చంద్రయాన్‌-2: జాబిల్లిపై మన సంతకం.. కాస్సేపట్లో.!

కోట్లు ఖర్చు చేసి చంద్రుడి మీద ఎందుకు ప్రయోగాలు చేయాలి.? తినడానికి దేశంలో చాలామందికి తిండి లేని ప్రస్తుత పరిస్థితుల్లో వందల కోట్లు వెచ్చించి అంతరిక్ష ప్రయోగాలు చేయడం ఎంతవరకు సబబు.? అంతరిక్ష ప్రయోగాలతో భారతదేశానికి అదనంగా ఒనగూడే ప్రయోజనమేంటి.? ఇలా సవాలక్ష ప్రశ్నలున్నాయి. కానీ, అన్ని ప్రశ్నలకూ ఒకటే సమాధానం.! దేశం మీసం మెలెయ్యాల్సిందే.!

అవును, అంతరిక్ష ప్రయోగాల్లో మన ‘సంతకం’ చాలా చాలా ప్రత్యేకం. భారత అంతరిక్ష పరిశోధనా సంస్థ చేపట్టే ప్రతి ప్రయోగం, ప్రపంచ దేశాలు చేస్తోన్న ప్రయోగాలతో పోల్చితే చాలా చాలా తక్కువ ఖర్చుతో కూడుకున్నది. అందుబాటులో వున్న వనరుల్ని సద్వినియోగం చేసుకుంటూ, అపారమైన మేధోశక్తిని మేళవించి మనం ప్రయోగాలు చేపడుతున్నాం. అందుకే, అభివృద్ధి చెందిన దేశాలు కూడా భారత అంతరిక్ష ప్రయోగాలపై ప్రత్యేక దృష్టి పెడుతున్నాయి.

ఇప్పటికే పలుమార్లు చంద్రుడి మీదకు వెళ్ళొచ్చినా ‘నాసా’ కూడా చంద్రయాన్‌-2 గురించి ఉత్కంఠగా ఎదురు చూస్తోందంటేనే మన ఇస్రో.. ఆ ఇస్రో చేపడుతున్న ప్రయోగాలకి అంతర్జాతీయ సమాజంలో వున్న క్రేజ్‌ని చెప్పకనే చెబుతున్నాయన్నమాట. కమ్యూనికేషన్‌ శాటిలైట్స్‌ దగ్గర్నుంచి, రక్షణకు ఉపయోగపడే శాటిలైట్స్‌ వరకూ.. చాలానే ప్రయోగాలు చేశాం అంతరిక్ష రంగంలో. ఇప్పుడు చంద్రుడి మీదకు వెళుతున్నాం.

నిజానికి, చంద్రుడిపై ఇది మనకి రెండో ప్రయోగం. మార్స్‌ దగ్గరగా కూడా వెళ్ళాం మనం. ప్రపంచంలోని కొన్ని దేశాలు మాత్రమే ఈ ప్రయోగాలు చేశాయి. మనకన్నా ఎక్కువగా చేశాయి. అయినాసరే, మన ప్రయోగాలు చాలా ప్రత్యేకమైనవి. మరికొద్ది గంటల్లోనే చంద్రుడి మీద తొలిసారిగా మన చంద్రయాన్‌-2 ప్రాజెక్ట్‌లో భాగమైన ల్యాండర్‌ దిగబోతోంది. ఇలా ల్యాండర్‌ని ప్రయోగించడం భారత అంతరిక్ష ప్రయోగాల్లోనే మొట్టమొదటిది. ఇన్ని రోజుల ప్రయాణం ఓ లెక్క.. కేవలం 15 నిమిషాల ప్రయోగం ఇంకో లెక్క. సేఫ్‌ ల్యాండింగ్‌ జరిగితే, అది మన అంతరిక్ష ప్రయోగాల్లో ఓ అద్భుతమే. ఆ అద్భుతాన్ని సాధించి తీరతామని శాస్త్రవేత్తలు చెబుతున్నారు.

అర్థరాత్రి సమయంలో ఈ ల్యాండింగ్‌ చోటుచేసుకోనుంది. ఇందుకోసం దేశమంతా ఉత్కంఠగా ఎదురుచూస్తోంది. దేశమే కాదు, ప్రపంచమంతా ఉత్కంఠగా ఎదురుచూస్తోంది. ‘మేం చంద్రుడి మీద కాలు కూడా మోపేశాం.. మీరు ఇప్పుడు ల్యాండర్‌ పంపుతున్నారు..’ అంటూ ఎగతాళి చేసిన అమెరికన్‌ శాస్త్రవేత్తల్లో కొందరు, ‘చంద్రయాన్‌-2’ సాధిస్తున్న విజయాల్ని చూసి ‘ఇస్రో’కి మాత్రమే కాదు, భారత సమాజానికీ ఇప్పుడు క్షమాపణలు చెబుతున్నారు. భవిష్యత్తు అంతా అంతరిక్షంతోనే అనుసంధానమై వుంది. ఈ నేపథ్యంలో మనం అంతరిక్ష ప్రయోగాల ద్వారా విదేశీ మారక నిల్వల్ని పెంచుకోవచ్చు. అది దేశ ఆర్థిక ప్రగతికి ఎంతో మేలు చేస్తుందన్నది నిర్వివాదాంశం. అభివృద్ధి చెందుతున్న దేశంగా కాదు, అభివృద్ధి చెందిన దేశంగా భారత్‌ మారడానికి ఒక్కో మెట్టూ పైకెక్కుతున్నాం. అందులో ఈ అంతరిక్ష ప్రయోగాలు కూడా ఓ మెట్టుగానే భావించాలి.