తెలుగు సినిమాపై 90వ దశకంలో ఫ్యామిలీ హీరోగా తనదైన ముద్ర వేసారు జగపతిబాబు. సెకండ్ ఇన్నింగ్స్ లో క్యారెక్టర్ ఆర్టిస్ట్, విలన్ గా తన సత్తా చాటుతున్నారు. అయితే.. ఇప్పుడు తన అభిమానుల విషయంలో కాస్తంత హర్ట్ అయ్యారు. ఇకపై అభిమాన సంఘాలు, ట్రస్టులకు తనకు సంబంధంలేదని ఓ ప్రకటనలో తెలిపారు.
‘అందరికీ నమస్కారం.. 33ఏళ్లుగా కుటుంబం శ్రేయోభిలాషుల్లా నా అభిమానులు కూడా నా పెరుగుదలకి ముఖ్య కారణమని భావించాను. వారి ఫ్యామిలీ కష్టసుఖాల్లో కూడా పాలు పంచుకుని నావంతు సాయం చేశాను. అభిమానులంటే అభిమానం, ప్రేమ ఇచ్చేవాళ్లని మనస్ఫూర్తిగా నమ్మాను. కానీ.. కొందరు అభిమానులు ప్రేమ కంటే ఆశించడం ఎక్కువ కావడం బాధిస్తోంది’.
‘నన్ను ఇబ్బంది పెట్టే పరిస్థితికి తీసుకొచ్చారు. మనసు ఒప్పుకోకపోయినా బాధతో చెప్తున్నాను.. ఇకపై నా అభిమాన సంఘాలకు, ట్రస్టులకు నాకూ ఎటువంటి సంబంధం లేదు. వాటి నుంచి విరమించుకుంటున్నాను. కానీ.. నన్ను ప్రేమించే అభిమానులకు ఎప్పుడూ తోడుగానే ఉంటాను’ అని పేర్కొన్నారు.