జగన్‌ ‘రెడ్డి’కి పవన్‌ ‘నాయుడు’ మరో పవర్‌ పంచ్‌.!

‘నా పేరులో లేనిది నాకు ఆపాదించడం ఆపండి.. జగన్‌ గారిని జగన్‌ అనాలో, జగన్‌ రెడ్డి అనాలో, జగన్‌ మోహన్‌ రెడ్డి అనాలో, ఉత్తి జగన్‌ అనాలో, ఉత్తుత్తి జగన్‌ అనాలో తెలియజేమని చెప్పండి. అలానే పిలుస్తాం. బొత్సగారిని కూడా ఏమని పిలవాలో చెప్పండి..’ ఇదీ జనసేన అధినేత పవన్‌ కళ్యాణ్‌, వైఎస్సార్‌ కాంగ్రెస్‌ పార్టీ అధినేత ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌ రెడ్డిపైకి సంధించిన తాజా సెటైర్‌.

ప్రధాని నరేంద్ర మోడీ దగ్గర్నుంచి, నేషనల్‌ మీడియా వరకూ.. ఆ మాటకొస్తే, వైసీపీ నేతలు, కార్యకర్తలు, ఇతర పార్టీల నేతలూ.. వైఎస్‌ జగన్‌ని రకరకాలుగా పిలుస్తుంటారు. అందులో కొందరు ‘జగన్‌ రెడ్డి’ అని కూడా అంటుంటారు. వైఎస్‌ జగన్‌ పేరులో చివర ‘రెడ్డి’ పెట్టుకుంటున్నప్పుడు, ఆ ‘రెడ్డి’ సామాజిక వర్గంలో మెజార్టీ ఆయన్ని ‘మతం’తో సంబంధం లేకుండా ‘తమవాడు’ అనుకుంటున్నప్పుడు, ‘జగన్‌ రెడ్డి’ అని పవన్‌ పిలిస్తే, ఎందుకు ‘మంట’ పడుతుందో ఎవరికీ అర్థం కావడంలేదు.

ఈ క్రమంలో పవన్‌ కళ్యాణ్‌ని ‘కాపు’ సామాజిక వర్గానికి చెందిన వైసీపీ నేతలతో ‘పవన్‌ నాయుడు’ అన్పిస్తున్నారు ముఖ్యమంత్రి వైఎస్‌ జగన్‌. నిజానికి పవన్‌ పేరులో ‘నాయుడు’ అనే ప్రస్తావన ఎప్పుడూ లేదు. ‘నేను ప్రజల సమస్యలపై మాట్లాడుతున్నాను.. నన్ను మీరెలాగైనా విమర్శించుకోవచ్చు.. రాజకీయాల్లో ఇవన్నీ మామూలే. కానీ, విడిపోయినవారిని ప్రస్తావిస్తున్నారు.. మీకు ఇంగితం లేదా.?’ అని పవన్‌ సూటిగా సీఎం వైఎస్‌ జగన్‌నే ప్రశ్నించడం గమనార్హం.

తాజాగా మంగళగిరిలో పార్టీ ముఖ్య నేతల సమావేశంలో వవన్‌ కళ్యాణ్‌ ఈ వ్యాఖ్యలు చేశారు. కొసమెరుపేంటంటే, ‘మట్టిలో కలిసిపోతారు అనే మాటను నేను ఆవేశంలో అనలేదు. తెలుగు భాషని మీరు అగౌరవ పరిస్తే మట్టిలో కలిసిపోతారు అన్నాను. మళ్ళీ చెబుతున్నా, భాషల్ని గౌరవించే సంప్రదాయం మా పార్టీది’ అని పవన్‌ వ్యాఖ్యానించడం.