‘అలీ చేయి సాచలేదట!’

రాజమండ్రిలో పవన్ కళ్యాణ్ తన స్నేహితుడు అలీ పై చేసిన వ్యాఖ్యలకు ప్రతిగా.. అలీ ఒక వీడియో ను రిలీజ్ చేశారు. దానిలో పవన్ మాటలకు అలీ సున్నితంగా కౌంటర్ ఇస్తూ.. చివరిలో తాను ఎన్నడూ, దేనికోసం ఎవరి వద్దా చేయి సాచలేదు అని ముక్తాయింపు కూడా ఇచ్చాడు.

సీటు కోసం, మంత్రి పదవి హామీ ఇస్తేనే ఆ పార్టీ లలో చేరతానని టీవీ9 ఇంటర్వ్యూలో బాహాటంగా మరీ చెప్పి.. తెలుగుదేశం గూటిలో కి చేరటానికి ప్రయత్నం చేశారు . తెదేపా లో గుంటూరు సీటు దాదాపు ఖరారు అయినట్లు వార్తలు కూడా వచ్చాయి. చివరికి చేయిసాచి వెళ్లిన తనకు.. తెదేపా నాయకుల నుంచి ఏ హామీ రాలేదని భంగపడి వెనుకకు వచ్చిన అలీ.. మరల వైసీపీ గూటికి చేరడం అందరికీ తెలిసిన విషయమే.

అడగందే అమ్మాయినా పెట్టదు అనేది నానుడి. సినిమా రంగంలోనూ, రాజకీయాలలోనూ ఎవరూ ఏమీ ఆశించకుండా.. అదే చేయి సాచకుండా… ఏ అవకాశాలు దక్కవు అనేది అందరికీ తెలిసిందే. తాను ఏమీ ఆశించని వాడు అయితే.. ముందు ప్రయత్నం లొనే జనసేనలోకో, తెలుగుదేశంలోకో చేరి సెటిల్ అయ్యేవాడు కదా అని నెటిజన్లు అభిప్రాయపడుతున్నారు.

ఆశించటం తప్పుకాదు.. కానీ ఏమీ ఆశించటంలేదని చెప్పటమే ఆశ్చర్యంగా ఉంది. అందునా తన ఆత్మీయ స్నేహితుడు ఆయిన పవన్ ను ఉద్దేశించి ఈ వ్యాఖ్యలు చేయడం గమనార్హం. ఎకాఎకిన మంత్రి పదవి ఆశిస్తూ.. అదే విషయాన్ని బాహాటంగా టీవీ ఇంటర్వ్యూలో చెప్పుకొని.. తాను ఎప్పుడూ ఏమీ ఆశించలేదని, ఎవరి వద్దా చేయిసాచలేదు అని చెప్పటంతో.. అప్పుడే రాజకీయం వంట బట్టించుకున్నారా అని అనిపించక మానదు. భళా అలీ.