బిగ్ బాస్ రియాల్టీ షో మూడో సీజన్కి హోస్ట్గా వ్యవహరిస్తోన్న కింగ్ అక్కినేని నాగార్జునకి తొలి పరీక్ష కాస్సేపట్లో ఎదురుకాబోతోంది. సీజన్ ప్రారంభోత్సవంలో నాగార్జున తనదైన స్టయిల్లో అదరగొట్టేసిన మాట వాస్తవం. కంటెస్టెంట్స్ని హౌస్లోకి పంపించే క్రమంలో నాగ్ జోష్ అందరికీ నచ్చింది. కంటెస్టెంట్స్తోపాటు ఆడి, పాడి అలరించాడు నాగార్జున. కానీ, వీకెండ్ ఎపిసోడ్స్లోనే అసలు సిసలు పరీక్షను ఎదుర్కోవాల్సి వుంటుంది నాగార్జున.
మొదటి రెండు సీజన్లతో పోల్చితే, ఈసారి బిగ్ హౌస్లో కంటెస్టెంట్స్ చాలా స్ట్రాంగ్గా కనిపిస్తున్నారు. రెండు సీజన్స్ ఆల్రెడీ చూసిన అనుభవం వుండడంతో, సెలబ్రిటీ స్టేటస్ తక్కువ వున్నవాళ్ళు కూడా, తమదైన ప్రత్యేకతను చాటుకునేందుకు ప్రయత్నిస్తున్నారు మూడో సీజన్లో. ఎవరూ తక్కువ కాదు.. అనే స్థాయిలో కంటెస్టెంట్స్ ఎవరికి వారు తమదైన వ్యూహాలతో ముందుకెళుతున్నారు. ఈ వారం ఎలిమినేషన్ ద్వారా ఎవరి వికెట్ పడుతుందోగానీ, రెండు రోజులపాటు వీకెండ్ షోస్లో అక్కినేని నాగార్జున, కంటెస్టెంట్ల సాదక బాధకాల్ని వినాల్సి వుంటుంది. వారికి కొన్ని సలహాలు ఇవ్వాలి, కొన్ని హెచ్చరికలూ చేయాలి.
ఈ విషయంలో రెండో సీజన్ హోస్ట్ నానితో పోల్చితే, మొదటి షోకి హోస్ట్ అయిన యంగ్ టైగర్ ఎన్టీఆర్కే ఎక్కువ మార్కులు పడతాయి. మరి, నాగార్జున పరిస్థితి ఏంటి.? మీలో ఎవరు కోటీశ్వరుడు షో ద్వారా, బుల్లితెర అనుభవం బాగానే సంపాదించినా, బిగ్బాస్ అనేది ఓ డిఫరెంట్ బాల్ గేమ్. 15 మంది కంటెస్టెంట్లు.. ఆయా కంటెస్టెంట్లకు విడివిడిగా సోషల్ మీడియాలో ఆర్మీలు.. వీటన్నిటినీ తట్టుకోవడమంటే నాగార్జునకి కత్తి మీద సాము అని చెప్పక తప్పదు.
సోషల్ మీడియాలో ఆల్రెడీ నాగార్జునకి వ్యతిరేకంగా ట్రోలింగ్ జరగడాన్ని చూశాం. అదీ ఫస్ట్ ఎపిసోడ్.. అందునా ఓపెనింగ్ సెర్మానీకే అంతటి ట్రాలింగ్ జరిగింది. మరి, హౌస్లో కంటెస్టెంట్స్ని వార్న్ చేసినా, సలహాలు ఇచ్చినా.. ఆ తర్వాత సీన్ మారిపోతుంది. అన్నట్టు, హౌస్లో గొడవలపై నాగార్జునతోనే తేల్చుకుంటానని సీనియర్ నటి హేమ ఇప్పటికే ప్రకటించిన విషయం విదితమే. ‘నాగార్జునగారి స్థాయి ఏంటి.? మన పత్తి యవ్వారం స్థాయి ఏంటి.?’ అని మహేష్ విట్టా సెటైర్ కూడా వేసేశాడనుకోండి.. అది వేరే సంగతి. బిగ్బాస్ రియాల్టీ షో సంగతి పక్కన పెడితే, నాగ్ హీరోగా తెరకెక్కిన ‘మన్మథుడు-2’పై ప్రీ రిలీజ్ బజ్ సూపర్బ్గా వుంది. ఆగస్ట్ 9న ఈ సినిమా ప్రేక్షకుల ముందుకు రానున్న విషయం విదితమే.