జస్ట్ ఆస్కింగ్: రధం అలా తగలబడిపోయిందా అధ్యక్షా.?

గుండెపోటుతో చనిపోతే, తల మీద అత్యంత కిరాతకంగా గొడ్డలితో దాడి చేసిన ఆనవాళ్ళు ఎందుకు కనిపించినట్లు.? వాటికి ఎందుకు కట్లు కట్టినట్లు.? వైఎస్‌ వివేకానందరెడ్డి హత్య కేసులో మొదటి నుంచీ వెల్లువెత్తుతున్న అనుమానాలు ఇవే. ప్రత్యక్ష సాక్షులే ‘గుండెపోటు’గా చిత్రీకరించిన ఈ ఘటన అప్పట్లో పెను సంచలనం. ఆ కేసు ఇప్పటికీ తేలలేదు. సీబీఐ విచారణ జరుగుతున్నా, వాస్తవాలు వెలుగు చూస్తాయన్న నమ్మకాల్లేవన్న చర్చ సర్వత్రా జరుగుతోంది. తుని రైలు దహనం కేసు కూడా ఇంతే. అంతెందుకు, సాక్షాత్తూ వైఎస్‌ జగన్‌ మోహన్‌ రెడ్డి మీద ‘కోడి కత్తి’తో దాడి జరిగితే.. ఆ కేసు ఇప్పటికీ ఓ కొలిక్కి రాలేదు. అనుమానాలు అలాగే వున్నాయి.

ఈ కేసుల్లో ‘కారణాలు’ చాలా కామెడీగా కన్పిస్తాయి. విచారణ సంస్థలు తేల్చే నిజాల సంగతి దేవుడెరుగు, మీడియాలో వచ్చే కథనాలు మాత్రం నవ్వాలో ఏడవాలో తెలియని పరిస్థితిని కలగజేస్తాయి జనానికి. ఇప్పుడు అంతర్వేది రధం దహనం కేసులోనూ ఇదే పరిస్థితి. ‘అన్ని కోణాల్లోనూ విచారణ జరుపుతున్నాం..’ అని పోలీస్‌ బాస్‌ స్వయంగా వెల్లడించారు. కానీ, ఈలోగా మీడియాలో కొన్ని చిత్ర విచిత్రమైన కథనాలొస్తున్నాయి. ఆ రధాన్ని నిలిపిన చోట, ఓ తేనె తుట్టె వుందట.. అందులోంచి తేనెను కొల్లగొట్టడానికి ఎవరో మంటపెట్టారట. అది కాస్తా ఆ రధాన్ని కవర్‌ చేసే తాటాకులకు అంటుకుందట. అలా ఆ రధం దహనమయిపోయిందట. ఒకటో తరగతి పిల్లాడికి ఈ కథ చెప్పినా ఫక్కున నవ్వేస్తాడు. జరిగిన ఘటన అత్యంత దురదృష్టకరం.

‘ఓ పద్ధతి ప్రకారం హిందూ దేవాలయాలపై దాడి జరుగుతోంది..’ అని కొందరు హిందుత్వ వాదులు విమర్శిస్తున్న దరిమిలా, ఈ ‘తేనె తుట్టె’ కథనం తెరపైకి రావడమేంటి.? నవ్విపోదురుగాక మనకేటి.? అన్నట్టుంది వ్యవహారం. ‘పోలీసులు తమ విచారణ తాము చేస్తారు.. చట్టం తన పని తాను చేసుకుపోతుంది..’ లాంటి పరమ రొటీన్‌ డైలాగులు పైన పేర్కొన్న చాలా కేసుల్లో చూశాం. కానీ, ఆయా కేసుల్లో ఇప్పటికీ వాస్తవాలు వెలుగు చూడలేదు. ఇక, తేనె తుట్టె – రధం దగ్ధం కేసు కూడా అలానే తయరవుతుందేమోనన్న ఆందోళన మాత్రం హిందుత్వ వాదుల్లో వ్యక్తమవుతోంది.