మూడు రాజధానులకు చిరంజీవి జై..

ఆంధ్రప్రదేశ్ కు మూడు రాజధానులు ఏర్పాటు చేయాలన్న ప్రతిపాదనకు మెగాస్టార్ చిరంజీవి సంపూర్ణ మద్దతు ప్రకటించారు. అధికార, పరిపాలనా వికేంద్రీకరణతోనే అభివృద్ధి సాధ్యమని పేర్కొన్నారు. రాష్ట్ర సర్వతోముఖాభివృద్ధికి సీఎం జగన్ మోహన్ రెడ్డి ప్రణాళికాబద్ధంగా కృషి చేస్తారన్న నమ్మకం ఉందన్నారు. ఈ మేరకు ఆయన శనివారం ఓ ప్రకటన విడుదల చేశారు.

‘‘ఏపీలో వివిధ ప్రాంతాల అభివృద్ధికై నిపుణుల కమిటీ సిఫార్సులు సామాజిక, ఆర్థిక అసమానతలు తొలగించేవిగా ఉన్నాయి. గతంలో అభివృద్ధి, పాలన అంతా హైదరాబాద్‌లోనే కేంద్రీకృతమైంది. ఉమ్మడి రాష్ట్రంలో మిగతా ప్రాంతాలు నిర్లక్ష్యం కావడం వల్లే ఆర్థిక, సామాజిక సమతుల్యాలు దెబ్బతిన్నాయి. ఇప్పటికే మూడు లక్షల కోట్ల అప్పుల్లో ఉన్న రాష్ట్రంలో ఇంకో లక్ష కోట్ల అప్పుతో అమరావతిని నిర్మిస్తే ఉత్తరాంధ్ర, రాయలసీమ పరిస్థితి ఏంటన్న ఆందోళన అందరిలోనూ ఉంది. సాగు, తాగు నీరు, ఉపాధి అవకాశాలు లేక ఊర్లు విడిచిపోతున్న వలస కూలీల బిడ్డల భవిష్యత్‌కు, నిరుద్యోగులకు మూడు రాజధానుల ప్రతిపాదన భద్రతనిస్తుంది. అయితే ఇదే సమయంలో రాజధాని రైతుల్లో నెలకొన్న భయాందోళనలు, అభద్రతా భావాన్ని తొలగించాలి. అమరావతి ప్రాంత రైతులు నష్టపోకుండా, న్యాయం జరిగేలా చర్యలు తీసుకోవాలి. మూడు రాజధానులపై రాష్ట్రవ్యాప్తంగా ఉన్న అపోహలు, అపార్థాలు తొలగించేందుకు ప్రభుత్వం ప్రయత్నించాలి’’ అని చిరంజీవి పేర్కొన్నారు.

ఇలా మూడు రాజధానులకు చిరంజీవి జైకొట్టడంతో ఆయన సోదరుడు, జనసేన అధినేత పవన్ కల్యాణ్ ఇరకాటంలో పడినట్టయింది. మూడు రాజధానులు రావొచ్చంటూ శాసనసభలో సీఎం జగన్ ప్రకటించగానే పవన్ ట్విట్టర్ వేదికగా విమర్శలు చేశారు. కమిటీ నివేదిక రాకుండా అప్పుడే తొందర ఎందుకని ప్రశ్నించారు. అనంతరం ఈ వ్యవహారంపై ఢిల్లీ పెద్దలకు ఫిర్యాదు చేస్తామని జనసేన నేతలు ప్రకటించారు. ఈ నేపథ్యంలో స్వయంగా చిరంజీవి ఆ ప్రతిపాదనకు మద్దతు ప్రకటించడం జనసేనకు ఇబ్బందికరంగా పరిణమించింది.

ఈ ప్రతిపాదనను వ్యతిరేకించి అటు ఉత్తరాంధ్ర, ఇటు రాయలసీమ ప్రజల విమర్శలను మూటగట్టుకున్న పవన్.. ప్రస్తుతం సైలంట్ గా ఉన్నారు. త్వరలోనే జనసేన సైతం ఈ ప్రతిపాదనకు మద్దతు ప్రకటించక తప్పని పరిస్థితి నెలకొంది. చిరంజీవి స్పందించినట్టుగానే పరిణితితో పవన్ వ్యవహరించి ఉండాల్సిందనే అభిప్రాయాలు వినిపిస్తున్నాయి.

పరిపాలనా వికేంద్రీకరణకు మద్దతు ప్రకటిస్తూ.. అమరావతి రైతులకు అన్యాయం జరగకుండా చూడాలని ప్రకటన విడుదల చేస్తే సరిపోయేదని అంటున్నారు. అలా కాకుండా తొందరపడి టీడీపీ తరహాలో స్పందించడంతో అమరావతిలో మైలేజీ రావడం అటుంచితే.. ఉత్తరాంధ్రలోనూ, రాయలసీమలోనూ విమర్శలు తెచ్చుకున్నారని పేర్కొంటున్నారు.