వైసీపీకి హైపర్ ఆది సలహా.! శాఖలన్నీ ఎత్తేయండి.!

జనసేన పార్టీ నుంచి వచ్చే ఎన్నికల్లో సినీ నటుడు, రచయిత, కమెడియన్ హైపర్ ఆది పోటీ చేయబోతున్నాడా.? సినీ నటుడిగా కాదు, జనసేన అభ్యర్థిగా మీ ముందుకు వచ్చానంటూ ‘హైపర్ ఆది’ ఎందుకు వ్యాఖ్యానించాడు.?

ఆ సంగతి పక్కన పెడితే, జనసేన యువశక్తి పేరుతో జనసేన పార్టీ ఉత్తరాంధ్రలోని రణస్థలంలో ఓ భారీ బహిరంగ సభ నిర్వహించింది. ఈ కార్యక్రమంలో హైపర్ ఆది సెంటర్ ఆఫ్ ఎట్రాక్షన్‌గా నిలిచాడు. కామెడీ పంచ్‌లు వేయడంలో దిట్ట అయిన హైపర్ ఆది, యువశక్తి వేదికగా, పొలిటికల్ పంచ్ డైలాగులు పేల్చాడు.

‘మీకెందుకు అన్ని శాఖలు.. మొత్తం అన్నిటినీ ఎత్తేయండి.. పవన్ కళ్యాణ్‌ని తిట్టే శాఖ ఒకటి పెట్టుకోండి..’ అంటూ వైసీపీకి హైపర్ ఆది ఓ సలహా ఇచ్చేశాడు. ‘పవన్ కళ్యాణ్ ప్రజల ప్రేమకు లొంగుతారేమోగానీ.. డబ్బుకి లొంగరు..’ అంటూ ప్యాకేజీ విమర్శలపై హైపర్ ఆది చేసిన వ్యాఖ్యలు సర్వత్రా చర్చనీయాంశమవుతున్నాయి.

‘రెండు చోట్లా పవన్ కళ్యాణ్ ఓడిపోయారంటున్నారు.. ఓడిపోయిన పవన్ కళ్యాణ్ ఇంతలా జనానికి సేవ చేస్తోంటే.. ఆ పవన్ కళ్యాణ్ గెలిస్తే, కష్టం సామాన్యుల గడపను సైతం తాకనివ్వరు..’ అంటూ హైపర్ ఆది ఉద్వేగంగా ప్రసంగించాడు.

జనసేన పార్టీకి మొదటి నుంచీ హైపర్ ఆది మద్దతిస్తూ వస్తున్నాడు. ఈ క్రమంలో కొంత పొలిటికల్ హీట్ కూడా ఎదుర్కొన్నాడు హైపర్ ఆది. అయినాగానీ, పవన్ కళ్యాణ్ మీద వీరాభిమానాన్ని మాత్రం ఎప్పుడూ చాటుకుంటూనే వున్నాడు.

‘కష్టపడితే ఎవరికైనా ప్రపంచంలో ఎంత గొప్ప పదవి అయినా వస్తుంది.. కానీ, పవన్ కళ్యాణ్ అనే పదవి ఆయనకు తప్ప ఇంకెవరికీ దక్కదు..’ అంటూ పవన్ కళ్యాణ్ గొప్పతనాన్ని తనదైన స్టయిల్లో చెప్పాడు హైపర్ ఆది.

‘డబ్బు మీద ఆశలేని వ్యక్తి పవన్ కళ్యాణ్.. జనసేనను గెలిపిస్తే, ప్రజాధనం ఒక్క పైసా కూడా వృధా కాకుండా చేస్తారు. రికార్డుల కోసం, సంపాదన కోసం ఏ హీరో అయినా సినిమాలు చేస్తాడు.. రైతుల కన్నీళ్ళు తుడవడానికి పవన్ కళ్యాణ్ సినిమాలు చేస్తున్నారు..’ అని హైపర్ ఆది అనగానే.. ఆ ప్రాంగణం ‘జై పవన్ కళ్యాణ్’ అనే నినాదాలతో మార్మోగింది.

‘ఇక్కడికి వచ్చినవారు బతుకు మీద భయంతో.. జనసేన మీద నమ్మకంతో వచ్చారు.. బీరు, బిర్యానీ మీద ఆశతో వచ్చినవాళ్ళు కాదు..’ అంటూ హైపర్ ఆది వ్యాఖ్యానించడం గమనార్హం.