కమ్మ రాజ్యంలో కడప రెడ్ల టార్గెట్‌ పవన్‌ కళ్యాణే.!

కమ్మ రాజ్యంలో కడప రెడ్లట.. ఇది సినిమానా.? సమాజంలో రెండు సామాజిక వర్గాల మధ్య చిచ్చు పెట్టే ప్రయత్నమా.? టైటిల్‌ అదిరింది.. బోల్డంత మైలేజ్‌ వస్తుందని అనుకున్నాడేమో ఒకప్పటి సంచలన దర్శకుడు రామ్‌గోపాల్‌ వర్మ, తన పైత్యాన్ని సినీ ప్రేక్షకుల మీద రుద్దేందుకు ‘కమ్మ రాజ్యంలో కడప రెడ్లు’ అనే సినిమాని వదిలేస్తున్నాడు.

ఈ సినిమాకి సంబంధించి తాజాగా ఓ పోస్టర్‌ని విడుదల చేశాడు. ఇందులో తమిళ నటుడు అజ్మల్‌ (చరణ్‌ హీరోగా నటించిన ‘రచ్చ’ సినిమాలో జేమ్స్‌గా నటించిన కుర్రాడు), వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌ పాత్రలో కన్పించబోతున్నాడు. మరోపక్క, రామ్‌గోపాల్‌ వర్మకి రెగ్యులర్‌ టార్గెట్‌ అయిన చంద్రబాబు పాత్ర కూడా ఈ సినిమాలో వుంది.

అన్నిటికీ మించి, రామ్‌గోపాల్‌ వర్మ.. తనకు పబ్లిసిటీ కావాలనుకున్నప్పుడల్లా ఎవరి జపం అయితే చేస్తాడో ఆ పవన్‌ కళ్యాణ్‌ పాత్రని కూడా పోస్టర్‌ మీద పొందుపర్చాడు. ‘పవన్‌ కళ్యాణ్‌ అభిమానులతో తిట్టించుకుని చాలా రోజులయ్యింది..’ అంటూ వర్మ, సోషల్‌ మీడియాలో ట్వీట్లేస్తుంటాడు. అంత పబ్లిసిటీ పైత్యంతో రగిలిపోయే వర్మ, పవన్‌ కళ్యాణ్‌ పాత్రతో ఫుల్లుగా ఆడేసుకుంటున్నాడట ‘కమ్మ రాజ్యంలో కడప రెడ్లు’ సినిమా ద్వారా.

ఇంతకీ, ఇది వర్మ పైత్యమేనా.? లేదంటే, ఆ ‘రెడ్ల’ రాజ్యంలోని పెద్దలే, వర్మ ద్వారా పవన్‌ కళ్యాణ్‌ని చులకన చేసేలా సినిమా తీయిస్తున్నారా.? ఏమోగానీ, ఈ నెల 27న ‘కమ్మ రాజ్యంలో కడప రెడ్లు’ సినిమా ట్రైలర్‌ రాబోతోంది. తాను తీసే సినిమాలు జనానికి నచ్చుతున్నాయా.? లేదా.? అన్నది వర్మకి అనవసరం.

చెత్తబుట్టలోకి కూడా పనికిరాని సినిమాలనే విమర్శలు వచ్చినా వర్మ లెక్క చేయడు. ఎందుకంటే, వర్మకి పబ్లిసిటీ స్టంట్లు చేయడమెలాగో తెలుసు. ఆ పబ్లిసిటీ స్టంట్లు చాలు.. సినిమాల్ని అనౌన్స్‌ చేసెయ్యడానికి.. తీసెయ్యడానికి. వాటిల్లో కొన్ని విడుదలవుతాయ్‌.. కొన్ని విడుదల కాకుండానే కాలగర్భంలో కలిసిపోతాయ్‌.. మరికొన్ని తెరకెక్కకముందే మాయమైపోతాయ్‌.