మోడీతోనే ప్రియాంక ఢీ?

ప్రియాంక రాజ‌కీయాల్లో అడుగు పెట్ట‌డం ఒక సంచ‌ల‌న‌మే.. అయితే ఎన్నిక‌ల్లో నిల‌బ‌డుతుందా? లేదా అని అంద‌రూ నిరీక్షిస్తున్న స‌మ‌యంలో తాను పోటీచేస్తున్న‌ట్టు అభిమానుల‌కు సంకేతాలిచ్చారు. అదీ కూడా న‌రేంద్ర‌మోడీపైన‌, వార‌ణాసి నుంచి అని చెప్ప‌డంతో అంద‌రూ ఆశ్చ‌ర్య‌పోయారు.

అయితే ఈ సారి ఎన్నిక‌ల్లో పోటీ విప‌రీతంగా పెరిగే అవ‌కాశం ఉంది. అన్ని పార్టీలు వీటిని ప్ర‌తిష్టాత్మ‌కంగానే తీసుకుంటున్నాయి. ఈ నేప‌థ్యంలో ప్రియాంక నిర్ణ‌యం నిజ‌మే అయితే యావ‌త్ భార‌త దేశం దృష్టి వార‌ణాసిపైనే ప‌డుతుంది. అంతేకాదు ఈ ఎండాకాలంలో రాజ‌కీయ వేడి రెట్టింపు కానుందా అనిపిస్తుంది.

విష‌యానికి వ‌స్తే కాంగ్రెస్ పార్టీ ప్రధాన కార్యదర్శి ప్రియాంకా వాద్రా ఆ పార్టీ కార్యకర్తలకు ఇచ్చిన సమాధానం దేశ రాజకీయాల్లో సంచలనం సృష్టించింది. అనేక ఊహాగానాలకు కేంద్ర బిందువైంది. పార్టీ ఆదేశిస్తే లోక్‌సభ ఎన్నికల్లో పోటీకి సిద్ధమేనని ప్రియాంక చెప్పారు.

ఆ మరుసటి రోజే తాను పోటీచేసే స్థానం వారణాసి ఎందుకు కాకూడదని ప్రశ్నించి కాంగ్రెస్‌ కార్యకర్తలను సంభ్రమాశ్చర్యంలో ముంచెత్తారు. రాయ్‌బరేలిలో నిర్వహించిన స్థానిక కార్యకర్తలు, నాయకుల సమావేశంలో ఆమె పాల్గొన్నారు. ఈ సందర్భంగా కార్యకర్తలు ఆమెను రాయ్‌బరేలీ నుంచి పోటీ చేయాలని కోరారు. వెంటనే ప్రియాంక…వారణాసి నుంచి ఎందుకు పోటీ చేయకూడదు? అని ఎదురు ప్రశ్నించారు.

అంతేకాకుండా రాయ్‌బరేలీలో పనులకు ఆటంకం కలగకుండా చూసుకుంటానని తన తల్లి సోనియాకు మాట ఇచ్చాననీ తెలిపారు. వారణాసి నుంచి ప్రధాని నరేంద్ర మోదీ మరోసారి పోటీచేయనున్న నేపథ్యంలో అదే స్థానం నుంచి తాను ఎందుకు బరిలోకి దిగకూడదని ప్రియాంక ప్రశ్నించటం గమనార్హం.

నిజంగానే ఆమె వారణాసి నుంచి పోటీ చేస్తే ప్రస్తుత ఎన్నికల్లో దేశంలోనే అతిపెద్ద పోటీ అక్కడ జరుగుతుంది. దేశం యావత్తు దృష్టి ఆ లోక్‌సభ స్థానంపై కేంద్రీకృతం అవుతుందనటంలో సందేహం లేదు. ప్రియాంక సమాధానం రాజకీయ వర్గాల్లో ఆసక్తికర చర్చలకు దారితీసింది.