కాపు సమాజంపై ‘కుట్ర’.! అమ్మేదెవడు.? కొనగలిగేదెవడు.?

కాపు సమాజంపై గతంలో ఎన్నడూ లేని విధంగా అత్యంత జుగుప్సాకరమైన కుట్ర జరుగుతోంది. ‘కాపులంటే అమ్ముడుపోయేటోళ్ళు’ అనే ముద్ర వేయడానికి ప్రయత్నాలు జరుగుతున్నాయి. పవన్ కళ్యాణ్ వెంట నడిస్తే, కాపుల్ని గంపగుత్తగా టీడీపీకి అమ్మేస్తారంటూ అధికార వైసీపీకి చెందిన కాపు నాయకులే నినదిస్తున్నారు. కాపు సామాజిక వర్గాన్ని కాపు సామాజిక వర్గ నేతలే చులకనగా చూస్తున్నారనడానికి ఇంతకన్నా నిదర్శనం ఇంకేం కావాలి.?

పవన్ కళ్యాణ్ దగ్గరకు చంద్రబాబు వెళితే, ప్యాకేజీ ఇవ్వడానికి వెళ్ళినట్లు. చంద్రబాబు దగ్గరకి పవన్ కళ్యాణ్ వెళితే ప్యాకేజీ తీసుకుంటున్నట్లు. ఎలా చూసినా, అక్కడ చంద్రబాబుని ఎలివేట్ చేయడం, పవన్ కళ్యాణ్‌ని నీఛంగా చూడటం.. ఇదీ జరుగుతున్న రాజకీయం. దీన్ని ‘రెడ్డి’ రాజకీయం అనొచ్చా.? ఎందుకు అనకూడదు.. జరుగుతున్నది అదే కదా.!

ఇక్కడ ‘కమ్మ’ రాజకీయం కంటే, రెడ్డి రాజకీయమే ప్రస్తుతానికి కాపు సామాజిక వర్గానికి ప్రధాన శతృవుగా మారుతోంది. నిజానికి, ఏ సామాజిక వర్గమూ గంపగుత్తగా ఓ పార్టీ వైపు నిలబడదు. అది జగమెరిగిన సత్యం. కానీ, కేవలం కాపు సామాజిక వర్గం మీదనే నిందలేయడానికి, కమ్మ, రెడ్డి, క్షత్రియ.. ఇలా పలు సామాజిక వర్గాలకు చెందిన ‘కొందరు’ అత్యంత విషపూరితమైన కుట్రకు తెరలేపారు.

వివాదాల రామ్ గోపాల్ వర్మ కూడా కులాల కుంపట్ల గురించి మాట్లాడటం.. పైగా, కమ్మ – కాపు.. అంటూ చంద్రబాబు – పవన్ భేటీపై ‘ఐదు రూపాయల పేటీఎం ట్వీట్’ వేయడం.. పరిస్థితి తీవ్రతకు అద్దం పడుతోంది.

‘ఇప్పుడు కాకపోతే ఇంకెప్పుడు.?’ అని 2009 ఎన్నికల సమయంలో చిరంజీవి ప్రజారాజ్యం పార్టీ పెట్టినప్పుడు కాపు సామాజిక వర్గం, ‘కాపు ముఖ్యమంత్రి’ ఆలోచన చేసింది. దాన్ని, అప్పట్లో పైన చెప్పుకున్న కమ్మ, రెడ్డి రాజకీయం చెడగొట్టడంలో విఫలమైంది. మళ్ళీ ఇప్పుడు, జనసేన విషయంలోనూ అదే జరుగుతోంది.

కాపు సామాజిక వర్గం ఓటు బ్యాంకుని అమ్మేదెవడు.? కొనేంత ధైర్యం ఎవడికి వుంది.? అలాగే ఏ సామాజిక వర్గం ఓటు బ్యాంకు అయినా.. ఇదే సమీకరణం వర్తిస్తుంది. ఏ సామాజిక వర్గాన్నీ ఎవడూ కొనలేడు. కాకపోతే, ఆయా సామాజిక వర్గాల్లోని కొందరు నాయకులు మాత్రం అమ్ముడుపోయే మనస్తత్వం కలిగ వుంటారు. తమ కులాన్ని కించపర్చుకుంటూ మరీ, ఇంకొకరికి బానిసత్వం చేస్తుంటారు. వాళ్ళే సమాజానికి అత్యంత హానికరం.!