కొత్త జోడి ‘జబర్దస్త్‌’గా ఉంటుందా?

తెలుగు టీవీ చరిత్రలో చాలా ప్రోగ్రామ్స్‌ ఒక రకమైన చరిత్రే సృష్టించాయి. నేటి వరకు అలాంటి హైయెస్ట్‌ రేటెడ్‌ ప్రోగ్రామ్స్‌లో ముందువరసలో ఉండేది జబర్దస్త్‌ కార్యక్రమమే. ఈటీవీతోపాటు ఈనాడు గ్రూప్‌లో ప్రసారమయ్యే అన్నికార్యక్రమాల్లో మడికట్టుకునే పనిచేసేవారు. సిద్ధాంతాలు అనిచెప్పి లేడీ యాంకర్లతో చీరలకు కట్టించి మరీ వార్తలు చదివిస్తున్నారు. అంత గొప్ప ఈనాడు గ్రూపులో ప్రసారమయ్యే జబర్దస్త్‌ కామెడీ షో మాత్రం మడిని పక్కనపెట్టి పూర్తి మాస్‌, మసాలా ఎంటర్‌టైనర్‌గా ఎదిగింది. మోతాదును మించిన బూతు కామెడీతో భారీ సంఖ్యలోనే అభిమానులను అలరించింది. మొదట్లో ఈటీవీలో ఇలాంటి కార్యక్రమాలా? అని ముక్కున వేలేసుకున్న చాలామంది.. ఆ తర్వాత జబర్దస్త్‌ వీడియోలను యూట్యూబ్‌లో చూస్తూ కడుపారా నవ్వుకునే పరిస్థితిని మల్లెమాల ఎంటర్‌టైన్‌మెంట్‌ సంస్థ కల్పించింది.

ఈ కార్యక్రమంలో ఆర్టిస్టుల స్కిట్‌లకు జడ్జీలైన నాగబాబు, రోజాల కామెంట్లు.. కడుపారా నవ్వడాలు అదనపు అట్రాక్షన్‌. ఇందులో ఏమాత్రం డౌట్‌ అవసరం లేదు. అప్పుడప్పుడు వీరిద్దరిపై స్కిట్లలో జోకులు పేలినా.. లైట్‌ తీసుకుని ప్రోగ్రామ్‌ను ఎంటర్‌టైనర్‌గా మార్చారు. అనుసూయ, రష్మిల యాంకరింగ్‌ కూడా ఈ ప్రోగ్రానికి యాడెట్‌ అడ్వాంటేజ్‌. కుళ్లు జోకులే ఎక్కువగా ఉ‍న్నప్పటికీ.. టీవీ రేటింగ్స్‌లో ఆ తర్వాత యూట్యూబ్‌ ఆదాయంలో జబర్దస్త్‌ నిజంగానే జబర్తస్త్‌ కలెక్షన్లు తెచ్చిపెడుతోంది. ఈ క్రెడిట్‌ అంతా మొత్తం జబర్దస్త్‌కోసం పనిచేస్తున్న అందరి టీమ్‌ ఎఫర్ట్‌.

ఇప్పుడా టీమ్‌నుంచి నాగబాబు, రోజా శాశ్వతంగా విడిపోయే అవకాశముంది. ఇన్నాళ్లు షో రక్తికట్టేందుకు కారణమైన ఈ ఇద్దరు ఎన్నికల ప్రచారం సందర్భంగా షూటింగ్‌ షెడ్యూల్‌కు రావడం లేదు. పవర్‌స్టార్‌ పవన్‌ కల్యాణ్‌ పిలుపుతో.. నాగబాబు ప్రత్యక్ష రాజకీయ గోదాలోకి దిగారు. నరసాపురం ఎంపీగా పోటీ చేస్తు‍న్నారు. అటువైపు రోజా మొదట్నుంచీ వైయస్సార్‌సీపీలో క్రియాశీలకంగానే ఉన్నారు. ఇప్పుడు ఎన్నికల ప్రచారం సందర్భంగా ఇంకా బిజీ అయ్యారు. ఏపీలో వైయస్సార్‌సీపీ గెలిచేందుకు అవకాశాలు పుష్కలంగా ఉన్నాయని సర్వేలు చెబుతున్న నేపథ్యంలో ఆమె గెలిస్తే మంత్రి పదవి ఖాయమే. దీంతో ఇక రెగ్యులర్‌గా షెడ్యూల్‌కు అనుగుణంగా షూటింగ్‌కు రావడం కష్టమే.

నాగబాబు కూడా సామాజిక సమీకరణాలు కలిసొస్తే నరసాపురం నుంచి ఎంపీ అవ్వడం ఖాయమే. ఒకవేళ ఆయన గెలవకపోయి.. జనసేన వ్యవహారాల్లో చురుకుగా పాలుపంచుకోనున్నారని సమాచారం. దీంతో వీరిద్దరు జబ్బర్దస్త్‌కు తిరిగిరావడం కష్టమేననే చర్చ జరుగుతోంది. దీంతో వీరి స్థానంలో కొత్త జడ్జీలు ఎంట్రీ ఇచ్చారు. సెలవుపై వెళ్లి మళ్లీ షోలో జాయిన్‌ అవుతారని అప్పటివరకు వీరి స్థానంలో శేఖర్‌ మాస్టర్‌, నిన్నటితరం నటి మీనాలు జడ్జీలుగా ఉంటారని అనుకున్నా.. పైకారణాలతో పాత జడ్జీలు మళ్లీ తిరిగిరావడం ఇక డౌటేననిపిస్తోంది.

రోజా స్థానంలో మీనాను రంగంలోకి దించారు. అయితే ‍కుటుంబకథానాయకిగా ప్రజలను ఆకట్టుకున్న మీనా.. సినిమాల్లో కామెడీ సీన్లలోనే మనసారా నవ్వలేదు. దీనికితోడు పచ్చిబూతు డైలాగులు ప్రవహించే జబర్దస్త్‌లో కుల్లుజోకులతో మీనా తన పాత్రకు న్యాయం చేయగలరా అనేది డౌటనుమానం. దీనికితోడు.. శేఖర్‌ మాస్టర్‌ కూడా కడుపారా నవ్విన సందర్భాలు టీవీ స్క్రీన్‌పై తక్కువగానే కనిపించాయి. మరి ఆయన ఏమేరకు తన ‘స్కిట్‌’ (స్క్రీన్‌పై నవ్వడం కూడా యాక్టింగే కదా) కు న్యాయం చేస్తారో లేదో చూడాలి. అసలు ఇంట్రెస్టింగ్‌ ట్విస్ట్‌ ఏంటంటే.. జబర్దస్త్ షోకు ఒప్పుకున్నందుకు గానూ.. శేఖర్ మాస్టర్, మీనాలకు వారు ఇప్పటి వరకు ఏ టీవీ షోకు ఇవ్వనంత భారీ రెమ్యూనరేషన్ ఇస్తున్నట్లు సమాచారం. కొన్ని ఎపిసోడ్లు గడిస్తే గానీ వీరి పెర్ఫార్మెన్స్‌పై జనాలకు ఓ అంచనా రాదు.