‘అ’ అంటే అప్పు.. ‘ఆ’ అంటే ఆంధ్రపదేశ్.!

‘అ’ అంటే అభివృద్ధి.. ‘ఆ’ అంటే ఆంధ్రపదేశ్.. ఇది ఒకప్పటి మాట. కానీ, ఇప్పుడు ‘అ’ అంటే అప్పులు.. ‘ఆ’ అంటే ఆంధ్రపదేశ్. అవును, ఆంధ్రపదేశ్ అనే పేరు కంటే ముందు అప్పుల గురించిన ప్రస్తావన వస్తోంది. అప్పుడు చంద్రబాబు, ఇప్పుడు వైఎస్ జగన్.. రాష్ట్ర భవిష్యత్తు కొత్తగా ఏం మారలేదు. రాష్ట్రాన్ని అప్పులపాలు చేయడం.. అనే ఘనకార్యాన్ని చంద్రబాబు ఘనంగా నిర్వహిస్తే.. అంతకన్నా ఘనంగా వైఎస్ జగన్ అప్పులు చేస్తూ.. రాష్ట్రాన్ని పరుగులు పెట్టిస్తున్నారు.. వెరసి.. రాష్ట్రం అప్పుల ఊబిలో కూరుకుపోయింది. ఇక తేరుకోవడం దాదాపుగా అసాధ్యం.

కేవలం 10 నెలల్లో దాదాపు 74 వేల కోట్లకు పైగా అప్పులు చేసిందట రాష్ట్రం. ‘కాగ్’ వెల్లడించిన విషయాలివి. ఇంకో రెండు నెలల్లో చేయబోయే అఫ్పులెలా వుంటాయ్.? అన్నది ప్రస్తుతానికైతే భయంకరమైన ప్రశ్నే. ఇంతకీ, ఇన్ని అప్పులు చేసేసి.. రాష్ట్రానికి గొప్ప రాజధానినేమైనా ప్రభుత్వం నిర్వహించేస్తోందా.? అంటే అదీ లేదు. రాష్ట్రంలో కొత్తగా నగరాలేమైనా అభివృద్ధి చెందాయా.? అంటే అదీ లేదు. సంక్షేమ పథకాల పేరుతో విచ్చలవిడిగా జనానికి డబ్బులు పంచిపెడుతోంది జగన్ సర్కార్. ఆ డబ్బుల్ని తిరిగి రాబట్టేసుకోవడానికి ఎడాపెడా ‘పన్నులు’ పెంచేసుకుంటూ పోతోంది. ఇదీ రాష్ట్రంలో పాలన.

పొరుగు రాష్ట్రాలతో పోల్చితే, రాష్ట్రంలో మద్యం ధరలు ఎక్కువ, పెట్రో ధరలూ ఎక్కువే. అలా ఆదాయాన్ని పెంచుకుంటూపోతున్న రాష్ట్రం, అప్పుల్ని అంతకు మించి పెంచేస్తోంది. ఇంతకీ, ఈ డబ్బు అంతా ఏమైపోతోంది.? ఇదే ప్రస్తుతం మిలియన్ డాలర్ల ప్రశ్నగా మారిపోయింది. పంచాయితీ ఎన్నికల వేళ 40 లక్షల నుంచి కోటి రూపాయలదాకా ఖర్చు చేసింది అధికార పార్టీ.. అనే విమర్శలున్నాయి. మునిసిపల్ ఎన్నికల వేళ కూడా కోటి రూపాయలదాకా ‘ధర’ పలుకుతోంది అభ్యర్థుల్ని ‘ప్రలోభాలకు గురిచేయడం’ కోసం. ఇక, ఓటర్ల కోసం వెచ్చించే సొమ్ములు.. అది మరో మేటర్. ఇంతలా రాష్ట్రం అభివృద్ధి చెందడం మాత్రం న భూతో న భవిష్యతి.. అనాలేమో.

‘చంద్రబాబు అప్పులు చేసేస్తున్నారహో..’ అంటూ ప్రతిపక్షంలో వున్నప్పుడు విమర్శించిన వైసీపీ, తమ హయాంలో జరుగుతున్న అప్పుల గురించి మాత్రం పెదవి విప్పడంలేదు. ఏ రాయి అయితేనేం పళ్ళూడగొట్టుకోవడానికి.. అని జనం విస్తుపోవాల్సి వస్తోంది చంద్రబాబు, జగన్ పాలనల్ని బేరీజు వేసుకుని.