బోటులో భంచిక్‌: ఎక్కడో ఏదో తేడా కొడ్తోంది.!

సుమారు 50 మంది ప్రాణాలు గోదాట్లో కలిసిపోయాయి.. మునిగిన బోటు ఇంకా పైకి రాలేదు.. ఆ బోటులోంచి కొంతమంది సురక్షితంగా బయటపడినా.. ప్రాణాలు కోల్పోయినవారి మృతదేహాలు ఇంకా పూర్తి స్థాయిలో బయటకు రాని పరిస్థితి వుంది. ప్రభుత్వం యుద్ధ ప్రాతిపదికన చర్యలు చేపడుతున్నామని చెబుతున్నా.. ఇప్పటిదాకా బోటు మాత్రం నీట్లోంచి బయటకు రాకపోవడంపై సర్వత్రా విమర్శలు వెల్లువెత్తుతున్నాయి. మరోపక్క, మాజీ ఎంపీ హర్షకుమార్‌, బోటు ప్రమాదంపై సంచలన ఆరోపణలు చేశారు.

పర్యాటక శాఖకు చెందిన అధికారుల కారణంగానే జల విహారంలో అక్రమాలు చోటు చేసుకుంటున్నాయన్నది ఆయన ఆరోపణ. పైగా, బోటు బయటకు తీసేందుకు అవకాశం వున్నా, కావాలనే ప్రభుత్వం ఆ ప్రయత్నాలు చేయడంలేదని ఆరోపిస్తున్నారాయన. అక్కడితో ఆగలేదు. బోటులో అసాంఘీక కార్యకలాపాలు జరుగుతున్నాయని హర్షకుమార్‌ సంచలన ఆరోపణలు చేయడం గమనార్హం. నిజానికి, ఇదేమీ కొత్త ఆరోపణ కాదు. చాలా కాలంగా వున్నదే. పర్యాటకం పేరుతో అసాంఘీక కార్యకలాపాలు జరుగుతున్న మాట వాస్తవం. కొన్ని రిసార్టుల విషయంలో ఇది ఎప్పటికప్పుడు నిజమని నిరూపితమవుతూనే వుంది.

పర్యాట శాఖ ఆధ్వర్యంలో నడుస్తున్న బోట్లలోనూ అసాంఘీక కార్యకలాపాలపై ఆరోపణలు వెల్లువెత్తుతూనే వున్నాయి. ఆ విషయాల్నే ఆయనిప్పుడు ప్రస్తావించారు. బోటు యజమానులతో అధికారులు కుమ్మక్కయి, నిబంధనలకు విరుద్ధంగా బోట్లను నడుపుతున్నాన్న హర్షకుమార్‌ ఆరోపణల్ని కొట్టి పారేయలేం. చంద్రబాబు హయాంలో కృష్ణా నదిలో బోటు మునిగినప్పుడు వైసీపీ ఇవే ఆరోపణలు చేసింది. దురదృష్టవశాత్తూ అప్పట్లో వైసీపీ ఎవరి మీద అయితే ఆరోపణలు చేసిందో, ఆ వ్యక్తికి తాము అధికారంలోకి రాగానే మళ్ళీ కీలక బాధ్యతలు అప్పగించడం గమనార్హం.

అయితే, ఇప్పుడు గోదావరిలో బోటు మునక వ్యవహారంలో అసాంఘీక కార్యకలాపాలకు ఆస్కారం వుందా.? అసలు ఈ ఘటనకు బాధ్యులెవరన్నదానిపై వైసీపీ సీరియస్‌గా స్పందించడంలేదు. తూతూ మంత్రంగా కమిటీలు ఏర్పాటు చేసినా, ప్రభుత్వంపై క్రిమినల్‌ కేసులు పెట్టాలని గతంలో వాదించిన వైఎస్‌ జగన్‌, ఇప్పుడు ముఖ్యమంత్రిగా ఆ విషయమై మౌనం దాల్చుతుండడం గమనార్హం. ఇదిలా వుంటే, మంత్రి అవంతి శ్రీనివాస్‌, హర్షకుమార్‌ ఆరోపణలపై మండిపడ్డారు. పరువు నష్టం దావా వేస్తానని హెచ్చరిస్తున్నారు కూడా.