లాక్‌డౌన్‌కి 100 రోజులు.. ఏం సాధించాం.?

కరోనా వైరస్‌ (కోవిడ్‌19) నేపథ్యంలో దేశవ్యాప్త లాక్‌డౌన్‌ అమల్లో వుంది. రేపటితో లాక్‌డౌన్‌కి 100 రోజులు పూర్తి కానున్నాయి. ఈ వంద రోజుల్లో లాక్‌డౌన్‌కి సంబంధించి ఐదు దశల్ని మనం చూశాం. సంపూర్ణ లాక్‌డౌన్‌ నుంచి.. సడలింపుల లాక్‌డౌన్‌ వరకూ.. చాలా చాలా జరిగాయి. ‘ప్రాణం కంటే ఏదీ గొప్పది కాదు..’ అని చెప్పిన పాలకులే, ఆ తర్వాత ‘ప్రాణంతోపాటు.. అన్నీ ముఖ్యమే..’ అనే స్థాయికి తమ స్టాండ్‌ని మార్చుకోవాల్సి వచ్చింది. తక్కువ కేసులున్నప్పుడు కరినమైన లాక్‌డౌన్‌.. కేసుల సంఖ్య విపరీతంగా పెరిగాక.. ‘నామ మాత్రపు’ లాక్‌డౌన్‌.. వెరసి, సామాన్యుల్ని పూర్తిగా ప్రమాదంలో పడేశాయి ప్రభుత్వాలు.. ఇందులో ఇంకో మాటకు తావు లేదు.

పేదలకు నెలవారీ రేషన్‌ సరుకులు, నగదు బదిలీ.. తదితర కార్యక్రమాల్ని కేంద్ర, రాష్ట్ర ప్రభుత్వాలు చేపట్టినా.. అవి సామాన్యుడికి కనీసపాటి ఊరట కూడా ఇవ్వలేదన్నది నిర్వివాదాంశం. రెక్కాడితేగాని డొక్కాడని బతుకులు.. సడలింపుల నేపథ్యంలో రోడ్డెక్కాయి. నిజానికి, కొన్ని ప్రాణాలు కరినమైన లాక్‌డౌన్‌ సమయంలోనే గాల్లో కలిసిపోయాయి. గత కొద్ది రోజులుగా ఆర్థిక ఇబ్బందులతో బలవన్మరణాలకు పాల్పడుతున్నవారి సంఖ్య పెరుగుతూ వస్తోంది. ఆ రంగం.. ఈ రంగం.. అన్న తేడాల్లేవు. అన్ని రంగాలూ కరోనా దెబ్బకి విలవిల్లాడుతున్నాయి.

ప్రధాని నరేంద్ర మోడీ ఆత్మ నిర్భర భారత్‌ అభియాన్‌.. పేరుతో 20 లక్షల కోట్ల ప్యాకేజీని ప్రకటించారు ఈ లాక్‌డౌన్‌ నేపథ్యంలోనే. కానీ, ఏం లాభం.? నేతి బీరకాయలో నెయ్యి చందాన తయారయ్యింది ఆ ప్యాకేజీ. కేంద్రం ప్రకటించిన ప్యాకేజీతో ఎవరికి లబ్ది.? అన్న విషయమై ఇప్పటికీ స్పష్టత లేదు. బ్యాంకులు మారటోరియం ప్రకటించేలా కేంద్రం చర్యలు తీసుకుందిగానీ.. ఆ బ్యాంకులు ఎక్కువ కాలం ఆ భారాన్ని మోయలేవు కదా.! అందుకే, సామాన్యుడి మీద విరుచుకుపడుతున్నాయి క్రమక్రమంగా. దేశంలో ఆర్థిక కార్యకలాపాలు జోరందుకున్నాయి.. అంతకన్నా జోరందుకున్నాయి కరోనా పాజిటివ్‌ కేసులు.

మళ్ళీ లాక్‌డౌన్‌ అమలు చేయాలన్న చర్చ దేశవ్యాప్తంగా జరుగుతోంది. మహారాష్ట్ర సహా కొన్ని రాష్ట్రాలు ఇప్పటికే లాక్‌డౌన్‌ని పొడిగిస్తూ నిర్ణయం తీసుకున్నాయి. రేపో మాపో తెలంగాణ కూడా లాక్‌డౌన్‌ పొడిగింపుపై స్పష్టత ఇచ్చే అవకాశం వుంది. ఆంధ్రప్రదేశ్‌ మాత్రం, కేంద్రం ఎలాంటి నిర్ణయం తీసుకున్నా కట్టుబడి వుంటామంటోంది. కేసులు పెరుగుతున్న కొద్దీ కంటెయిన్‌మెంట్‌ జోన్లు పెరుగుతున్నాయి.. అయితే, ఇదివరకట్లా ఎక్కువ పరిధిలో కంటెయిన్‌మెంట్‌ జోన్‌ వుండటంలేదు. కొన్ని చోట్ల ఓ ఇంటిని ‘కంటెయిన్‌మెంట్‌’గా ప్రకటించి ఊరుకుంటున్నారు.

తద్వారా తీవ్రతను తగ్గించి చూపేందుకు ప్రభుత్వాలు ప్రయత్నిస్తున్నా.. కేసుల సంఖ్య పెరుగుతున్న కొద్దీ జనంలో భయాందోళనలు పెరిగిపోతున్నాయి. కరోనా చికిత్సలో మెరుగైన ఫలితాలిస్తున్నాయంటూ కొన్ని మందులు మార్కెట్‌లోకి వచ్చాయి. అయితే అవన్నీ అత్యంత ఖరీదైనవి. వ్యాక్సిన్‌ వస్తే తప్ప, కరోనా బూతం నుంచి బయటపడే ప్రసక్తే లేదన్నది నిష్టురసత్యం. కానీ, అదెప్పుడు.? ఈలోగా సామాన్యుడి పరిస్థితేంటి.? కుదేలైపోయిన ఆయా రంగాలు.. భవిష్యత్తు మీద బెంగతో సామాన్యుడి ఆలోచనలు.. వెరసి, ఈసారి 100 రోజుల మార్క్‌ని చూసి బెంబేలెత్తిపోవాల్సి వస్తోందంతే.