సీఎం జగన్‌ అసహనం.. పవన్‌ కళ్యాణ్‌ హుందాతనం

మామూలుగా అయితే, పవన్‌ కళ్యాణ్‌ ఒకింత ఆవేశపూరితంగానే కన్పిస్తారు. సినీ నటుడిగా, జనసేన అధినేతగా పవన్‌ కళ్యాణ్‌ ఎవర్నీ రెచ్చగొట్టాల్సిన పనిలేదు.. ఆయన్ని ఎవరన్నా ఏమన్నా అంటే చాలు, అభిమానులు తమ పని తాము చేసుకుపోతారు. అలాంటిది, తన మీద స్వయంగా ముఖ్యమంత్రి వ్యక్తిగత విమర్శలు చేశాక, వెంటనే పవన్‌ కళ్యాణ్‌ తన అభిమానుల్ని, జనసైనికుల్నీ ‘సంయమనం పాటించండి’ అని పిలుపునిచ్చారంటే, అది ఆషామాషీ వ్యవహారం కాదు.

‘పవన్‌ కళ్యాణ్‌కి ముగ్గురు భార్యలు..’ అంటూ ఇలా వైఎస్‌ జగన్‌, పవన్‌ మీద విమర్శనాస్త్రాలు సంధించారో లేదో, ఆ వెంటనే.. వైఎస్‌ జగన్‌ వ్యక్తిగత జీవితాన్ని తవ్వడం షురూ చేశారు పవన్‌ అభిమానులు. అంతే కాదు, జగన్‌ తాత ముత్తాతల వ్యవహారాల్నీ వెలికి తీస్తున్నారు. ఆఖరికి వైఎస్‌ జగన్‌ సోదరి షర్మిల వ్యక్తిగత జీవితానికి సంబంధించిన విషయాల్నీ బయటపెడ్తున్నారు.

ఈ నేపథ్యంలోనే, జనసేన పార్టీ నుంచి ఓ ప్రకటన వచ్చింది.. ‘సంయమనం పాటించాలి’ అంటూ. రేపు సాయంత్రం ఈ విషయంపై పవన్‌ కళ్యాణ్‌ మాట్లాడబోతున్నారట. జనసేన పార్టీ ఈ మేరకు స్పష్టతనిచ్చింది.

నిజానికి, తన వ్యక్తిగత జీవితంపై జగన్‌ చేసిన ఆరోపణలకు గతంలోనే పవన్‌ కళ్యాణ్‌ కౌంటర్‌ ఇచ్చారు. ‘నేను మూడు పెళ్ళిళ్ళు చేసుకోవడం వల్ల ఉమ్మడి ఆంధ్రప్రదేశ్‌ విడిపోయిందా.? నేను మూడు పెళ్ళిళ్ళు చూసుకోవడం వల్ల జగన్‌ మోహన్‌రెడ్డి జైలుకు వెళ్ళారా.? ఏం మాట్లాడతారు మీరు.. మేం మాట్లాడలేకనా? మాట్లాడటం మొదలు పెడితే, మీ తలకాయలు ఎక్కడ పెట్టుకుంటారు.?’ అని పవన్‌ ఓ బహిరంగ సభలోనే జగన్‌కి రిటార్ట్‌ ఇచ్చారు.

మరి, ఇప్పుడు ఇంకోసారి పవన్‌ అలాంటి ప్రయత్నం చేస్తారా.? లేదంటే, ‘ఇసుక సమస్యపై జనసేన పోరాటాన్ని పక్కదారి పట్టించేందుకు వైసీపీ ప్రయత్నిస్తోంది’ గనుక, పవన్‌.. ఇంకాస్త సంయమనంతో వ్యవహరిస్తారా.? వేచి చూడాల్సిందే.