అమరావతిపై వైఎస్‌ జగన్‌ సర్కార్‌కి హైకోర్టు అక్షింతలు

రాష్ట్ర రాజధాని అమరావతి నిర్మాణానికి సంబంధించి చంద్రబాబు హయాంలో తెరపైకొచ్చిన ‘స్విస్‌ ఛాలెంజ్‌’ విధానంపై హైకోర్టులో విచారణ జరుగుతోంది. ఈ సందర్భంగా న్యాయమూర్తి చేసిన వ్యాఖ్యలు సర్వత్రా చర్చనీయాంశమవుతున్నాయి. ‘హైకోర్టుకి సంబంధించి చాలా సమస్యలున్నాయి.. కారు పార్కింగ్‌కీ సరైన వసతుల్లేవు.. హైకోర్టు పరిసరాల్లో టీ దొరకని పరిస్థితి కన్పిస్తోంది..’ అంటూ న్యాయస్థానం తీవ్రమైన వ్యాఖ్యలు చేసింది. ‘

మీరు చేస్తారా.? మీతో పనులు చేయించాలా.?’ అని రాష్ట్ర ప్రభుత్వాన్ని న్యాయస్థానం ప్రశ్నించింది. ఈ అంశంపై చర్చ సందర్బంగా వైసీపీ నేత ఒకరు నిర్లక్ష్యపూరితమైన వ్యాఖ్యలు చేశారు. ‘హైకోర్టుకీ అడ్మినిస్ట్రేషన్‌ వుంటుంది.. టీ అనేది ప్రభుత్వం ఇచ్చేది కాదు కదా.. వాళ్ళే సమకూర్చుకోవాలి..’ అని వైసీపీ నేత వ్యాఖ్యానిస్తే, ‘అదే విషయాన్ని అఫిడవిట్‌ రూపంలో కోర్టుకు తెలపండి..’ అంటూ టీడీపీ నేత మండిపడ్డారు.

రాజధాని అంటే రాష్ట్ర ప్రజల ఆత్మగౌరవం. అలాంటి రాజధాని విషయంలో ‘అమరావతా.? హైమావతా.?’ అంటూ మంత్రి బొత్స సత్యనారాయణ చేసిన వెటకారంతోనే, ప్రభుత్వానికి రాజధానిపై వున్న చిత్తశుద్ధి ఏంటో అర్థమయిపోయింది. చంద్రబాబు హయాంలో అమరావతికి పూర్తిస్థాయిలో ఆమోదం తెలిపిన అప్పటి ప్రతిపక్షం వైఎస్సార్‌ కాంగ్రెస్‌ పార్టీ, ఇప్పుడు అధికారంలోకి రాగానే.. అమరావతిపై విషం చిమ్ముతోంది.

హైకోర్టు అక్షింతలతో అయినా, వైఎస్‌ జగన్‌ సర్కార్‌లో చలనం వస్తుందా.? అసలంటూ హైకోర్టునే రాయలసీమకు తరలించాలనే డిమాండ్లపై రాష్ట్ర ప్రభుత్వం ఎలా స్పందిస్తుంది.? రాజధానిపై కమిటీ.. అంటూ మరింతగా అమరావతిని భ్రస్టుపట్టించాలనే ప్రయత్నం ముందు ముందు వైసీపీకి రాజకీయంగా ఎలాంటి ఇబ్బందుల్ని తెచ్చిపెట్టబోతోంది.? ఈ ప్రశ్నలకు సమాధానం ఇప్పుడప్పుడే దొరికేలా కన్పించడంలేదు. ఈలోగా, అమరావతి ఇమేజ్‌ని మరింత నాశనం చేయడమే పనిగా పెట్టుకున్నట్లున్నారు వైసీపీ నేతలు.