ప్రధాని మోడీతో పవన్ కళ్యాణ్ భేటీ.! వాళ్ళకెందుకు వణుకు.?

జనసేన అధినేత పవన్ కళ్యాణ్, ప్రధాన మంత్రి నరేంద్ర మోడీతో విశాఖపట్నంలో భేటీ కానున్నారు. ఈ వార్త బయటకు రాగానే, ‘అంతా ఫేక్..’ అనేసింది వైసీపీ అను‘కుల’ మీడియా.! ప్రధాని నరేంద్ర మోడీ విశాఖ పర్యటన కోసం వైసీపీ ప్రభుత్వం చేస్తున్న ఏర్పాట్లు ఓ వైపు, వైసీపీ పార్టీ చేసుకుంటున్న ఏర్పాట్లు ఇంకో వైపు.. వెరసి అందర్నీ విస్మయానికి గురిచేస్తున్నాయి.

తెలంగాణ అభివృద్ధికి కేంద్రం సహకరించడంలేదంటూ, ప్రధాని మోడీ తెలంగాణ పర్యటనని సైతం లైట్ తీసుకుంటోంది తెలంగాణ సర్కార్. మరి, ప్రత్యేక హోదా సహా విభజన హామీలేవీ నెరవేర్చని కేంద్రం పట్ల ఆంధ్రప్రదేశ్ రాష్ట్ర ప్రభుత్వం ఇంకెలాంటి వైఖరి ప్రదర్శించాలి.. అక్కడి అధికార పార్టీ ఇంకెంతలా రాజకీయ విమర్శలు చేయాలి.?

సరే, రాజకీయం వేరు.. ప్రోటోకాల్స్ వేరనుకోండి.. అది వేరే సంగతి. ప్రధాని మోడీ పర్యటనకు రాష్ట్ర ప్రభుత్వం తగిన ఏర్పాట్లు చేయాల్సిందే.. అది తెలంగాణ అయినా, ఆంధ్రప్రదేశ్ అయినా.. ప్రోటోకాల్ పాటించి తీరాలి. ఈ విషయంలో వైసీపీ ప్రభుత్వాన్ని తప్పు పట్టలేం.

కానీ, మూడు లక్షల మందిని ప్రధాని నరేంద్ర మోడీ నిర్వహించబోయే బహిరంగ సభకు రప్పించేందుకు వైసీపీ ప్రయత్నించడమేంటి.? ఇందుకోసం పార్టీ శ్రేణులకు ప్రత్యేకంగా పిలుపునివ్వడమేంటి.? ఇదంతా నాణానికి ఓ వైపు మాత్రమే. ఇంకో వైపు, పవన్ కళ్యాణ్ ఎట్టి పరిస్థితుల్లోనూ ప్రధాని నరేంద్ర మోడీతో భేటీ అవకుండా వుండేందుకోసం.. వైసీపీ అధినాయకత్వం ఢిల్లీ స్థాయిలో మేగ్జిమమ్ లాబీయింగ్ చేసిందన్న ప్రచారం సహజంగానే అందరికీ ఆశ్చర్యం కలిగిస్తోంది.

తెలంగాణలో అయితే పవన్ కళ్యాణ్‌ని అస్సలు బీజేపీ పట్టించుకోదట.. ప్రధాని మోడీ పర్యటనలో పవన్ కళ్యాణ్‌కి ఛాన్స్ వుండదట. అందుకే, విశాఖను పవన్ కళ్యాణ్ ఎంచుకున్నారనీ, ఈ క్రమంలో పవన్ చాలా దిగజారిపోయారనీ.. వైసీపీ అను‘కుల’ మీడియా సహజంగానే రోత రాతల్ని తెరపైకి తెచ్చింది.

మోడీని పవన్ కళ్యాణ్ కలవడం, కలవకపోవడం అన్నది రెండు పార్టీలకు సంబంధించిన వ్యవహారం. ఆ రెండు పార్టీలూ మిత్రపక్షాలు. మోడీ అపాయింట్మెంట్ ఖరారయ్యింది గనుకనే, విశాఖ పర్యటన పెట్టుకున్నారు జనసేనాని. గతంలో భీమవరం వెళ్ళి ప్రధానిని కలిసే అవకాశం పవన్ కళ్యాణ్‌కి లభించినా కొన్ని ప్రత్యేక కారణాల వల్ల వెళ్ళలేకపోయారు.

అప్పుడు వెళ్ళలేకపోయారు.. ఇప్పుడు వెళుతున్నారు.. ఇది పూర్తిగా పవన్ ఛాయిస్.! ప్రధాని మోడీ నుంచి జనసేనాని ఆశిస్తున్న రోడ్ మ్యాప్ విశాఖలో లభిస్తే.. ఆ తర్వాత వ్యవహారం వేరే లెవల్‌లో వుంటుంది. అయినా, మోడీతో పవన్ భేటీ అయితే వైసీపీ ఎందుకు వణుకుతోంది.? వైసీపీ అను‘కుల’ మీడియా ఎందుకు భయపడుతోంది.?