కృష్ణ కృష్ణా.. కేసీఆర్‌, జగన్‌ మధ్య ‘సీమ’ చిచ్చు చల్లారేదెలా.?

కృష్ణా నది నుంచి రాయలసీమకు నీళ్ళు తీసుకెళ్ళేందుకోసం రాయలసీమ ఎత్తిపోతల పథకం పేరుతో వైఎస్‌ జగన్‌ మోహన్‌రెడ్డి ప్రభుత్వం ఓ గట్టి సంకల్పం ఈ మధ్యనే తీసుకున్న విషయం విదితమే. దీన్ని తెలంగాణ ప్రభుత్వం వ్యతిరేకించింది. అవసరమైతే, ఆంధ్రప్రదేశ్‌ మీద న్యాయ పోరాటం చేస్తామని హెచ్చరించింది కూడా. అయితే, ‘మా వాటా నీళ్ళను మేం వాడుకుంటాం.. అదనంగా మేమేమీ కృష్ణా నది నుంచి నీళ్ళను తీసుకెళ్ళబోం.. ఈ విషయంలో రాజీపడే ప్రసక్తే లేదు..’ అని తేల్చి పారేశారు ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి.

‘అలా ఎలా చేస్తారు.? కృష్ణా నదిపై ప్రాజెక్టులు నిర్మించాలంటే, ఎగువన వున్న మా అనుమతి తప్పనిసరి.. తెలంగాణ రాష్ట్ర డిమాండ్‌ వెనుక నీటి వివాదాలే అత్యంత కీలక భూమిక పోషించాయి. ఇప్పుడూ ఆ నీటి వివాదాలు వస్తే ఎలా.?’ అని తెలంగాణ ముఖ్యమంత్రి కేసీఆర్‌ కుండబద్దలుగొట్టేశారు. అయితే, తెలంగాణ అభ్యంతరాల్ని బేఖాతరు చేస్తే, ఆంధ్రప్రదేశ్‌ ప్రభుత్వం, టెండర్ల ప్రక్రియవైపు పరుగులు పెడ్తోంది. ఈ నేపథ్యంలో తెలంగాణ ప్రభుత్వం, సుప్రీంకోర్టును ఆశ్రయించింది. రాయలసీమ ప్రాజెక్టుని ఆపాలంటూ ఆంధ్రప్రదేశ్‌ ప్రభుత్వానికి ఆదేశాలు ఇవ్వాలని తెలంగాణ ప్రభుత్వం, సుప్రీంకోర్టుని కోరింది. దాంతో, ఈ వ్యవహారం ఇప్పుడు తెలుగు రాష్ట్రాల్లో హాట్‌ టాపిక్‌గా మారింది.

గతంలో పోతిరెడ్డిపాడు ప్రాజెక్ట్‌ విషయంలో తెలంగాణ, సీమాంధ్ర మధ్య (ఉమ్మడి తెలుగు రాష్ట్రంలో) వివాదం నెలకొంది. ఆ వివాదంపై ఇప్పటికీ రాజకీయ రచ్చ జరుగుతూనే వుంది. ఈ నేపథ్యంలో ఇప్పుడు రాయలసీమ ప్రాజెక్ట్‌ పేరుతో ఆంధ్రప్రదేశ్‌ ప్రభుత్వం, తెలంగాణ ప్రభుత్వంతో వివాదాలు ఎందుకు కొనితెచ్చుకుంటున్నట్లు.? ‘రెండు తెలుగు రాష్ట్రాలూ సఖ్యతతో కృష్ణా – గోదావరి నదుల్లోని నీటిని వాడుకుందాం.. గోదావరి నుంచి నీటిని ఎత్తి పోసి, కృష్ణా నదిలో కలుపుకుని.. వాడుకుందాం..’ అంటూ కేసీఆర్‌, జగన్‌ మధ్య ఉన్నతస్థాయి చర్చలు జరిగాయి. ‘నేను అన్న లాంటోడ్ని..’ అని కొన్నాళ్ళ క్రితం రాయలసీమకు వెళ్ళిన సమయంలో కేసీఆర్‌ వ్యాఖ్యానించారు కూడా. కానీ, ఇప్పుడు ఏమయ్యింది.? కేసీఆర్‌, జగన్‌ మధ్య ఎక్కడ తేడా కొట్టింది.?

‘న్యాయస్థానాల్లో పంచాయితీలు తొందరగా తేలవు.. అందుకే, ఇరు రాష్ట్రాలూ కూర్చుని చర్చించుకోవాలి..’ అని గతంలో చెప్పిన కేసీఆర్‌, ఇప్పుడెందుకు ఇలా వ్యవహరిస్తున్నారు.? మరి, ‘పెద్దన్న’ విషయంలో వైఎస్‌ జగన్‌ వెనక్కి తగ్గుతారా.? అసలు ఇది కేవలం రాజకీయ రచ్చ మాత్రమేనా.? రాయలసీమ పట్ల వైఎస్‌ జగన్‌ ప్రభుత్వానికి చిత్తశుద్ధి లేదంటూ విపక్షాలు చేస్తున్న విమర్శల్లో నిజమెంత.? ఏమో, ఈ వివాదం ఎక్కడిదాకా వెళుతుందోగానీ.. తెలుగు రాష్ట్రాల మధ్య మళ్ళీ ‘నీళ్ళు’ నిప్పులు రాజేసేలా వున్నాయనే ఆందోళన మాత్రం ఇరు రాష్ట్రాల ప్రజల్లోనూ వ్యక్తమవుతోంది.