వైఎస్‌ జగన్‌ ఎవరికి బినామీ.? జనసేన ‘పవర్‌’ పంచ్‌.!

అత్యంత కీలకమైన విషయాలపై ముఖ్యమంత్రి స్పందన, రాష్ట్ర ప్రజలకున్న అనుమానాల్ని నివృత్తి చేస్తుంది. ముఖ్యమంత్రి తాను మాట్లాడలేని దుస్థితిలోనే ఎవరో ఓ మంత్రిని ఉసిగొల్పి.. ఆయా అంశాలపై అనుమానాల్ని రేకెత్తిస్తుండడం ఇటీవలి కాలంలో తరచూ చూస్తున్నాం. ఇదొక రాజకీయ వ్యూహం. ప్రభుత్వం తన చేతకానితనాన్ని కప్పిపుచ్చుకునేందుకు చేసే సిల్లీ పబ్లిసిటీ స్టంట్స్‌ ఇలానే వుంటాయి. రాజధాని అమరావతి విషయంలో వైఎస్‌ జగన్‌ సర్కార్‌ కూడా ఇలాగే వ్యవహరిస్తోందా.? అంటే, అవుననే అభిప్రాయం జనంలో బలపడుతోంది.

రాజధాని అంటే అది రాష్ట్ర ప్రజల ఆత్మగౌరవం. దురదృష్టవశాత్తూ ఆంధ్రప్రదేశ్‌లోని అధికారపక్షానికి రాజధాని పట్ల చిత్తశుద్ధి కనిపించడంలేదు. మూడు నెలల పాలన పూర్తి చేసుకున్న ముఖ్యమంత్రి వైఎస్‌ జగన్‌, అమరావతి విషయంలో మాత్రం ప్రజలకు స్పష్టతనివ్వకపోవడం గమనార్హం. మరోపక్క మంత్రి బొత్స సత్యనారాయణ పదే పదే రాజధాని అమరావతిపై వివాదాస్పద వ్యాఖ్యలు చేస్తున్నారు. ఆ వ్యాఖ్యలపై జనసేన పార్టీ తీవ్రంగా స్పందిస్తోంది. దాన్ని జీర్ణించుకోలేని వైఎస్సార్సీపీ, పవన్‌కళ్యాణ్‌ని ‘చంద్రబాబు బినామీ’ అంటూ విమర్శిస్తోన్న విషయం విదితమే.

Also Read: వైసీపీ వర్సెస్‌ జనసేన.. ఎవరికి ‘కాపు’ కాస్తారో.!

‘నేను చంద్రబాబు బినామీ అయితే, వైఎస్‌ జగన్‌ ఎవరికి బినామీ.?’ అంటూ జనసేన అధినేత పవన్‌ కళ్యాణ్‌ ప్రశ్నిస్తున్నారు. ‘నేను టీడీపీని ప్రశ్నించినప్పుడు, వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌, రోడ్ల మీద వున్నారు..’ అంటూ పవన్‌ కళ్యాణ్‌ ఎద్దేవా చేయడం ఇప్పుడు రాజకీయ వర్గాల్లో హాట్‌ టాపిక్‌ అయ్యింది. వైఎస్‌ జగన్‌కి మాత్రమే కాదు, పదే పదే తనను బినామీ అంటూ మంత్రి బొత్స విమర్శించడాన్ని తప్పుపట్టిన జనసేన అధినేత పవన్‌ కళ్యాణ్‌, ‘మీడియా ముఖ్యమంత్రి..’ అంటూ బొత్సకి చురకలంటించారు.

టీడీపీ – జనసేన కుమ్మక్కయ్యిందా.? లేదా.? అన్నది కాదిక్కడ సమస్య. అమరావతిలోనే రాజధాని వుంటుందా.? లేదా.? అన్నది అతి ముఖ్యమైన సమస్య. ఈ విషయంపై స్పందించలేనంత దుస్థితిలో ముఖ్యమంత్రి వైఎస్‌ జగన్‌ ఎందుకు కొట్టుమిట్టాడుతున్నారు.? బొత్సకి వున్నపాటి ధైర్యం వైఎస్‌ జగన్‌కి లేకపోవడమేంటి.? మీడియాని రాజధాని విషయమై ముఖ్యమంత్రి వైఎస్‌ జగన్‌ ఫేస్‌ చేయలేకపోతున్నారంటే, తెరవెనుక వ్యవహారాలపై అనుమానాలు కలగకుండా వుండవు కదా.!