ఔను, మంత్రి మేకపాటి గౌతమ్‌రెడ్డికి దక్కిన అరుదైన గౌరవమిది.!

అరరె, ఇంకా చాలా జీవితం వుందే.! కానీ, ఇంతలో ఇలాగయ్యిందేంటీ.? రాజకీయంగా మరిన్ని ఉన్నత శిఖరాల్ని అధిరోహించే సత్తా వున్న ‘మంచి’ నాయకుడు అనూహ్యంగా హఠాన్మరణం చెందడం అత్యంత బాధాకరం.! ఎవరి నోట విన్నా ఇవే మాటలు. మంత్రి మేకపాటి గౌతమ్ రెడ్డి గురించిన చర్చ తెలుగు రాష్ట్రాల్లోనే కాదు, దేశవ్యాప్తంగా జరుగుతోంది.

రాజకీయ పరమైన విమర్శలు గౌతమ్‌రెడ్డి మీద కూడా కొన్ని వచ్చి వుండొచ్చు. కానీ, ఆయనెప్పుడూ బరితెగించేయలేదు కొందరు వైసీపీ మంత్రుల్లా. గౌతమ్ రెడ్డి నోటి వెంట ఎప్పుడూ బూతులు రాలేదు. అసలెప్పుడూ ఆయన తమ మీద కోపం ప్రదర్శించలేదంటూ గౌతమ్ రెడ్డి వద్ద వ్యక్తిగత సహాయకులుగా (డ్రైవర్లు, ఇంట్లో వంట పని చేసేవారు..) చెప్పడం నిజంగానే ఆశ్చర్యకరం.

పోయినోళ్ళంతా మంచోళ్ళే.. అన్నట్టు ఏదో మొహమాటానికి చెబుతున్న మాటలు కావివి. ‘మంచి స్నేహితుడ్ని కోల్పోయా..’ అని జనసేన అధినేత పవన్ కళ్యాణ్ చెప్పినా, తెలంగాణ రాష్ట్ర సమితి వర్కింగ్ ప్రెసిడెంట్ కేటీయార్ చెప్పినా.. మేకపాటి గౌతమ్ రెడ్డి సంపాదించుకున్న గౌరవ ప్రతిష్టలు అలాంటివి.

‘ఏం తీసుకొచ్చావ్ రాష్ట్రానికి.?’ అంటూ మంత్రి గౌతమ్ రెడ్డిపై గతంలో ప్రశ్నాస్త్రాలు దూసుకొచ్చాయి వివిధ రాజకీయ పార్టీలకు చెందిన నేతల నుంచి. అలా ప్రశ్నించినోళ్ళలో చాలామంది ఆయనతో తమకున్న అనుబంధాన్ని చాటుకుంటున్నారు. రాజకీయం వేరు, వ్యక్తిగత ఇమేజ్ వేరు.

గౌతమ్ రెడ్డి అందరివాడు.. ఆ విషయం ఇప్పుడిలా, ఆయన మరణం తర్వాత బయటపడింది. వైసీపీలో సోకాల్డ్ వెకిలి మంత్రులు తెలుసుకోవాల్సింది ఇదే. నిబద్ధతతో పని చేశారా.? లేదా.? అన్న విషయాన్ని పక్కన పెడితే, అధినేత మెప్పుకోసం అడ్డమైన రాజకీయాలు చేస్తే, మీడియాలో పబ్లిసిటీ కోసం స్థాయి మరచి, దిగజారి వ్యవహరిస్తే.. వున్న గౌరవం ఊడిపోతుంది.

అదే, హుందాగా వ్యవహరిస్తే.. ఇదిగో గౌతమ్ రెడ్డిలా.. ‘అందరివాడు’ అన్పించుకుంటారు.! రాజకీయాల్లోవున్నవారెవరికైనాసరే ఈ సూత్రమే వర్తిస్తుంది.