కొత్త కాదు.

సామాన్యుల పరిస్థితి ఇందుకు పూర్తి భిన్నం. పరిషత్ ఎన్నికల విషయంలోకి వస్తే, ఆదరాబాదరాగా నోటిఫికేషన్ ఏప్రిల్ 1వ తేదీన వచ్చింది. అదే రోజు కొత్తగా రాష్ట్ర ఎన్నికల కమిషనర్ అయిన నీలం సాహ్ని, వస్తూనే ఎన్నికల నోటిఫికేషన్ విడుదల చేశారు. దానిపై పెద్ద రాద్ధాంతమే జరిగింది. కోర్టు ఆ నోటిఫికేషన్ మీద స్టే విధించింది.. కానీ, దానిపై ప్రభుత్వం అభ్యంతరం వ్యక్తం చేస్తూ న్యాయస్థానంలోనే సవాల్ చేసి ఊరట పొందింది. దాంతో, పరిషత్ ఎన్నికలు జరిగాయి. ఇప్పుడు ఆ నోటిఫికేషన్ చెల్లదని హైకోర్టు తేల్చి చెప్పింది. అంతే, ‘అన్యాయం’ జరిగిపోయిందంటూ ప్రభుత్వ సలహాదారు, వైసీపీ నేత సజ్జల రామకృష్ణారెడ్డి దీర్ఘాలు తీశారు పాత్రికేయుల సమావేశంలో.

ఇక, వైసీపీ ఎంపీ రఘురామకృష్ణరాజు వ్యవహారంపైనా స్పందిస్తూ, రఘురామపై రాజద్రోహం కేసులకు సంబంధించి సుప్రీంకోర్టు తమ వాదనల్ని ‘గుర్తించింది’ అంటూ సంబరాలు చేసుకున్నంత పని చేశారు సజ్జల. అక్కడలా.. ఇక్కడిలా.! పరిషత్ ఎన్నికల విషయంలో హైకోర్టు సింగిల్ బెంచ్ తీర్పుని ఎటూ ప్రభుత్వం సవాల్ చేస్తుంది. ఇంతలోనే ‘అన్యాయం’ అంటూ దీర్ఘం తీయడమెందుకు.? రఘురామ విషయంలో సుప్రీంకోర్టు తుది తీర్పు వెల్లడించేయలేదు.. ఇంతలోనే సజ్జల సంబరాలు చేసుకోవడమెందుకు.? అందుకే మరి.. ఏది న్యాయం.? ఏది అన్యాయం.? ఏది రాజకీయం.? అన్నది ప్రజలకు అర్థం కాకుండా పోతోందిప్పుడు.