దుబ్బాక, గ్రేటర్‌ ఎఫెక్ట్‌: కేసీఆర్‌ మారిన మనిషి.!

రాజకీయాల్లో అన్నిసార్లూ తాము అనుకున్నట్లుగానే అంతా జరుగుతుందనుకుంటే పొరపాటే. ఉద్దేశ్యం మంచిదే అయినా, ఆయా నిర్ణయాలు తీసుకునేటప్పుడు ఎదురయ్యే ప్రజా వ్యతిరేకతను ప్రభుత్వాలు పరిగణనలోకి తీసుకోవాల్సిందే.

తెలంగాణ లో నియంత్రిత సాగు విషయమై తీవ్రస్థాయిలో విమర్శలు వెల్లువెత్తిన విషయం విదితమే. ప్రభుత్వం సూచించిన పంటల్ని మాత్రమే రైతులు వేయాలంటూ కొన్నాళ్ళ క్రితం కేసీఆర్‌ సర్కార్‌ హుకూం జారీ చేసింది. మార్కెట్‌ స్థితిగతులు, ప్రకృతి ప్రకోపాలు.. ఇలాంటి అన్ని అంశాల్నీ పరిగణనలోకి తీసుకుని, రైతులకు సూచనలు, సలహాలు చేయడం ఫర్లేదుగానీ, వ్యవసాయాన్ని తమ నియంత్రణలోకి తెచ్చుకోవాలని పాలకులు అనుకుంటే అది కుదరని పని.

ప్రభుత్వం, తమను ఇబ్బందులు పెడుతోందన్న నిర్ణయానికి రైతులు వచ్చేశారు. ఆ ఎఫెక్ట్‌ దుబ్బాక ఉప ఎన్నిక సందర్భంగా గట్టిగానే కనిపించింది. దానికి తోడు, గ్రేటర్‌ ఎన్నికల్లోనూ టీఆర్‌ఎస్‌కి షాక్‌ తగిలే ఫలితాలు వచ్చాయి. దాంతో, తమ నిర్ణయాల విషయమై పునఃసమీక్షించుకోవడానికి కేసీఆర్‌ వెనుకంజ వేయలేదు. భూముల రిజిస్ట్రేషన్ల వ్యవహారంపైనా వెనక్కి తగ్గారు. కొత్త విధానాన్ని తాత్కాలికంగా పక్కన పెట్టారు. ఇంకోపక్క, వ్యవసాయంపై నియంత్రణా లేదని తేల్చేశారు కేసీఆర్‌.

తప్పదు.. రాజకీయ పరిస్థితులు తెలంగాణలో టీఆర్‌ఎస్‌కి వ్యతిరేకంగా కనిపిస్తున్నాయి. ఈ తరుణంలో ఒక్క చిన్న ‘తేడా నిర్ణయం’ అయినా.. పార్టీకి, ప్రభుత్వానికి తీరని నష్టమే కలిగిస్తుంది. నిజానికి, కేసీఆర్‌ కాస్త ఆలస్యంగా తేరుకున్నారు. ప్రజా వ్యతిరేకత గురించి ఇంటెలిజెన్స్‌ రిపోర్ట్స్‌ తెప్పించుకోవడంలో వైఫల్యం చెందారో ఏమోగానీ.. కాస్త ఆలస్యంగా కళ్ళు తెరిచేసరికి.. జరగాల్సిన నష్టం జరిగిపోయింది.

మరిప్పుడు, డ్యామేజీ కంట్రోల్‌ చర్యలతో టీఆర్‌ఎస్‌కీ, టీఆర్‌ఎస్‌ సర్కార్‌కీ కాస్తంతైనా రాజకీయంగా ఉపశమనం కలుగుతుందా.? ఏమో, అదైతే ప్రస్తుతానికి సస్పెన్సే. ఒక్కటి మాత్రం నిజం.. కేసీఆర్‌ మారిన మనిషి. ఆయన్ని దుబ్బాక ఉప ఎన్నిక, గ్రేటర్‌ ఎన్నికల ఫలితాలు మార్చేశాయని నిస్సందేహంగా చెప్పొచ్చు.