కేజీఎఫ్‌ డైరెక్టర్‌ తెలుగు డెబ్యూ ఇప్పట్లో లేనట్లేనా?

కన్నడ చిత్రం కేజీఎఫ్‌ తో ఆల్‌ ఇండియా గుర్తింపు దక్కించుకున్న డైరెక్టర్‌ ప్రశాంత్‌ నీల్‌. ఈయన ప్రస్తుతం కేజీఎఫ్‌ 2 చిత్రాన్ని తెరకెక్కిస్తున్నాడు. ఆ తర్వాత తెలుగులో ఎన్టీఆర్‌తో ఈయన మూవీ ఉంటుందని గత ఏడాది కాలంగా ప్రచారం జరుగుతోంది. ప్రశాంత్‌ నీల్‌ ఇటీవల ఎన్టీఆర్‌ బర్త్‌ డేకు శుభాకాంక్షలు చెప్పడంతో వీరిద్దరి కాంబో అతి సమీపంలోనే ఉందని అంతా అనుకున్నారు. కాని పరిస్థితులు చూస్తుంటే ఎన్టీఆర్‌ ప్రశాంత్‌ నీల్‌ చిత్రం ప్రారంభంకు కనీసం ఏడాది నుండి రెండేళ్ల వరకు అయినా సమయం పట్టే అవకాశం ఉందంటున్నారు.

ఎన్టీఆర్‌ ప్రస్తుతం ఆర్‌ఆర్‌ఆర్‌ చిత్రాన్ని పూర్తి చేయాలి. ఆ తర్వాత త్రివిక్రమ్‌ మూవీని కూడా ఆయన చేయాల్సి ఉంది. త్రివిక్రమ్‌ తో మూవీ అయిన తర్వాత ఎన్టీఆర్‌ తదుపరి చిత్రాన్ని ప్రశాంత్‌ నీల్‌ చేస్తాడని అంటున్నారు. మరో వైపు ప్రశాంత్‌ నీల్‌ కూడా ప్రస్తుతం కేజీఎఫ్‌ 2 బాధ్యతలు మోస్తున్నాడు. ఈ సినిమా షూటింగ్‌ హడావుడిగా పూర్తి చేయాలేని పరిస్థితి. ఇలాంటి సమయంలో సినిమాలో కీలక పాత్రలో నటిస్తున్న సంజయ్‌ దత్‌ క్యాన్సర్‌ కారణంగా అమెరికా ట్రీట్‌మెంట్‌కు వెళ్లబోతున్నాడు. ఆయన తిరిగి వచ్చే వరకు కేజీఎఫ్‌ పూర్తి అయ్యే అవకాశం లేదంటున్నారు.

కేజీఎఫ్‌ 2 చిత్రం షూటింగ్‌ పూర్తి అయినా కన్నడంలో ఇప్పటికే ప్రశాంత్‌ కొన్ని కమిట్‌మెంట్స్‌ను కలిగి ఉన్నాడు. కనుక వాటిని కూడా చేసే అవకాశం ఉందంటున్నారు. అదే కనుక నిజం అయితే తెలుగులో ఎన్టీఆర్‌తో ప్రశాంత్‌ నీల్‌ మూవీ ఇప్పట్లో ప్రారంభం అవ్వడం కష్టమే అంటున్నారు. ప్రశాంత్‌ నీల్‌ స్టార్‌ డంతో ఆయనతో సినిమాలు చేసేందుకు మహేష్‌బాబు, ప్రభాస్‌, చరణ్‌ వంటి స్టార్స్‌ కూడా ఎదురు చూస్తున్నారు. ఎన్టీఆర్‌తో సినిమా ఫలితాన్ని బట్టి వారి సినిమాలు కూడా ఉంటాయనుకున్నారు. కాని ఎన్టీఆర్‌ సినిమానే ఎప్పుడు ప్రారంభం అవుతుందో తెలియని పరిస్థితి.