గంటా, అవంతి.. ఒకే వేదికపైన.. ఏం జరుగుతోందబ్బా.?

మాజీ మంత్రి గంటా శ్రీనివాసరావు తెలుగుదేశం పార్టీలోనే వున్నారా.? అన్న ప్రశ్నకు సరైన సమాధానం దొరకడంలేదు. సాంకేతికంగా చూసుకుంటే ఆయన ప్రస్తుతానికి టీడీపీ ఎమ్మెల్యేగానే వున్నారు. అయితే, విశాఖ స్టీల్ ప్లాంట్ ప్రైవేటీకరణను నిరసిస్తూ ఆయన ఇటీవల తన ఎమ్మెల్యే పదవికి రాజీనామా చేస్తూ, స్పీకర్ తమ్మనేని సీతారాంకి రాజీనామా లేఖను పంపిన విషయం విదితమే.

తాజాగా మరోమారు విశాఖ స్టీల్ ప్లాంట్ ప్రైవటీకరణకు వ్యతిరేకంగా పోరాడుతున్న జేఏసీ సమక్షంలో.. స్పీకర్ ఫార్మాట్‌లో రాజీనామా చేస్తూ, ఆ లేఖని మీడియాకి చూపించారు గంటా శ్రీనివాసరావు. మరోపక్క, వైసీపీ నేత.. మంత్రి అవంతి శ్రీనివాస్‌తో కలిసి వేదికను పంచుకున్నారు గంటా శ్రీనివాస్.

ఒకప్పుడు గంటా, అవంతి.. తెలుగుదేశం పార్టీలో మిత్రులే. గంటా, అవంతి కలిసే వైసీపీలోకి వెళ్ళాలనుకున్నారుగానీ, గంటా చేరిక ఆలస్యమయ్యింది.. అవంతికి అదృష్టం కలిసొచ్చింది. ఇద్దరూ వేర్వేరు పార్టీల నుంచి గెలిచారు. అవంతి మంత్రి అయ్యారు. ఒకవేళ గంటా, వైసీపీలో చేరి వుంటే అవంతికి మంత్రిగా ఛాన్స్ దక్కి వుండేది కాదేమో.

పార్టీ ఫిరాయించేందుకు గంటా చాలా ప్రయత్నాలు చేస్తే, అవంతి ఆ ప్రయత్నాల్ని అడ్డుకున్నారు కూడా. కానీ, పొలిటికల్ ఈక్వేషన్స్ మారాయి. సీపీఐ నారాయణ, అటు మంత్రి అవంతి, ఇటు మాజీ మంత్రి గంటాను కలిపారు. ఇద్దరూ కలిసి చంద్రబాబు, వైఎస్ జగన్‌ని కలపాలనీ, విశాఖ ఉక్కు పరిశ్రమ ప్రైవేటీకరణకు వ్యతిరేకంగా జగన్, చంద్రబాబు ఒకే వేదికపైకి వచ్చేలా చూడాలంటూ గంటా, అవంతిలకు సూచించారు నారాయణ.

ఆత్మీయ పలకరింపులు లేకపోయినా, మొహమాటంగానే అయినా గంటా, అవంతి కలుసుకోవడం రాజకీయ వర్గాల్లో హాట్ టాపిక్ అయ్యింది. విశాఖ నగరంలో ఈ కలయిక రాజకీయంగా చర్చనీయాంశమయ్యింది. గంటాను అవంతి, వైసీపీలోకి ఆహ్వానిస్తారా.? లేదంటే, ఇద్దరూ కలిసి టీడీపీ వైపు వెళతారా.? వేరే ఆలోచన ఏమైనా ఈ ఇద్దరూ చేస్తారా.? అంటూ విశాఖలో అవంతి – గంటా కలయికపై ఆసక్తకిరమైన చర్చ జరుగుతోంది.

అయితే, ఉద్యమ వేదికలపై ఇలాంటి కలయికలు మామూలే. ఆ మాటకొస్తే, ప్రైవేటు కార్యక్రమాల్లోనూ ఇలాంటి కలయికలు జరుగుతుంటాయి. మధ్యలో ఆయా పార్టీల మద్దతుదారులే వెర్రి వెంగళప్పలయిపోతుంటారు.