బులుగు ప్రచారం: కాలు వెళ్ళి, రాయికి తగిలిందంతే.!

కోడి కత్తి దగ్గరకు వైఎస్ జగన్ వెళ్ళారా.? కోడి కత్తి తీసుకుని ఓ వ్యక్తి వైఎస్ జగన్ మోహన్ రెడ్డి మీద దాడి చేశారా.? గుండె పోటు వచ్చి, లేని గొడ్డలి మీద పడి అత్యంత కిరాతకమైన స్థితిలో వైఎస్ వివేకానందరెడ్డి చనిపోయారా.? లేదంటే, గొడ్డలితో ఆయన్ని ఎవరన్నా చంపారా.? చంద్రబాబు ఎన్నికల ప్రచారంలో రాయి కోసం వెతుక్కుంటూ వెళ్ళి టీడీపీ కార్యకర్త తన కాలికి గాయం చేసుకున్నారా.? లేదంటే, దుండగులు విసిరిన రాయి చంద్రబాబు ప్రచారంపైకి దూసుకొచ్చిందా.? రాష్ట్రంలో రాజకీయాలు ఎంత దిగజారిపోయాయో చెప్పడానికి ఇంతకంటే నిదర్శనం ఇంకేం కావాలి.?

ప్రతిపక్ష నేత మీద దాడి యత్నం జరిగిందంటే ముమ్మాటికీ నైతిక బాధ్యత వహించాల్సింది ప్రభుత్వంలో వున్నవారే. వైఎస్ జగన్ మీద జరిగిన హత్యాయత్నం, చంద్రబాబు మీద జరిగిన రాళ్ళ దాడి యత్నం.. రెండూ ఒకటే. అప్పుడు చంద్రబాబు వైఫల్యం, ఇప్పుడు వైఎస్ జగన్ వైఫల్యం. నిజానికి, ప్రతిపక్ష నేత కాన్వాయ్ మీద దాడి యత్నం జరిగిందంటే, వెంటనే ముఖ్యమంత్రి స్పందించాలి. డీజీపీ పరిస్థితిని సమీక్షించాలి. కానీ, అధికార పార్టీ నేతలు, ‘చంద్రబాబు ఆడుతున్న డ్రామా’ అంటున్నారు. అంటారు మరి.. ఎందుకంటే, గతంలో ఇలాంటి డ్రామాలు ఆడి కదా.. అధికారంలోకి వైసీపీ వచ్చింది.. అన్నది ప్రతిపక్షం తెలుగుదేశం పార్టీ ఆరోపణ.

తిరుపతి విమానాశ్రయంలో చంద్రబాబు డ్రామా ఆడారట. మరి, విశాఖ విమానాశ్రయంలో వైఎస్ జగన్ బైఠాయింపుని ఏమనాలి.? అసాంఘీక శక్తులు రెచ్చిపోతోంటే, రాజకీయ పార్టీలు వాటిని తమకు అనుకూలంగా మార్చేసుకుంటుండడం, ఆ దుశ్చర్యల్ని వెనకేసుకొస్తుండడంతో.. రాజకీయం, పరిపాలన, ప్రభుత్వం, వ్యవస్థలంటే ప్రజల్లో అసహ్యం పెరుగుతోంది. గోడక్కొట్టిన బంతిలా తాము చేసిన పాపాలు తిరిగి తమనే చాచికొట్టేస్తున్న దరిమిలా, ఇప్పుడు అధికారంలో వున్నవారు అప్రమత్తంగా వుండకపోతే.. ఈ గౌరవాలన్నీ భవిష్యత్తులో ఎదుర్కొని గగ్గోలు పెట్టాల్సిందే.