వ్యాక్సినేషన్ విషయంలో ఢిల్లీ ప్రభుత్వం కీలక నిర్ణయం

దేశంలో కరోనా కేసులు విపరీతంగా పెరుగుతున్న నేపథ్యంలో ఢిల్లీ ప్రభుత్వం కీలక నిర్ణయం తీసుకుంది. ఇకపై రిజిస్ట్రేషన్లు లేకుండా మధ్యాహ్నం 3 నుంచి రాత్రి 9 గంటల వరకూ వ్యాక్సిన్ ఇచ్చేందుకు నిర్ణయించింది. ఈమేరకు ఆ రాష్ట్ర వైద్యారోగ్య శాఖ మంత్రి సత్యేంద్ర జైన్ ప్రకటన చేశారు. ‘అందరికీ సాంకేతికత ఉపయోగించడం రాకపోవడంతో వ్యాక్సిన్ కోసం కొందరు ఇబ్బంది పడుతున్నారు. అందుకే ఈ నిర్ణయం తీసుకున్నాం. కరోనా వైరస్ ను అరికట్టాలంటే లాక్ డౌన్ పరిష్కారం కాదు.’

‘గతంలో లాక్ డౌన్ విధించిన వైరస్ వ్యాప్తి చెందింది. ఇప్పుడు వ్యాక్సిన్ వచ్చింది. రోజుకు 90వేల పరీక్షలు చేస్తున్నాం. కాంటాక్స్ ట్రేసింగ్ చేసి సంబంధిత వ్యక్తుల్ని ఐసొలేషన్ లో ఉంచుతున్నాం, ఆసుపత్రుల్లో పడకలూ సిద్ధంగా ఉన్నాయి. ఎప్పటికప్పుడు పరిస్థితుల సమీక్షిస్తున్నాం’ అని అన్నారు. 24 గంటల్లో ఢిల్లీలో 1534 పాజిటివ్ కేసులు నమోదయ్యాయి. మొత్తంగా ఢిల్లీలో కోవిడ్ బారిన పడిన వారి సంఖ్య 6,45,276కి చేరుకుంది.