Kamal Haasan: ‘రాజకీయాల్లో కొనసాగాలంటే సినిమాలు చేయకూడదనేం ఉంది..?’ అని ప్రశ్నించారు ప్రముఖ నటుడు కమల్ హాసన్ (Kamal Haasan). ఓ ఇంటర్వ్యూలో మరో హీరో విజయ్ (Vijay) పొలిటికల్ ఎంట్రీ.. సినిమాలు చేసే విషయంపై ఎదురైన ప్రశ్నకు ఆయన పై విధంగా స్పందించారు. ఇంకా ఏమన్నారంటే..
‘ప్రత్యక్ష రాజకీయాల్లోకి వస్తున్నందుకు విజయ్ కు శుభాకాంక్షలు. అతడిని రాజకీయాల్లోకి వచ్చేందుకు నేనూ ప్రోత్సహించాను. అతని నిర్ణయం స్వాగతించదగినది. అయితే.. రాజకీయాల్లోకి వస్తున్నందున సినిమాలు వదిలేయాలనేం లేదు. రాజకీయాల్లోనే కొనసాగాలా..? సినిమాలు కూడా చేయాలా..? అనేది ఆయన వ్యక్తిగత నిర్ణయం. పూర్తిగా రాజకీయాల్లోకి వచ్చాక సినిమాలు చేయననే నిర్ణయం ఆయన స్వగతం. నన్నూ అలా చేయమంటే ఎలా..?’.
‘ఒక రచయిత అద్భుతంగా పాటలు రాస్తాడు. నన్నూ రాయమంటే కష్టం. ఇక్కడ ఎవరి సామర్ధ్యం వారిది. విజయ్ చేసే సినిమాలు భిన్నంగా ఉంటాయి. నేనైతే రాజకీయాల్లో ఉంటూనే సినిమాలు కూడా చేస్తాను. ఎవరి ఇష్టం వారిద’ని అన్నారు. కమల్ హాసన్ ప్రస్తుతం మణిరత్నం దర్శకత్వంలో ‘థగ్ లైఫ్’ అనే సినిమాలో నటిస్తున్నారు.