టీకా డోసుల్లో తప్పిదం వల్లే అలా జరిగింది: ఆస్ట్రాజెనెకా

ప్రపంచాన్ని అతలాకుతలం చేస్తున్న కోవిడ్ మహమ్మారిని అరికట్టే వ్యాక్సిన్ కోసం కోట్లాది మంది ప్రజలు ఎంతో ఉత్కంఠతో ఎదురుచూస్తున్నారు. రష్యా నుంచి టీకా వచ్చినా.. దాని పనితీరుపై చాలామందికి సందేహాలు ఉన్నాయి. ఈ నేపథ్యంలో ఆక్స్ ఫర్డ్, ఆస్ట్రాజెనెకా సంయుక్తంగా అభివృద్ధి చేస్తున్న టీకాపైనే అందరి దృష్టీ కేంద్రీకృతమై ఉంది. అయితే, ఆ టీకా సమర్థతపై సందేహాలు వ్యక్తం కావడంతో ఆందోళన నెలకొంది. ఈ నేపథ్యంలో ఆస్ట్రాజెనెకా దీనిపై వివరణ ఇచ్చింది. టీకా డోసుల విషయంలో జరిగిన తప్పిదమే ఈ గందరగోళానికి కారణమని పేర్కొంది.

టీకా పరీక్ష ఫలితాలను ఇటీవల ఆస్ట్రాజెనెకా వెల్లడించింది. రెండు వేర్వేరు బృందాలకు డోసులు ఇవ్వగా.. మొదటి బృందంలో 90 శాతం, రెండో బృందంలో 62 శాతం సామర్థ్యంలో టీకా పనిచేసినట్టు గుర్తించారు. దీంతో ఈ టీకా సామర్థ్యం సరాసరిన 70 శాతం ఉన్నట్టు నిర్ధారించారు. అయితే, రెండు బృందాల మధ్య వైరుధ్యం ఎక్కువ ఉండటంతో ఈ టీకా సమర్థతపై సందేహాలు వ్యక్తమయ్యాయి. అయితే, డోసుల్లో తప్పిదమే ఇందుకు కారణమని ఆస్ట్రాజెనెకా స్పష్టంచేసింది.

ప్రయోగంలో భాగంగా వాలంటీర్లకు నెలరోజుల వ్యవధిలో రెండు డోసులు ఇవ్వాలని.. అయితే, వైద్యులు పొరపాటున మొదటి డోసు పరిమాణాన్ని సగం మేర తగ్గించి ఇచ్చారని తెలిపింది. అనంతరం దీనిని గుర్తించిన వైద్యులు.. రెండో బృందానికి పూర్తిడోసు ఇచ్చారని వివరించింది. ఈ క్రమంలో ఒకటిన్నర డోసు తీసుకున్నవారిలో ఈ టీకా 90 శాతం మేర పనిచేయగా.. రెండు డోసులు తీసుకున్నవారిలో 62 శాతం సామర్థ్యం కనబరిచిందని వెల్లడించింది.

అయితే, తక్కువ డోసు ఇచ్చినవారిలోనే ఎక్కువ ఫలితం కనిపించడంపై ఇంకా స్పష్టత రాలేదు. మరోవైపు టీకా డోసు పొరపాటున తక్కువగా ఇచ్చినా.. మేలే జరిగిందని కంపెనీ పేర్కొంది. డోసు ఎంత ఇవ్వాలనే అంశంపై స్పష్టత వచ్చిందని తెలిపింది. ఇదిలా ఉండగా.. ఈ టీకా వృద్ధుల్లో సరిగా పనిచేయడంలేదనే వార్తలు వస్తున్నాయి.