ఆ మంత్రులకి జగన్‌ రెండో ప్రమాద హెచ్చరిక.!

ఆరు నెలలు తిరగకుండానే ముఖ్యమంత్రి వైఎస్‌ జగన్‌ తన మంత్రి వర్గం నుండి కొందరికి ఉద్వాసన పలకనున్నారా.? అంటే అవుననే చర్చ రాజకీయ వర్గాల్లో జోరుగా సాగుతోంది. నిప్పు లేకుండా పొగ రాదు.. అనే మాట సర్వ సాధారణంగా వింటుంటాం. కానీ, రాజకీయాల్లో కొన్నిసార్లు నిప్పు లేకుండానే పొగ వస్తుంది. ఆ పొగ ఎఫెక్ట్‌ కొందర్ని ఇంటికి పంపించేస్తుంది కూడా. ఇంతకీ జగన్‌ మంత్రి వర్గంలో ఏం జరుగుతోంది.?

ముఖ్యమంత్రిగా వైఎస్‌ జగన్‌ బాధ్యతలు చేపట్టి నెల రోజులు మాత్రమే పూర్తైంది. ఇంతలోనే మంత్రి వర్గం గురించి ఇలాంటి వార్తలు ఎందుకు పుట్టుకొస్తున్నాయి.? అంటే దానికీ ఓ బలమైన కారణం ఉందంటున్నారు కొందరు. దాదాపుగా కాల గర్భంలో కలిసిపోయిన పరిస్థితి నుండి, తెలుగుదేశం పార్టీ అనూహ్యంగా ఊపు వచ్చే పరిస్థితి ఇప్పుడు నెలకొంది. 6 నెలలు ప్రభుత్వానికి సమయమిస్తారన్నారు కదా.. అనే ఆలోచనతో కొందరు వైసీపీ నేతలు, మరీ ముఖ్యంగా మంత్రులు కాస్తంత అలసత్వం ప్రదర్శిస్తున్న మాట వాస్తవం.

అందులోనూ, కొందరు మంత్రులైతే, తమకు పార్టీ వ్యవహారాలతో సంబంధం లేదన్నట్లు వ్యవహరిస్తున్నారు. అటు ప్రభుత్వంలో ఏం జరుగుతోందో, ఇటు పార్టీలో ఏం జరుగుతోందో, బయటి రాజకీయ పరిస్థితులేంటో ఎప్పటికప్పుడు నివేదికలు తెప్పించుకుంటున్న వైఎస్‌ జగన్‌ లిస్టులో లీస్ట్‌ మార్కులొచ్చినవారిని ఎంపిక చేసి, ఆల్రెడీ ఓ సారి వార్నింగ్‌ ఇచ్చారట. అయితే, వారిలో జగన్‌ ఆశించిన మార్పు కనిపించలేదట.

తాజాగా ఎమ్మెల్యే శిక్షణ కార్యక్రమంలో సుతిమెత్తగా వైఎస్‌ జగన్‌ హెచ్చరికలు జారీ చేశారు కూడా. ఈ హెచ్చరికల్ని కొందరు మంత్రులకు సెకండ్‌ వార్నింగ్‌గా అభివర్ణిస్తున్నారు. ముచ్చటగా మూడోసారి వార్నింగ్‌ ఇచ్చే పరిస్థితి వస్తే, అక్కడితో పదవి ఊడిపోయినట్లేనట. ప్రతిపక్షం యాక్టివ్‌ అవుతోందంటే, అధికార పక్షం డీలా పడుతున్నట్లే లెక్క. మన మీద టీడీపీ విమర్శలు చేస్తున్నప్పుడు స్పందించకపోతే, అధికార పార్టీపై విపక్షాలు చేసే ఆరోపణలు నిజమని ఒప్పుకున్నట్లవుతుంది.. అన్నది వైఎస్‌ జగన్‌ అభిప్రాయంగా కనిపిస్తోంది. అది నిజం కూడా. మరి జగన్‌ హెచ్చరికలకు ఇకనైనా సదరు మంత్రులు అలర్ట్‌ అవుతారా.? పదవులకు ఆపద కొని తెచ్చుకుంటారా.? వేచి చూడాలి.