వైఎస్ వివేకా డెత్ మిస్టరీ: మాజీ మంత్రి కొడాలి సంచలన వ్యాఖ్యల వెనుక.!

మాజీ ఎంపీ వైఎస్ వివేకానందరెడ్డి హత్య కేసులో సూపర్ ట్విస్ట్.! వైఎస్ వివేకానందరెడ్డి గతంలో, వైఎస్సార్ కుటుంబాన్ని సర్వనాశనం చేసేందుకు ప్రయత్నించారంటూ సంచలన ఆరోపణలు చేశారు మాజీ మంత్రి కొడాలి నాని.

‘కాంగ్రెస్ పార్టీకి రాజీనామా చేసి, వైఎస్సార్సీపీ తరఫున జగన్, విజయమ్మ బరిలోకి దిగినప్పుడు.. విజయమ్మపై పోటీకి దిగారు వైఎస్ వివేకానందరెడ్డి. కాంగ్రెస్ డైరెక్షన్‌లో జగన్ కుటుంబాన్ని రాజకీయంగా దెబ్బ తీసేందుకు ప్రయత్నించారు. కానీ, అవినాష్ రెడ్డి అలాగే ఆయన తండ్రి భాస్కర్ రెడ్డి మాత్రం వైసీపీ ఆవిర్భావం నుంచీ జగన్ వెన్నంటే వున్నారు.. వారికే జగన్ సీటు ఇస్తారు తప్ప.. వైసీపీలోకి వచ్చినంతమాత్రాన వివేకానందరెడ్డికి ఎందుకు సీటు ఇస్తారు.? కడప ఎంపీ సీటు వ్యవహారంలో గొడవల వల్లనే వివేకానందరెడ్డి హత్య జరిగిందనడం సబబు కాదు..’ అన్నది కొడాలి నాని వాదన.

వైఎస్ వివేకానందరెడ్డిపై అంతటి ద్వేషం వైఎస్ జగన్ మోహన్ రెడ్డిలో వుందా.? వైసీపీలోకి వచ్చినా, బాబాయ్ వైఎస్ వివేకానందరెడ్డిపై ‘పులివెందుల ఉప ఎన్నిక నాటి’ పగ, కక్ష.. కార్పణ్యాలు అలాగే వున్నాయా.? అన్న ప్రశ్నలకు స్వయంగా కొడాలి నాని అవకాశం కల్పించారు.

కాంగ్రెస్ పార్టీలో వుండి, వైఎస్ విజయమ్మకు పోటీగా వివేకానందరెడ్డి నిలబడిన మాట వాస్తవం. కానీ, ఆయన కూడా కాంగ్రెస్ పార్టీని వీడి, వైసీపీలో చేరారు. ఆ మాటకొస్తే, వైఎస్ జగన్ మోహన్ రెడ్డి రాజకీయ ప్రస్తానం కూడా కాంగ్రెస్ పార్టీలోనే మొదలైంది.

కాంగ్రెస్ పార్టీతో తక్కువ అనుబంధం గనుక, వైఎస్ జగన్ వెంటనే తెంచేసుకున్నారు. అదే కాంగ్రెస్ పార్టీతో ఎక్కువ అనుబంధం గనుక కొంత ఆలస్యమయ్యింది వివేకానందరెడ్డికి.

ఆ మాటకొస్తే, బొత్స సత్యనారాయణ అలాగే కన్నబాబు తదితర నేతలు వైఎస్ జగన్ మోహన్ రెడ్డిని విమర్శించినంతగా వివేకానందరెడ్డి ఏనాడూ విజయమ్మనిగానీ, వైఎస్ జగన్ మోహన్ రెడ్డినిగానీ విమర్శింలేదు కదా.? బొత్స సత్యనారాయణకి టిక్కెట్ ఇచ్చినప్పుడు.. కన్నబాబుకి టిక్కెట్ ఇచ్చినప్పుడు.. వివేకానందరెడ్డికి ఎందుకు టిక్కెట్ ఇవ్వకూడదబ్బా.?