వైసీపీ చెప్పినట్టే ఈసీ చేస్తోంది: చంద్రబాబు

ఏపీలో పోలింగ్ కు ఇంకా కొన్ని గంటల సమయం మాత్రమే ఉన్న నేపథ్యంలో టీడీపీ అధినేత చంద్రబాబు ఎన్నికల సంఘంపై సమరశంఖం పూరించారు. తెలుగుదేశం పార్టీ లక్ష్యంగా ఈసీ నిర్ణయాలు తీసుకుంటోందని ఆరోపించారు. వైఎస్సార్ సీపీ చెప్పినట్టుగా ఈసీ వ్యవహరిస్తోందని విమర్శించారు. బుధవారం మధ్యాహ్నం ఆయన సచివాలయానికి వచ్చి రాష్ట్ర ఎన్నికల ప్రధాన కమిషనర్ గోపాలకృష్ణ ద్వివేదీని కలిశారు. ఎన్నికల సంఘం వ్యవహరిస్తున్న తీరును నిరసిస్తూ ఆయనకు ఫిర్యాదు చేశారు. ఈ మేరకు ద్వివేదికి వినతి పత్రం అందజేశారు. కేంద్ర ఎన్నికల సంఘం ఏకపక్షంగా వ్యవహరిస్తోందని అందులో పేర్కొన్నారు.

అనంతరం మీడియాతో మాట్లాడుతూ.. ప్రధాని మోదీ, ఎన్నికల సంఘం, వైఎస్సార్ సీపీపై ఆరోపణలు చేశారు. ఇష్టానుసారంగా ఐపీఎస్ అధికారులను బదిలీ చేస్తున్నారని విమర్శించారు. ఇప్పటికే రాష్ట్రంలో నలుగురు ఐపీఎస్ అధికారులను బదిలీ చేశారని, తాజాగా ప్రకాశం జిల్లా ఎస్పీని బదిలీ చేశారని మండిపడ్డారు. ఈ బదిలీల వెనుక కుట్రకోణం ఉందని ఆరోపించారు. వైఎస్సార్ కాంగ్రెస్ పార్టీ చెప్పినట్టుగా చేయాలని ప్రధాని ఆదేశించారని, దీంతో ఈసీ అలాగే చేస్తోందని ఆరోపణలు చేశారు.

వైఎస్సార్ సీపీ ఫిర్యాదులపై ఎలాంటి విచారణ జరపకుండానే బదిలీలు ఎలా జరుపుతారని ప్రశ్నించారు. ఈసీ వ్యవహారం రాజ్యాంగ విరుద్ధంగా ఉందని ఆరోపించారు. ఇలాంటి చర్యల ద్వారా ఈసీ చులకన కాకూడదన్నారు. ప్రజాస్వామ్యం అపహాస్యం అవుతుంటే చూస్తూ కూర్చోలేమని వ్యాఖ్యానించారు. తాము ఫిర్యాదు చేస్తే కనీస స్పందన లేదని, కానీ వైఎస్సార్ సీపీ ఫిర్యాదు చేస్తే గంటల్లోనే పనులు జరుగిపోతున్నాయని దుయ్యబట్టారు. ఆళ్లగడ్డలో నోట్టు విసురుతున్నారని టీడీపీ ఫిర్యాదు చేస్తే ఏం చర్యలు తీసుకున్నారని ప్రశ్నించారు. కేంద్ర ఎన్నికల సంఘం ఏకపక్షంగా వ్యవహరిస్తోందని పేర్కొంటూ 65 మంది రిటైర్డ్ అధికారులు రాష్ట్రపతికి ఫిర్యాదు చేశారంటే పరిస్థితి ఎలా ఉందో అర్థం చేసుకోవచ్చని చంద్రబాబు వ్యాఖ్యానించారు.

మీడియాతో మాట్లాడిన అనంతరం చంద్రబాబు సచివాలయంలోని ఐదో బ్లాక్ ఎదుట ధర్నా చేశారు. ఐదు నిమిషాలపాటు అక్కడే ఆందోళన నిర్వహించిన తర్వాత వెళ్లిపోయారు. అయితే, చంద్రబాబు చర్యను వైఎస్సార్ సీపీ ఖండించింది. రాష్ట్రంలో శాంతిభద్రతల సమస్య సృష్టించి ఎన్నికల్లో అక్రమాలకు పాల్పడాలనే యోచనలో చంద్రబాబు ఉన్నారని ఆరోపించింది. ఈ మేరకు ఆ పార్టీ నేత నాగిరెడ్డి ఎన్నికల ప్రధాన అధికారి గోపాలకృష్ణ ద్వివేదిని కలిసి ఫిర్యాదు చేశారు. చివరి నిమిషంలో చంద్రబాబు కుట్రలకు తెరలేపుతున్నారని, ఎన్నికలు ప్రశాంత వాతావరణంలో జరిగేలా చర్యలు తీసుకోవాలని కోరారు.