గ్లామర్‌ గెలిచేనా.. ఎంపీలు అయ్యేనా?

చట్టసభలకు ఒకప్పుడు గ్లామర్‌ అంతగా పనికొచ్చేది కాదు. కానీ రానురాను పార్టీలు కూడా గ్లామర్‌ను ఎక్కువగా నమ్ముకుంటున్నాయి. పార్టీలతో సంబంధం లేకుండా ఎవరికి వారు కాస్తా పేరున్న నటులను రాజకీయాల్లోకి తీసుకొచ్చి తమకు కాసిన్ని ఓట్లు రాలేలా చేసుకుంటున్నాయి. దానికి వారికి సముచిత స్థానాన్ని ఇవ్వడం లేదా ఇతరత్రా తాయిలాలతో లాక్కుంటున్నారు. కొంతమంది నేతలు ఊరికే ప్రచారం చేస్తేచాలు కనీసం మన సభలకు జనాలు వస్తారు అనేవారు లేకపోలేదు. వీరందరికీ భిన్నంగా కొందరు మహిళామణులు చట్టసభల్లోకి గ్లామర్‌తో ఎంటర్‌ అవుతున్నారు. వీరికి ప్రజాధరణ మాత్రం అంతంతం మాత్రమే అని చెప్పవచ్చు. కేవలం ఒకసారి చూసి ఆ తరువాత పక్కన పెడుతున్న సందర్భాలు అనేకం ఉన్నాయి. అలాంటి వారిలో కొందరు మహిళామణులు ఏటికి ఎదురీదుతూ ఉన్నారు. వారిలో ఒక్కోక్కరి గురించి చర్చిద్దాం..!

జయప్రదంగా అడుగుపెట్టేనా?

అలనాటి గ్లామరస్‌ హీరోయిన్‌ తెలుగమ్మాయి జయప్రద గురించి తెలియని వారుండరు. నాటి అగ్ర హీరోలందరితో ఆమె నటించి మెప్పించింది. అమర్‌సింగ్‌ ప్రోద్భలంతో ఉత్తరప్రదేశ్‌ రాజకీయాల్లోకి అడుగుపెట్టిన జయప్రద ఎస్పీ పార్టీ తరపున ఎంపీగా గతంలో గెలిచారు. తదనంతర పరిణామాలతో అమర్‌సింగ్‌ బయటికి రావడంతో జయప్రద కూడా బయటికి రాక తప్పలేదు. ఆ తరువాత చాలా పార్టీల గడపలు తొక్కినా ఎక్కడా వర్కౌట్‌ కాలేదు. చివరికి బీజేపీలో చేరి ప్రస్తుతం గతంలో ఆమె ప్రాతినిథ్యం వహించిన రాంపూర్‌ పార్లమెంట్‌ స్థానం నుంచి పోటీ పడుతున్నారు. రెండు ప్రధానా పార్టీలు అక్కడ ఒకటి కావడంతో జయప్రద గెలుపు చాలా కష్టం అనే అభిప్రాయం ఉంది. చూడాలి మరి ఈ గ్లామర్‌ ఎంతమాత్రం పనిచేస్తుందో.

అంబరీష్‌ సెంటిమెంట్‌పై గెలిచేనా?

మరో తెలుగు తార సుమలత. చాలా భాషల్లో హీరోయిన్‌గా ఒక వెలుగు వెలిగిన సుమలత కన్నడింటి కోడలు అయ్యింది. తన సహనటుడు కన్నడ స్టార్‌ హీరో అంబరీష్‌ను ప్రేమించి పెళ్లి చేసుకుంది సుమలత. కాంగ్రెస్‌ పార్టీకి చిరకాలం పాటు సేవచేసిన అంబరీష్‌ మంత్రిగా కూడా సేవలు అందించారు. మొన్నటి ఎన్నికల్లో పోటీ చేయకుండా జేడీఎస్‌కు లోపాయికారిగా మద్ధతు ప్రకటించడంతో కాంగ్రెస్‌కు అక్కడ ధారుణ ఫలితాలు వచ్చాయి. అంబరీష్‌ ఇటీవలే ఆకస్మికంగా మరణించడంతో సుమలత ఇండిపెండెంట్‌గా మండ్యా నుంచి ఎంపీగా బరిలో నిలిచారు.

కన్నడ చిత్ర పరిశ్రమ అంతా సుమలతకు బాసటగా నిలిచింది. ప్రత్యర్థిగా కుమారస్వామి తనయుడు నిఖిల్‌గౌడ బరిలో ఉన్నారు. పొత్తులో భాగంగా కాంగ్రెస్‌ అక్కడ పోటీ చేయడంలేదు. చివరికి బీజేపీ కూడా సుమలతకు మద్ధతు ప్రకటించింది. కాంగ్రెస్‌ నేతలు కూడా లోపాయికారిగా సుమలతకు మద్ధతునిస్తున్నారు. గౌడ సామాజిక వర్గానికి చెందిన ఇద్దరు బలమైన అభ్యర్థులు బరిలో ఉన్నా.. కేవలం తండ్రి చాటు బిడ్డగా బరిలో నిలిచిన హీరో నిఖిల్‌గౌడ సుమలతకు ఏమాత్రం పోటీఇచ్చే పరిస్థితి లేదని అంటున్నారు.

డ్రీమ్‌గర్ల్‌ పరిస్థితేంటో..!

హిందీ చిత్ర పరిశ్రమలో డ్రీమ్‌గర్ల్‌గా పేరుతెచ్చుకున్న హేమమాలిని ప్రస్తుతం విపత్కర పరిస్థితిని ఎదుర్కుంటున్నారు. మథుర నుంచి గతంలో ఎంపీగా బంపర్‌ మెజారిటీతో నెగ్గిన హేమమాలిని కేంద్రంలో బాగానే పలుకుబడి సంపాధించారు. గెలిచిన తరువాత తమ నియోజకవర్గానికి ఒక్కసారి కూడా రాకపోవడం. అక్కడి ప్రజల కష్టాలను అసలు పట్టించుకోకపోవడం పెద్ద మైనస్‌గా నిలుస్తున్నాయి. బీజేపీ గాలిమీద గెలిచిన హేమమాలిని.. కనబడుటలేదు అని పోలీస్‌ స్టేషన్‌లో కేసులు కూడా పెట్టారు. ఇటీవలే ఆమె చేసిన ఒక పోస్ట్‌ విపరీతంగా ట్రోలింగ్‌కు గురి అయ్యింది. మరి ఈసారి ఈమె అదృష్టం ఎలా ఉంటుందో చూడాలి.

వర్మ హీరోయిన్‌ కొత్తగా కొంగొత్తగా

దర్శకుడు రామ్‌ గోపాల్‌వర్మ తమ సినిమాల్లో చాలావరకు గ్లామర్‌గా చూపించిన హీరోయిన్‌ ఊర్మిల. ప్రసుత్తం కాంగ్రెస్‌ పార్టీ నుంచి ముంబయ్‌ నార్త్‌ నుంచి బరిలో ఉన్నారు. తమ బొద్దుబొద్దు మాటలతో జనాన్ని బాగానే ఆకట్టుకుంటున్నారు. ఇటీవలే నామినేషన్‌ సందర్భంగా కోట్ల రూపాయల ఆస్తులు ప్రకటించడంతో ఒక్కసారిగా ఊర్మిల వార్తల్లో హైలెట్‌గా నిలిచారు. కాంగ్రెస్‌ పార్టీకి చాలాసానుకూల నియోజకవర్గం కావడం.. గతంలో ఇదే నియోజవర్గం నుంచి బాలీవుడ్‌ హీరో గోవింద గెలవడంతో.. కాంగ్రెస్‌ ఈసారి ఈ గ్లామర్‌ హీరోయిన్‌ను పోటీకి దింపింది. కాంగ్రెస్‌ అనుకూల నియోజకవర్గం కావడంతో ఊర్మిల ఖచ్చితంగా గెలిచే అవకాశం ఉందని అంటున్నారు.

ఇంకా చాలామంది తారలు పోటీలో ఉన్నా వీరి విషయంలోనే వార్తలు ప్రస్తుతం హల్‌చల్‌ చేస్తున్నాయి. చూడాలి మరి ఎవరు తమసత్తా చాటుతారో..!