కేసీఆర్ నయా భారత్.. నిజమేనా?

‘తెలంగాణను మంచిగా చేశా.. ఇక దేశం మీద దృష్టి సారిస్తా’ – ఇదీ గతంలో పలు సందర్భాల్లో టీఆర్ఎస్ అధినేత కేసీఆర్ చేసిన వ్యాఖ్యల సారాంశం. దశాబ్దాలుగా ఉన్న ప్రత్యేక రాష్ట్ర ఆకాంక్షను సాధించి ముఖ్యమంత్రి పీఠం అధిరోహించిన కేసీఆర్ చూపు తాజాగా జాతీయ రాజకీయాల వైపు మళ్లిందని.. త్వరలోనే ఆయన హస్తినలో జెండా పాతడం ఖాయమంటూ కథనాలు ఊపందుకున్నాయి. నిజానికి దేశ రాజకీయాల్లో చక్రం తిప్పాలని కేసీఆర్ ఇప్పుడు అనుకోలేదు. గతంలోనే ఇందుకు ఆయన చాలా ప్రయత్నాలు చేశారు. అసెంబ్లీ, పార్లమెంటు ఎన్నికలు ఒకేసారి వస్తే ఇబ్బంది అవుతుందని భావించి తెలివిగా అసెంబ్లీకి ముందస్తు ఎన్నికలకు వెళ్లి విజయం సాధించారు.

లోక్ సభ ఎన్నికల్లో పూర్తిగా దాని పైనే దృష్టి పెట్టి మొత్తం సీట్లను క్లీన్ స్వీప్ చేయడం ద్వారా దేశ రాజకీయాలను శాసించాలని భావించారు. కారు, సారు, పదహారు.. ఢిల్లీలో సర్కారు నినాదంతో ఎన్నికలకు వెళ్లారు. కానీ 17 సీట్లలో తొమ్మిది మాత్రమే గెలుచుకున్నా. ఇక జాతీయ స్థాయిలో తిరుగులేని మెజార్టీతో మరోసారి మోదీయే అధికారంలోకి రావడంతో కేసీఆర్ సైలెంటయ్యారు. వాస్తవానికి అనుకున్న సీట్లు వచ్చి.. హస్తిన రాజకీయాలను నియంత్రించే పరిస్థితిలో కేసీఆర్ ఉండి ఉంటే, రాష్ట్రంలో కేటీఆర్ ను పట్టాభిషిక్తుడిని చేసి ఆయన ఢిల్లీ బాట పట్టేవారు. కానీ అంచనాలన్నీ తలకిందులు కావడంతో కేటీఆర్ కు సీఎం పగ్గాలు ఇవ్వడాన్ని వాయిదా వేశారు. తాజాగా మరోసారి కేసీఆర్ హస్తిన రాజకీయాలపై పత్రికల్లో కథనాలు వస్తున్నాయి.

కొత్త సచివాలయ నిర్మాణం పూర్తయిన తర్వాత కేటీఆర్ ను సీఎం చేసి, తాను జాతీయ రాజకీయాల్లో క్రియాశీలం కావాలని గులాబీ బాస్ యోచిస్తున్నారని సమాచారం. దీనికి సంబంధించి ఇటీవల ఆంధ్రప్రభలో వచ్చిన కథనాన్నే తాజాగా ఆంధ్రజ్యోతి వండి వార్చింది. ఆ పత్రికలు కావాలనే రాశాయా లేక గులాబీ పెద్దలే ఫీలర్ వదిలి రాయించారా అనే విషయాన్ని పక్కన పెడితే.. అసలు ఇది ఎంతవరకు వర్కవుట్ అవుతుందన్నది ప్రస్తుతం చర్చ జరుగుతోంది. ఫ్రంట్ తరహాలో కాకుండా కాంగ్రెస్, బీజేపీలకు ప్రత్యామ్నాయంగా పలు ప్రాంతీయ పార్టీలను కలిపి నయా భారత్ అనే మూడో పార్టీ ఏర్పాటు చేయాలన్నది కేసీఆర్ వ్యూహమని అంటున్నారు. సంకీర్ణ సర్కారు అంటే బోలెడు తలనొప్పులు ఉంటాయని.. అలా కాకుండా పార్టీ అయితే ప్రాబ్లం ఉండదన్నది దీని వెనుక భావనగా చెబుతున్నారు. అయితే, ఇది ఎంతవరకు వర్కవుట్ అవుతుందనేది ప్రశ్నార్థకంగా మారింది.

మమత, హేమంత్ సోరెన్ వంటి వారితో కలిసి ఈ పార్టీ ఏర్పాటు చేయాలనేది గులాబీ దళపతి ఆలోచన అని కథనాలు వస్తున్నాయి. అయితే, అతుకుల బొంతలా ఉండే సంకీర్ణ సర్కారే పూర్తికాలం మనగలగడం అసాధ్యం. అలాంటిది వివిధ పార్టీలు కలిసి పెట్టే కొత్త పార్టీ ఎంతవరకు సక్సెస్ అవుతుందనే అంశంపై భిన్నాభిప్రాయాలు వ్యక్తమవుతున్నాయి. అందరూ ఏకతాటిపై నడుస్తారా? లుకలుకలు, ఆధిపత్య పోరు లేకుండా ఓ నాయకుడి కింద పని చేయడానికి ఆయా పార్టీలు ఎంతవరకు అంగీకరిస్తాయి అనేది ఇప్పుడే చెప్పలేం. కేసీఆర్ పార్టీ పెట్టడం ఖాయమైన పక్షంలో దాని విధివిధానాలు చూసిన తర్వాతే అంచనాకు రాగలం. నిజానికి తెలంగాణలోనే బోలెడు సమస్యలున్నాయి. మీడియా అండ, అధికార బలంతో టీఆర్ఎస్ నెట్టుకొస్తుంది గానీ, తరచి చూస్తే పలు సమస్యలు కనిపిస్తాయి. ఈ నేపథ్యంలో కేసీఆర్ నాయకత్వాన్ని దేశవ్యాప్తంగా ఎంతమంది స్వాగతిస్తారనే సందేహం తలెత్తక మానదు.