నయనతార, కైరా అద్వానీ.. రొమాంటిక్‌ ఫైట్‌.?

అజయ్‌ దేవగన్‌, టబు, రకుల్‌ ప్రీత్‌ సింగ్‌ ప్రధాన పాత్రల్లో రూపొందిన బాలీవుడ్‌ మూవీ ‘దే దే ప్యార్‌ దే’ మంచి విజయాన్నే అందుకుంది. ఇప్పుడు ఆ సినిమాని తెలుగులోకి రీమేక్‌ చేయబోతున్నారు. ‘దే దే ప్యార్‌ దే’ సినిమాలోని కంటెంట్‌, వెంకటేష్‌ బాడీ లాంగ్వేజ్‌కి పెర్‌ఫెక్ట్‌గా సూట్‌ అవుతుందనే భావనతో ఆ సినిమా రీమేక్‌ రైట్స్‌ని నిర్మాత సురేష్‌బాబు కైవసం చేసుకున్న విషయం విదితమే. త్వరలోనే ఈ సినిమాని పట్టాలెక్కిస్తామని కూడా ఇటీవలే సురేష్‌ బాబు ప్రకటించారు కూడా.

అయితే, వెంకటేష్‌ సరసన హీరోయిన్లుగా ఎవరు నటిస్తారన్నదానిపై ఇప్పుడు టాలీవుడ్‌లో ఆసక్తికరమైన చర్చ జరుగుతోంది. వాస్తవానికి ‘దే దే ప్యార్‌ దే’ సినిమాలో టబు కాస్త ఏజ్డ్‌ పాత్రలో కన్పించింది. ఆమె వయసుకు తగ్గ పాత్రే అది. కానీ, తెలుగులో మాత్రం, ఈ పాత్ర వయసు కొంత తగ్గించబోతున్నారట. ఎందుకంటే, బాలీవుడ్‌ ప్రయార్టీస్‌ వేరు, ఇక్కడి ఈక్వేషన్స్‌ వేరు. తెలుగులో నయనతార, వెంకటేష్‌ అయితే మంచి కాంబినేషన్‌ అవుతుందనే ఆలోచనలో నిర్మాత సురేష్‌ బాబు వున్నట్లు సమాచారమ్‌. మరి, రకుల్‌ ప్రీత్‌ సింగ్‌ పాత్రలో ఎవర్ని తీసుకుంటే బావుంటుంది? అన్న చర్చ వచ్చినప్పుడు కైరా అద్వానీ పేరు వైపు మొగ్గు కన్పిస్తోందట.

ప్రస్తుతం కైరా అద్వానీ బాలీవుడ్‌లో క్షణం తీరిక లేకుండా పలు సినిమాలు చేసేస్తోంది. ఆమె నటించిన బాలీవుడ్‌ సినిమా ‘కబీర్‌ సింగ్‌’ ఈ నెల 21న ప్రేక్షకుల ముందుకు రాబోతోంది. ఇది తెలుగు ‘అర్జున్‌ రెడ్డి’కి హిందీ రీమేక్‌. దీని తర్వాత కైరా అద్వానీ మరో మూడు సినిమాలకు కమిట్‌ అయి వుంది కాబట్టి, అవి పూర్తవ్వాలంటే అంత ఈజీ కాదు. తమిళంలోనూ శివ కార్తికేయన్‌తో కైరా అద్వానీ ఓ సినిమాని ఒప్పుకుందంటూ వార్తలొస్తున్నాయి. ఈ టైమ్‌లో కైరా అద్వానీ కోసం ఎదురు చూస్తే కష్టమన్న అభిప్రాయం కూడా ఇంకో వైపు విన్పిస్తోంది. ఒకవేళ కైరాతో కుదరని పక్షంలో మరో యంగ్‌ హీరోయిన్‌ని, అందునా బబ్లీగా కన్పించే క్యూట్‌ హీరోయిన్‌నీ సెలక్ట్‌ చేయడం మంచిదన్న భావనలో వున్నారట నిర్మాత సురేష్‌ బాబు. అయితే, ‘దే దే ప్యార్‌ దే’ సినిమా పట్టాలెక్కడానికి ఇంకా కొంత సమయం పడుతుంది కాబట్టి, ఈలోగా ఈక్వేషన్స్‌ ఎలాగైనా మారొచ్చు.