ఏపీలో విదేశీ విద్యకు మంగళమేనా?

ఆంధ్రప్రదేశ్ ప్రభుత్వం గురువారం అట్టహాసంగా జగనన్నవిద్యాకానుక ప్రారంభించింది. ఈ పథకం కింద ప్రభుత్వ పాఠశాలల్లో చదివే విద్యార్థులకు కిట్లు అందజేస్తారు. ఇదే సమయంలో పేద, మధ్యతరగతి విద్యార్థుల విదేశీ కలలపై నీళ్లు పోసేలా తీసుకున్న నిర్ణయం వెలుగులోకి వచ్చింది. విదేశీ విద్య పథకం కింద కొత్తగా విద్యార్థుల ఎంపిక ప్రక్రియను నిలిపివేయాలని ఇటీవల ఆదేశించింది. ఈ పథకాన్ని పూర్తిగా సమీక్షించాలని నిర్ణయం తీసుకుంది. ఇప్పటివరకు ఈ పథకం కింద లబ్ధి పొందినవారు ఏం చేస్తున్నారు వంటి వివరాలు సేకరించాలని ఆదేశించింది. దీంతో ఈ పథకంపై నీలినీడలు కమ్ముకున్నాయి.

విదేశాలలో చదువుకోవాలనే విద్యార్థులకు ఆర్థిక సహాయం అందించే లక్ష్యంతో 2013లో ఈ పథకాన్ని ప్రారంభించారు. తొలుత ఎస్సీ, ఎస్టీ విద్యార్థుల కోసం దీనిని ప్రారంభించగా.. 2014లో బీసీ, ఈబీసీ, కాపు విద్యార్థులకు కూడా దీనిని వర్తింపజేశారు. అమెరికా, బ్రిటన్, ఆస్ట్రేలియా సింగపూర్, కెనడా, రష్యా, ఫ్రాన్స్ తదితర 15 దేశాల్లో పీజీ, పీహెచ్ డీ, ఎంబీబీఎస్ చదువుకోవాలనుకునే అర్హులైన విద్యార్థులకు ఈ పథకం కింద ఆర్థిక సహాయం అందజేస్తారు. ఎస్సీ, ఎస్టీ, బీసీ, మైనారిటీలకు రూ.15 లక్షలు.. ఈబీసీ, కాపు, ఇతరులకు రూ.10 లక్షల చొప్పున ఇస్తారు. ఇప్పటివరకు దాదాపు 4500 మంది ఈ పథకం కింద లబ్ధి పొందారు.

ఈ నేపథ్యంలో ఈ పథకం అమలుపై సర్కారు సమీక్షించాలని నిర్ణయం తీసుకోవడంతో.. ఇక దీని కొనసాగింపు ఉంటుందా లేదా అనే సందేహాలు నెలకొన్నాయి. ఇప్పటికే పలు సంక్షేమ పథకాల కోసం భారీగా వెచ్చిస్తున్న సర్కారు.. లోటు బడ్జెట్ లో ఉంది. దీంతో ఎక్కడ ఖర్చులు తగ్గించడానికి అవకాశం ఉందో చూసే క్రమంలోనే ఈ నిర్ణయం తీసుకుని ఉంటుందని అంటున్నారు.

అయితే, ఒక్క విద్యార్థికే లక్షలు ఇచ్చేకంటే.. ఆ మొత్తంతో ప్రభుత్వ పాఠశాలల్లో సౌకర్యాలు మెరుగుపరిస్తే, ఎక్కువ మందికి లబ్ధి కలుగుతుంది కదా అని వైసీపీ వర్గాలు వ్యాఖ్యానిస్తున్నాయి. మొత్తానికి విదేశీ విద్య పథకానికి మంగళం పాడేస్తారా లేక కొంతకాలం తర్వాత కొనసాగిస్తారా అనే అంశంపై భిన్నమైన వాదనలు వినిపిస్తున్నాయి. ఇక ఈ పథకం కొనసాగింపు కష్టమే అని కొందరు అధికారులు పేర్కొంటున్నారు.