సైకోలా మారిన చిన్నాన్న.. అన్న కొడుకులను ఏం చేశాడంటే..

బాబాయిగా పిలిపించుకున్న సొంత అన్న కొడుకులనే హత్య చేశాడో కసాయి. సైకోలా మారిపోయి చేసిన ఈ దురాగతం ఎవరికీ తెలియనివ్వలేదు. ఇప్పుడు ఏకంగా సొంత అన్ననే చంపాలని ప్రయత్నించాడు. దిగ్భ్రాంతి కలిగించే ఈ సంఘటన ఉత్తరప్రదేశ్ లో జరిగింది.

పోలీసులు తెలిపిన వివరాల ప్రకారం.. ఈ నెల 11న ఈటా జిల్లా ధర్మపూర్ గ్రామానికి చెందిన విశ్వనాధ్ సింగ్ ను అతని తమ్ముడు రాధేశ్యామ్ హత్య చేసేందుకు ప్రయత్నించాడు. విశ్వనాథ్ నిద్రపోతున్న సమయంలో కత్తితో పొడిచి చంపేందుకు ప్రయత్నించాడు. దీనిని గమనించిన విశ్వనాధ్ కుటుంబ సభ్యులు దాడిని అడ్డుకుని రాధేశ్యామ్ ను పట్టుకుని పోలీసులకు అప్పగించారు. అయితే పోలీసు విచారణలో గతంలో అన్న కొడుకులిద్దరినీ కూడా తానే చంపానని చెప్పడంతో షాకవ్వడం పోలీసుల వంతైంది.

విశ్వనాధ్ ఇద్దరు కుమారులైన 6ఏళ్ల సత్యేంద్ర ఫిబ్రవరిలో, తమ్ముడు ప్రశాంత్ ఈనెల 9న హత్యకు గురయ్యారు. ఆరె నెలల వ్యవధిలో హత్యకు గురవడం సంచలనం రేపింది. ఈ హత్యలపై నిందితుల ఆచూకీ ఇంకా లభ్యం కాలేదు. వీటిపై పోలీసు దర్యాప్తు కొనసాగుతోంది. ఇప్పుడు చిన్నారుల తండ్రిపై రాధేశ్యామ్ హత్యాయత్నం చేయడంతో అసలు విషయమంతా బయటకొచ్చింది.

విచారణలో రాధేశ్యామ్ చెప్పిన విషయాలకు పోలీసులు షాకయ్యారు. తనకు మనుషుల్ని చంపడమంటే ఇష్టమని చెప్పుకొచ్చాడు రాధేశ్యామ్. సత్యేంద్ర, ప్రశాంత్‌లను తానే హత్య చేసినట్టు అంగీకరించాడు. దీంతో గతంలో ఈ కేసులో అనుమానితులుగా అరెస్ట్ చేసిన వారిని విడుదల చేయాలని పోలీసులు నిర్ణయించారు.