కిరాతకం: యువతి దారుణ హత్య.. ప్రేమించట్లేదని నడిరోడ్డుపై నరికేశాడు..

తనను ప్రేమించడంలేదని ఓ యువతిని నడిరోడ్డుపై యువకుడు కత్తితో నరికి చంపిన ఘటన ఆంధ్రప్రదేశ్ లో సంచలనం రేపిన విషయం తెలిసిందే. కాకినాడ జిల్లా పెదపూడి మండలం కాండ్రేగుల-కూరాడ రహదారిపై శనివారం జరిగింది. ఈ ఘటనలో యువతి తీవ్ర గాయాలతో మృతి చెందింది. నిందితుడిని పోలీసులు అదుపులోకి తీసుకున్నారు. ఘటనపై జిల్లా ఎస్పీ రవీంద్రనాధ్ బాబు వివరాలు వెల్లడించారు.

పోలీసు ఉద్యోగం ప్రయత్నిస్తూ..

కరప మండలం కూరాడలో కాదా దేవిక అమ్మమ్మ ఇంటి వద్ద ఉంటూ డిగ్రీ చదువుకుని.. ప్రస్తుతం హెర్బల్ ప్రొడక్స్ట్ లో మార్కెటింగ్ చేస్తూ కానిస్టేబుల్ ఉద్యోగం కోసం ప్రయత్నిస్తోంది. ఈమె తల్లిదండ్రులు హైదరాబాద్ లో కూలీలుగా పని చేస్తూ పెద్ద కుమార్తెను బీటెక్ చదివిస్తున్నారు. వీరిది బీఆర్ అంబేడ్కర్ కోనసీమ జిల్లాలోని పామర్రు మండలం కె. గంగవరం. రంగంపేట మండలం బాలవరానికి చెందిన నిందితుడు సూర్యనారాయణ డిప్లొమా పూర్తి చేసి పోర్టులో ఏడేళ్లు ఔట్ సౌర్సింగ్ లో పని చేసి ప్రస్తుతం ఖాళీగా మేనమామ వి.రామచంద్రరావు ఇంట్లో ఉండేవాడు.

అనుమానం పెంచుకుని..

ఆ సమయంలో వీరిద్దరి మధ్యా ప్రేమించుకుంటున్నారని తెలిసి పెళ్లి చర్చలు జరిగాయి. అయితే.. అతనితో పెళ్లికి దేవిక తల్లిదండ్రులు నిరాకరించారు. నిందితుడి మేనమామ మరోసారి మాట్లాడినా యువతి నిరాకరించింది. దీంతో సూర్యనారాయణను హైదరాబాద్ పంపేశారు. ఇటివలే గ్రామానికి తిరిగొచ్చాడు. అయితే.. మరొకరితో దేవిక సన్నిహితంగా ఉంటుందనే అనుమానాన్ని పెంచుకున్నాడు. దీంతో ఆమెను హత్య చేసేందుకు కుట్ర పన్నాడు. శనివారం దేవిక  మోటర్ సైకిల్ పై కరప వెళ్లి తిరిగొస్తూండగా.. సూర్యనారాయణ ఆమెను అనుసరించి ఎవరూ లేని నిర్మానుష్య ప్రాంతంలో ఆమెను అడ్డగించాడు. తనను ప్రేమించాలని.. పెళ్లి చేసుకోవాలని బలవంతం చేశాడు.

యాసిడ్, కత్తితో బెదిరించి..

ఆమె తిరస్కరించడంతో వెంట తెచ్చుకున్న యాసిడ్, కత్తితో బెదిరించాడు. వెంటనే కత్తితో ఆమె మెడపై బలంగా వేటే వేశాడు. కిందపడి గిలగిలా కొట్టుకుంటున్న దేవిక చేయి, శరీరంపై పలుమార్లు దాడి చేశాడు. సమీపంలోపి పొలాల్లో పని చేస్తున్న కూలీలు గమనించి నిందితుడిని పట్టుకునే ప్రయత్నం చేశారు. తాను పారిపోనని పెళ్లి చేసుకోనని చెప్పడంతో హత్య చేశానని చెప్పాడు. దీంతో కూలీలు నిందితుడిని బంధించి స్థంభానికి కట్టేసి పోలీసులకు సమాచారం ఇచ్చారు. 108 వాహనంలో దేవికను కాకినాడ ఆసుపత్రికి తరలించగా అప్పటికే ఆమె మరణించిందని వైద్యులు ధ్రువీకరించారు. కేసు దర్యాప్తు చేస్తున్నట్టు పోలీసులు తెలిపారు.

సీఎం జగన్ దిగ్భ్రాంతి..

నిందితుడికి ఉరిశిక్ష పడేలా చర్యలు తీసుకోవాలని రాష్ట్ర మహిళా కమిషన్ చైర్ పర్సన్ వాసిరెడ్డి పద్మ పోలీసు అధికారులను ఆదేశించారు. ఏడు రోజుల్లో దర్యాప్తు చేసి చార్జిషీటు దాఖలు చేస్తామని.. నిందితుడిపై రౌడీషీట్ తెరిచి బెయిల్ రాకుండా చట్టపరంగా కఠిన చర్యలు తీసుకుంటామని తెలిపారు. ఘటనపై సీఎం జగన్ తీవ్ర దిగ్భ్రాంతి వ్యక్తం చేశారు. దిశ చట్టం ద్వారా నిందితుడిపై కఠిన చర్యలు తీసుకోవాలని.. బాధిత కుటుంబాన్ని ఆదుకోవాలని సూచించారు. నిందితులు రెడ్ హ్యాండెడ్ గా పట్టుబడిన కేసుల్లో దిశ చట్టం మార్గదర్శకాలు పాటించి నేరస్థులకు కఠిన శిక్ష పడేలా చర్యలు తీసుకోవాలని అన్నారు.