ఆకలికీ, సాయానికీ మతం లేదు.!

తరాలు తిన్నా తరగని ఆస్తి పాస్తులు సంపాదించడమే లక్ష్యంగా పెట్టుకుంటారు కొందరు. ఎంత సంపాదించినా అవి తమ జీవితాలకే సరిపోదనుకునే వారు ఇంకొందరు. ఉన్నంతలో పది మందికీ సాయం చేయాలనుకునేవారు మరికొందరు. కులం, మతం, ప్రాంతం ఇలాంటి లెక్కలేసుకుని సాయాలు చేసే వారినీ చూస్తుంటాం. పావలా సాయం చేసి, పది రూపాయల పబ్లిసిటీ పొందాలనుకునే వారి సంఖ్య తక్కువేమీ కాదు. సాటి మనిషికి సాయం చేయడం మానవత్వం మాత్రమే కాదు, దైవత్వం కూడా.. అని భావించేవారూ లేకపోలేదు. అలాంటి ఓ గొప్ప వ్యక్తి కథ ఇది.

‘అజార్‌ మక్సుసి’ అనే ఓ వ్యక్తి హైద్రాబాద్‌లోని గాంధీ ఆసుపత్రి వద్ద ప్రతీ రోజూ పేదల కోసం ఆహారాన్ని ఉచితంగా అందిస్తుంటారు. తాను చేసేది సాయం కాదనీ, మానవత్వమే తనతో ఈ పని చేయిస్తోందనీ, ఆకలికీ, సాయానికీ మతంతో పని లేదనీ చెప్తాడాయన. చిన్నప్పుడు తిండికి లేక, ఎన్నో కష్టాలు అనుభవించాననీ, తను నాలుగేళ్ల వయసులో ఉన్నప్పుడే తండ్రిని కోల్పోయాననీ, అజార్‌ మక్సుసి చెప్పారు. ఆకలితో పస్తులున్న ఎన్నో రోజులు తన కళ్ల ముందు ఇంకా కదలాడుతున్నాయనీ, తాను పని చేయడం ప్రారంభించాక, సంపాదించే ఆ కొద్ది మొత్తంలో కొంత ఇతరులకు సాయం చేసేందుకు వ్యత్యించాలనుకున్నాననీ అన్నారాయన.

ఆనాటి ఆ ఆలోచన ఆ తర్వాత ఓ మహిళకు ఆహారం అందించడం ద్వారా కార్యరూపం దాల్చిందనీ, తొలి సారిగా ఆ సాయం చేసిన తర్వాత చాలా తృప్తిగా అనిపించిందనీ, అప్పుడే దేవున్ని ప్రార్ధించి పది మందికి సాయం చేసే శక్తినివ్వాలని కోరుకున్నాననీ అన్నారు మక్సుసి. అప్పుడు మొదలైన ఆ ప్రయాణం ఇప్పటికీ కొనసాగుతూనే ఉందని చెప్పారు. డబీర్‌ పురాలో ఈ ఆహారం పంపిణీ కార్యక్రమాన్ని మొదలుపెట్టి, దాన్ని గాంధీ ఆసుపత్రికి విస్తరించారు. రోజూ సుమారు 400 మందికి ఆహారమందిస్తున్నారు.

నాలుగేళ్లుగా గాంధీ ఆసుపత్రి దగ్గరా, ఏడేళ్లుగా డబీర్‌ పురాలో అందిస్తున్న ఈ ఆహార పంపిణీ క్రమ క్రమంగా ఇతర ప్రాంతాలకు విస్తరించారు మక్సుసి. బెంగుళూరు, రాయచూర్‌, జార్ఖండ్‌, అస్సాం తదితర ప్రాంతాల్లో 1000 నుండి 1200 మంది వరకూ ఈ ఉచిత ఆహారంతో కడుపు నింపుతున్నారు. జగదీష్‌ అనే ఓ కార్మికుడు ఈ ఆహార పంపిణీ గురించి మాట్లాడుతూ, ఏడాదిగా తనకు హైద్రాబాద్‌లో ఉచితంగా ఆహారం దొరుకుతోందనీ, పని లేనప్పుడు మాత్రమే తాను ఉచితంగా అందించే ఈ భోజనం కోసం వస్తుంటాననీ చెప్పారు.

ఎందరో పేదలు, తమ కడుపు నింపుతోన్న అజార్‌ మక్సుసికి కృతజ్ఞతలు చెబుతున్నారు. దేవుడు మనిషి రూపంలో రావడమంటే ఇదేననీ సాయం పొందుతోన్న పేదలు చెబుతోంటే, అజార్‌ మాత్రం దేవుడే తన ద్వారా పేదల కడుపు నింపుతున్నాడనీ, తాను నిమిత్త మాత్రుడననీ మనిషిగా తాను చేయగలిగినది చేస్తున్నాననీ, దీన్ని గొప్ప పనిగా భావించడం లేదనీ, బాధ్యతగా మాత్రమే భావిస్తున్నాననీ అంటున్నారు. రియల్‌ హీరో అంటే అజార్‌ మక్సుసి అని నిస్సందేహంగా చెప్పొచ్చు. అన్నదాతా సుఖీభవా.!