ఎడారిలా అమరావతి: జగన్‌ మెప్పుకోసమా స్పీకర్‌గారూ.!

అసెంబ్లీ స్పీకర్‌ అయినా.. ఆయన కూడా వైఎస్సార్సీపీ నాయకుడే కదా.! అందుకే, అధినేత మెప్పు కోసం తన స్థాయిని దిగజార్చేసుకున్నారు ఆంధ్రప్రదేశ్‌ అసెంబ్లీ స్పీకర్‌ తమ్మినేని సీతారాం. స్పీకర్‌ పదవిలో ఆయన ఎన్నేళ్ళు కొనసాగుతారు.? అన్నది వేరే చర్చ. ఉమ్మడి ఆంధ్రప్రదేశ్‌లో ఆయన మంత్రిగా పనిచేశారు. సుదీర్ఘ రాజకీయ అనుభవం ఆయన సొంతం. కానీ, ఏం లాభం.? తన స్థాయిని అత్యంత దారుణంగా ఆయన దిగజార్చేసుకున్న వైనం ఇప్పుడు నవ్వుల పాలైపోతోంది.

అమరావతిని ఆయన ఎడారితో పోల్చారు. అసెంబ్లీ సమావేశాల కోసం వెళుతోంటే ఎడారిలో వెళుతున్నట్లుందని తమ్మినేని సీతారాం సెలవిచ్చారు. అసలే అమరావతిలో రైతులు తీవ్ర ఆందోళనతో వున్నారు. అసెంబ్లీలో జగన్‌ మూడు రాజధానుల ప్రకటన చేసిన దగ్గర్నుంచి, అమరావతిలో ఆందోళనలు తీవ్రరూపం దాల్చిన విషయం విదితమే. చిన్న పిల్లలు, ముసలివాళ్ళు సైతం రోడ్డెక్కి రోదిస్తున్నారు. ఒక మంత్రిగారేమో అమరావతిని స్మశానం అంటారు.. స్పీకర్‌గారే అమరావతిని ఎడారితో పోల్చుతారు.. అసలు తాము రాష్ట్ర పౌరులమా.? అన్న ఆవేదన వారిలో మరింత పెరిగిపోతోంది.

‘మా పట్ల ఎందుకింత చిన్న చూపు.? మేం ఏం పాపం చేశాం.? రాష్ట్ర అభివృద్ధి కోసం.. రాజధాని అమరావతి కడతామంటే, స్వచ్ఛందంగా భూములు ఇవ్వడమే మేం చేసిన నేరమా.?’ అంటూ కన్నీరు మున్నీరవుతున్నారు రైతులు. ప్రభుత్వ ఆలోచన చాలా చాలా గొప్పదేనని అధికార పార్టీ భావించొచ్చుగాక. కానీ, అమరావతి రైతుల్ని ఇంత తీవ్రస్థాయిలో మానసిక క్షోభకు గురిచేయడం అత్యంత దారుణమైన విషయం.

ఒక్క మాటలో చెప్పాలంటే, అమరావతి మీద కాదు.. అమరావతి కోసం భూములిచ్చిన రైతుల మీద ప్రభుత్వంలో వున్నవారు కక్ష పూరితమైన వైఖరి ప్రదర్శిస్తున్నట్లే కన్పిస్తోంది. ”అమరావతి ఎడారి అయితే, అక్కడి ప్రజలెలా బతుకుతున్నారు.? పేరు తాత్కాలికమే అయినా, సకల సౌకర్యాలతో ఏసీ గదుల్లో అసెంబ్లీ సమావేశాలు నిర్వహించుకున్నారు కదా.? ఇలా మాట్లాడేందుకు అధికార పార్టీ నేతలకు సిగ్గనిపించడంలేదా.?” అని ప్రశ్నిస్తున్న రైతులకు ప్రభుత్వం తరఫున ముఖ్యమంత్రి ఏం సమాధానం చెప్పగలరు.?