జనసేన పవర్ పంచ్: రిగ్గింగ్ కూడా నవరత్నాల్లో భాగమేనా.?

‘తిరుపతి ఉప ఎన్నిక కోసం దొంగ ఓటర్ ఐడీ కార్డులు ముద్రించి ఎక్కడెక్కడినుంచో జనాన్ని తోలుకొచ్చి, క్యూలో నిలబడితే, ఓటరుని మీ తండ్రి పేరు ఏమిటని అడిగితే చెప్పలేకపోయారు. ఓ మహిళను నీ భర్త పేరు ఏమిటని అడిగితే తడబడ్డారు. తండ్రి, భర్త ఎవరో తెలియని దుస్థితికి కూలికి వచ్చిన దొంగ ఓటర్లకు కల్పించారు వైసీపీ నేతలు.. ఇలా దొంగ ఓట్లు వేయించడం కూడా ముఖ్యమంత్రి జగన్ రెడ్డిగారు నవరత్నాల్లో భాగం అనుకోవాలా.?’ అంటూ జనసేన పార్టీ, అధికార వైసీపీ మీద పవర్ పంచ్ విసిరింది. ‘తిరుపతి ఎన్నికల గురించి దేశమంతా చర్చించుకోవాలి.. ఆ స్థాయిలో మెజార్టీ రావాలి..’ అని ముఖ్యమంత్రి వైఎస్ జగన్ మోహన్ రెడ్డి చెబితే, అది వైసీపీ నాయకులకు ఇంకోలా అర్థమయినట్లుంది.

లేకపోతే, ‘ప్రజాస్వామ్యం ఖూనీ అయిపోతోంది ఆంధ్రపదేశ్ రాష్ట్రంలో.. ఓసారిటు చూడండి..’ అంటూ దేశమంతా తిరుపతి ఉప ఎన్నిక పోలింగ్ రోజే చర్చించుకోవడమేంటి.? ‘మేమెప్పుడూ ప్రజాస్వామ్యం ఇంత పతన స్థాయికి పడిపోవడం చూడలేదు..’ అని సగటు భారతీయుడు, ఆంధ్రపదేశ్ వైపు అత్యంత జుగుప్సాకరంగా చూడటం, తిరుపతి ఉప ఎన్నిక గొప్పతనం అనుకోవాలేమో. జనసేన విమర్శించిందని కాదుగానీ, ఏ మహిళ అయినా తన భర్త పేరుని తప్పుగా చెప్పగలుగుతుందా? ఏ వ్యక్తి అయినా తన తండ్రి పేరుని తప్పుగా చెప్పగలుగుతాడా.? వైసీపీ, అంత పెద్ద తప్పుని దొంగ ఓటర్లతో చెప్పించగలిగింది. ఇదీ, ఆంధ్రపదేశ్ పరువుని బజార్న పడేయడమంటే. ఇక, తిరుపతి ఉప ఎన్నికను రద్దు చేయాలంటూ జనసేన, బీజేపీ నినదిస్తున్నాయి. కేంద్ర ఎన్నికల సంఘానికి ఫిర్యాదు చేస్తామంటున్నాయి. ‘అధికారులు కళ్ళున్న గుడ్డివారిలా నటిస్తే ప్రజాస్వామ్యం మనజాలదు.

ఈ తిరుపతి ఉప ఎన్నిక జరిగిన రోజు దేశ ప్రజాస్వామ్యానికి దుర్దినం..’ జనసేన ముఖ్య నేత నాదెండ్ల మనోహర్ వ్యాఖ్యానించారు. నిజమైన ఓటర్లు, ఓట్లేయలేని పరిస్థితి వున్నప్పుడు, అసలు తిరుపతిలో ఉప ఎన్నిక జరిగిందని ఎలా అనగలం.? దొంగ ఓటర్లను బస్సుల్లో, ప్రత్యేక వాహనాల్ని తరలించారంటే, ఇది అధికార వైసీపీకి సంబంధించిన ఓ రాజకీయ కార్యక్రమంలానే చూడాలి తప్ప, తిరుపతి ఉప ఎన్నికలా చూడకూడదన్నది సర్వత్రా విన్పిస్తోన్న వాదన.