ఏపీలో కొత్త పల్లవి.. విశాఖ వద్దు.. తిరుపతి ముద్దు..

ఏపీలో రాజకీయాలు చిన్నపిల్లలు ఆడుకునే ఆటవస్తువులుగా మారిపోయింది. ఎవరికి ఏది నచ్చితే దానితో ఆడుకుంటున్నారు. ఎవరికి నచ్చినట్టుగా వాళ్ళు మాట్లాడుతున్నారు. రాజధానుల విషయంలో ఎవరి నచ్చింది వాళ్ళు చేసుకుంటున్నారు. ప్రజల అభిప్రాయాలు తెలుసుకోవడంగాని, ప్రజల గురించి ఆలోచించడంగాని చేయడం లేదు. దీంతో ప్రజలు చాలా ఇబ్బందులు పడుతున్న మాట వాస్తవం.

గత ప్రభుత్వం అమరావతిని రాజధానిగా ప్రకటించి అభివృద్ధి చేయాలని చూసింది. కొంతమేర నిర్మాణాలు ఏర్పాటు జరిగాయి. అంతలోనే ఎన్నికలు రావడం ఎన్నికల్లో వైకాపాకు ప్రజలు మద్దతు ఇవ్వడంతో అధికారం చేతులు మారింది. ఇంకేముంది. అధికారం చేతులు మారడంతో వైకాపా మొదటి ఆరు నెలలు సైలెంట్ గా ఉంది. రాజధాని విషయం కమిటీ వేసి నివేదిక కోరింది. ఆ కమిటీ ఎవరెవరిని కలిసిందో ఏంటో తెలియదుగాని మూడు రాజధానులవైపు మొగ్గు చూపింది.

ఇది ఇబ్బంది కలిగించే అంశం అని చెప్పొచ్చు. ఎందుకంటే మూడు రాజధానులు అంటే అనుకున్నంత ఈజీ కాదు. మూడు రాజధానులను అభివృద్ధి చేయాలి అంటే తడిసి మోపెడు అవుతుంది. అమరావతిని నామమాత్రపు రాజధానిగా చేసి… కర్నూలుకు ఇవ్వాలి కాబట్టి హైకోర్టు ఇచ్చి… కార్యనిర్వాహక రాజధానిగా విశాఖను ఏర్పాటు చేసుకుంటున్నారు. అంటే ఇప్పుడు దృష్టి విశాఖపై పడింది.

అమరావతి ముంపు ప్రాంతం అంటున్నారు. అలాంటప్పుడు విశాఖ కూడా ఎంతవరకు సేఫ్ అన్నది చూడాలి. ఎందుకంటే విశాఖలోనే సముద్రం ఉన్నది. గతంలో హుద్ హుద్ తుఫాన్ వచ్చినపుడు ఎన్ని ఇబ్బందులు ఎదుర్కొన్నదో తెలిసిందే. ఏడాదికి ఒకేసారి అలాంటి తుఫాను వస్తే పరిస్థితి ఏంటి… రాజధాని తట్టుకొని నిలబడుతుందా? అందుకే ఇప్పుడు మరోపేరు తెరమీదకు తీసుకొస్తున్నారు.

విశాఖ కంటే కూడా తిరుపతి అయితే బాగుంటుందని ఇప్పటికే తిరుపతి అభివృద్ధి చెందిన ప్రాంతం కాబట్టి ఎలాంటి ఇబ్బందులు ఉండవని అంటున్నారు. పరిశ్రమల ఏర్పాటుకు కూడా అనువైన ప్రాంతంగా ఉంటుంది. అలానే రేణిగుంట విమానాశ్రయాన్ని ఇటీవలే అంతర్జాతీయ విమానాశ్రయంగా మార్చారు. విశాఖ కంటే తిరుపతిని రాజధానిగా చేస్తేనే బాగుంటుందని కొంతమంది నేతల అభిప్రాయం. మొత్తానికి రాజధాని వ్యవహారం కుర్చీలాటగా మారింది. ఈ కుర్చీలాటలో చివరకు ఏం జరుగుతుందో తెలియాలంటే కొన్ని రోజులు ఆగాల్సిందే.