ఆంధ్రప్రదేశ్ మహిళా కమిషన్.. అర్థం మార్చేసిన వైసీపీ.!

ఆంధ్రప్రదేశ్ మహిళా కమిషన్ ఛైర్ పర్సన్ వాసిరెడ్డి పద్మ.! ఈ సంగతి ఇప్పుడే చాలామందికి తెలిసి వస్తోంది. ‘క్యాబినెట్ ర్యాంక్’ వుందట ఆ పదవికి.! ఆ విషయమూ ఇప్పుడిప్పుడే అందరికీ అర్థమవుతోంది. జనసేన అధినేత పవన్ కళ్యాణ్‌కి ఏపీ మహిళా కమిషన్ ఛైర్ పర్సన్ వాసిరెడ్డి పద్మ నోటీసు పంపడం, ఆ నోటీసు సోషల్ మీడియాలో వైరల్ అవడం తెలిసిన విషయాలే.

పవన్ కళ్యాణ్ మూడు పెళ్ళిళ్ళు చేసుకోవడం గురించి నోటీసులు ఇచ్చారా.? ఆ మూడు పెళ్ళిళ్ళ గురించి ఆయన మాట్లాడినందుకు నోటీసులు ఇచ్చారా.? ‘స్టెప్నీలు’ అని పవన్ కళ్యాణ్ వ్యాఖ్యానించడం నేరమన్న కోణంలో నోటీసులు పంపారా.? ఔను, ఆ నోటీసుల్లో అలాగే పేర్కొన్నారు.

వైసీపీ నేతల లిస్టు తీస్తే, అందులో మంత్రుల లిస్టు తీస్తే.. ఎవరెవరి వ్యక్తిగత జీవితాలేంటన్నది ఆయా నియోజకవర్గాల్లోని ప్రజలదిరికీ తెలుసు. ఎమ్మెల్యేలు, ఎమ్మెల్సీలు, మంత్రులు.. ఇలా చెప్పుకుంటూ పోతే బులుగు బాగోతాలు అన్నీ ఇన్నీ కావు.

‘నా భర్తను కొట్టి చంపేశారు..’ అంటూ కాకినాడలో ఓ దళిత మహిళ నెత్తీనోరూ బాదుకుంటే.. చంపింది వైసీపీ ఎమ్మెల్సీ అని తెలిసి.. పోలీసులు ఆయన్ని అరెస్టు చేయడానికి మీన మేషాల్లెక్కడితే.. బాధిత దళిత మహిళకు న్యాయం చేయడానికి మహిళా కమిషన్ ఎందుకు వెళ్ళలేకపోయింది.?

వైసీపీ ఎంపీ గోరంట్ల మాధవ్, ‘మీరు చూసింది ఒరిజినల్ కాదు.. మీ ఇంటికొచ్చి ఒరిజినల్ చూపిస్తా..’ అంటూ మీడియా సాక్షిగా రెచ్చిపోతే, ఆంధ్రప్రదేశ్ మహిళా కమిషన్ ఏం చేసింది.? బూతులు తప్ప మామూలుగా మాట్లాడని మంత్రుల విషయంలో మహిళా కమిషన్ ఏం చేయగలిగింది.?

ఒకటా.? రెండా.? డజన్ల కొద్దీ.. కాదు కాదు.. వందల సంఖ్యలో మహిళలపై దారుణాలు జరిగాయి గడచిన మూడున్నరేళ్ళలో. మరి, ఆంధ్రప్రదేశ్ మహిళా కమిషన్ ఛైర్ పర్సన్ వాసిరెడ్డి పద్మ ఎంతమందికి నోటీసులు పంపగలిగారు.? ఎన్ని కేసుల్లో బాధితులకు న్యాయం చేసేందుకు ప్రయత్నించగలిగారు.?

జనసేన పార్టీ లిస్టు తీస్తోంది.. ‘ఏపీ విమెన్ కమిషన్ ఎక్స్‌పోజ్డ్’ అనే హ్యాష్‌ట్యాగ్‌తో గడచిన మూడున్నరేళ్ళలో ఆంధ్రప్రదేశ్‌లో మహిళలపై జరిగిన అఘాయిత్యాలపై ప్రశ్నల వర్షం కురిపిస్తోంది. ఈ ప్రశ్నలకు వాసిరెడ్డి పద్మ సమాధానం చెబుతారా.? లేదంటే, పోలవరం ప్రాజెక్టు విషయమై ప్రశ్నించిన జనసేనకు మంత్రి అంబటి రాంబాబు ‘పవన్ కళ్యాణ్ నాలుగో పెళ్ళి’తో ముడిపెట్టినట్లే.. మహిళా కమిషన్ కూడా అలాంటి పనికిమాలిన అంశాన్ని తెరపైకి తెస్తుందా.?