‘పెద్దా’యన లొల్లి: అనుష్క బౌలింగ్‌.. విరాట్‌ కోహ్లీ బ్యాటింగ్‌.!

‘అనుష్క శర్మ బౌలింగ్‌ చేసిందట.. విరాట్‌ కోహ్లీ బ్యాటింగ్‌ చేశాడట.. ఈ ప్రాక్టీస్‌ ఇంకోలా వర్కవుట్‌ అవుతుందేమోగానీ, మైదానంలో వర్కవుట్‌ అవదు..’ అంటూ మాజీ క్రికెటర్‌, పెద్దాయన సునీల్‌ గవాస్కర్‌ ‘కామెంటరీ’ నేపథ్యంలో చేసిన వ్యాఖ్యలు పెను దుమారంగా మారాయి. లాక్‌డౌన్‌ సమయంలో సరదాగా ఇంట్లో విరాట్‌ కోహ్లీ, తన భార్య అనుష్క శర్మ బౌలింగ్‌లో బ్యాటింగ్‌ చేశాడు. ఆ వీడియో కాస్తా అప్పట్లో వైరల్‌గా మారింది.

ఆ విషయాన్ని, ఐపీఎల్‌ క్రికెట్‌ సందర్భంగా ‘విరాట్‌ కోహ్లీ ఫామ్ లో లేకపోవడం’ గురించి ప్రస్తావిస్తూ సునీల్‌ గవాస్కర్‌ వెటకారం చేసిన విషయం విదితమే. ఈ విషయమై అనుష్క శర్మ చాలా సీరియస్‌గా స్పందించింది. ‘నా వ్యక్తిగత జీవితం గురించి మాట్లాడటానికి మీరెవరు.?’ అంటూ ఘాటుగానే మండిపింది. ‘మీ నుంచి ఇలాంటి దిగజారుడు వ్యాఖ్యలు నేను ఊహించలేదు’ అని ఆమె అన్నారు. అయినా, పెద్దాయన గవాస్కర్‌కి ఇదేం బుద్ధి.? ఈ డబుల్‌ మీనింగ్‌ డైలాగులతో ఆయన సాధించిందేంటి.? అయితే, గవాస్కర్‌ వ్యాఖ్యల్ని కొందరు వక్రీకరించారంటూ గవాస్కర్‌కి మద్దతుగానూ కొందరు మాట్లాడుతున్నారు.

ఈ లిస్ట్‌లో తాజాగా టీమిండియా మాజీ క్రికెటర్‌ ఇర్ఫాన్‌ పఠాన్‌ కూడా వున్నాడు. ‘ఏదో పెద్దాయన అలా మాట్లాడేశారు. పైగా, తన వ్యాఖ్యల పట్ల ఆయన వివరణ కూడా ఇచ్చుకున్నారు. ఆయన వయసుని చూసి కనికరించండి..’ అంటూ అనుష్కకి విజ్ఞప్తి చేశాడు ఇర్ఫాన్‌ పఠాన్‌ సోషల్‌ మీడియా వేదికగా. ప్రస్తుతం అనుష్క శర్మ గర్భవతి. ఇటీవలే ఈ విషయాన్ని విరాట్‌ కోహ్లీ సోషల్‌ మీడియా వేదిగా వెల్లడించాడు కూడా. దాంతో, ‘బ్యాటింగ్‌ – బౌలింగ్‌’ అన్న ప్రస్తావనకు అర్థం మారిపోయింది. ఏదిఏమైనా, గవాస్కర్‌ది అసందర్భ ప్రేలాపనే. ఇందులో ఇంకో మాటకు తావు లేదు.