గుడ్ న్యూస్: డీఆర్‌డీవో అభివృద్ధి చేసిన కరోనా వ్యాక్సిన్ కు డీసీజీఐ అనుమతి

కరోనా బాధితులకు గుడ్ న్యూస్. కరోనా చికిత్సలో భాగంగా మరో వ్యాక్సిన్ అందుబాటులోకి వచ్చింది. దీనిని భారత రక్షణ రంగ సంస్థ డీఆర్డీఓ.. డాక్టర్ రెడ్డీస్ ఆధ్వర్యంలో ఈ డ్రగ్ అభివృద్ధి చేసింది. ఈ వ్యాక్సిన్ కు డ్రగ్ కంట్రోలర్ జనరల్ (డీసీజీఐ) అనుమతి కూడా ఇవ్వడం విశేషం. ఈ వ్యాక్సిన్ ‘2డీయాక్సీ గ్లూకోజ్’ (2-DG) పేరుతో అందుబాటులోకి రానుంది. దీనిని కరోనా చికిత్స వినియోగానికి డీసీజీఐ అనుమతి లభించిందని.. ఔషధాన్ని విరివిరిగా అందుబాటులోకి తీసుకురావచ్చని రక్షణశాఖ కూడా వెల్లడించింది.

ఈ వ్యాక్సిన్ తో రోగులు వేగంగా కోలుకుంటారని క్లినికల్ ట్రయల్స్ లో వెల్లడైనట్టు తెలిపింది. ఈ 2డీజీ వ్యాక్సిన్ రోగులకు ఆక్సిజన్ అవసరం తగ్గిస్తుందని తెలిపింది. 2-డీజీ వ్యాక్సిన్ ద్వారా చికిత్స పొందిన వారిలో ఎక్కువమందికి ఆర్టీపీసీఆర్ లో నెగెటివ్ రిపోర్ట్ వచ్చిందని కూడా వెల్లడించింది. 2-డీజీ ఔషధం గ్లూకోజ్ రూపంలో పౌడర్ గా ఉంటుందని.. దీనిని నీటిలో కరిగించి నోటి ద్వారా తీసుకోవచ్చని తెలిపింది. వైరస్ ఉన్న భాగాల్లోకి చొచ్చుకెళ్లి వైరస్ ను నిరోధించి పెరుగుదలను నిలువరిస్తుందని డీఆర్డీవో తెలిపింది.

ఇప్పటికే నిర్వహించిన క్లినికల్ ట్రయల్స్ కు అద్భుత స్పందన వచ్చిందని ప్రకటించింది. వీలైనంత త్వరగా ఔషధాన్ని వినియోగంలోకి తీసుకొస్తామని అధికారులు అంటున్నారు. ఐఎన్‌ఎంఏఎస్- డీఆర్‌డీవో శాస్త్రవేత్తలు హైదరాబాద్ సెంటర్ ఫర్ సెల్యులార్ అండ్ మాలిక్యులర్ బయాలజీ (సీసీఎంబీ) సహాయంతో ప్రయోగాలు జరిగాయి. వీటిలో వైరస్‌కు వ్యతిరేకంగా 2డీజీ సమర్థవంతంగా పనిచేస్తోందని తేలింది.

ఈ వ్యాక్సిన్ కు గత  ఏడాది మేలోనే  కోవిడ్ -19 రోగులలో రెండో దశ పరీక్షలకు డీసీజీఐ, సెంట్రల్ డ్రగ్స్ స్టాండర్డ్ కంట్రోల్ ఆర్గనైజేషన్ (సిడిస్కో) అనుమతి ఇచ్చింది. వీటి ఫలితాల ఆధారంగానే డిసెంబర్-2020 – మార్చి-2021 మధ్య 220 మంది రోగులపై మూడో దశ క్లినికల్ ట్రయల్స్ నిర్వహించారు.  ఢిల్లీ, ఉత్తరప్రదేశ్, పశ్చిమ బెంగాల్, రాజస్థాన్, మహారాష్ట్ర, ఆంధ్రప్రదేశ్, తెలంగాణ, కర్ణాటక, తమిళనాడు గుజరాత్‌కు చెందిన 27 కోవిడ్‌ ఆసుపత్రులలో ఈ ప్రయోగాలు విజయవంతంగా జరిగాయి.