ఇంత నీఛమా.? భార్యా, పిల్లల్ని బదనాం చేసుకుంటావా పోసానీ.?

పవన్ కళ్యాణ్ అభిమానుల పేరుతో ఎవరో పోసాని కృష్ణమురళిని తిట్టారట. సో, పవన్ కళ్యాణ్ స్వయంగా పోసాని కృష్ణమురళి కుటుంబ సభ్యుల్ని దూషించినట్లేనట. అదే నిజమైతే, వైఎస్ జగన్ అభిమానిగా పవన్ కళ్యాణ్ కుటుంబ సభ్యుల మీద పోసాని కృష్ణమురళి దూషణలకు దిగినప్పుడు.. వాటిని వైఎస్ జగన్ మోహన్ రెడ్డికి ఆపాదించవచ్చా.?

అప్పుడు చిరంజీవి, ఇప్పుడు పవన్ కళ్యాణ్. ఏం మారలేదు. అదే రాజకీయం. చిరంజీవి, ప్రజారాజ్యం పార్టీ స్థాపించిన సమయంలో ఎలాగైతే, చిరంజీవి మీద అత్యంత జుగుప్సాకరమైన రీతిలో.. సభ్య సమాజం సిగ్గుతో తలదించుకునేలా దిక్కుమాలిన రాజకీయాలు చేశారో.. ఇప్పుడు పవన్ కళ్యాణ్ జనసేన పార్టీ విషయంలో అంతకు మించిన దిక్కుమాలిన రాజకీయాలు చేస్తున్నారు.

పోసాని కృష్ణమురళి నోరు తెరిస్తే ఛండాలం. అది అందరికీ తెలిసిన విషయమే. ఆ ఛండాలాన్ని ఈ రోజు మీడియా ప్రతినిథులు కూడా భరించలేకపోయారు. ఓ జర్నలిస్టు, పోసాని నోటి ఛండాలాన్ని తట్టుకోలేక ప్రశ్నిస్తే, పోసాని విరుచుకుపడిపోయారు. ఏ భార్య అయినా, ఏ కూతురు అయినా సహించలేని మాటల్ని పోసాని కృష్ణమురళి చాలా గర్వంగా వల్లించేశారు.

అసలు పోసాని కృష్ణమురళి వెనకాల అతన్ని ప్రోత్సహిస్తున్నదెవరు.? ఆయన్ని ఉసిగొల్పుతున్నదెవరు.? ‘మా’ ఎన్నికల రాజకీయమా.? లేదంటే, పవన్ కళ్యాణ్ మీద కుట్ర పన్నుతోన్న బులుగు – పసుపు రాజకీయమా.? చిరంజీవి మీద కాంగ్రెస్, టీడీపీ ఇదే స్థాయి దాడి చేశాయి. అదే కాంబినేషన్.. చిన్న మార్పుతో వైఎస్సార్ కాంగ్రెస్ పార్టీ, టీడీపీ కలిసి పవన్ కళ్యాణ్ మీద దాడి చేస్తున్నాయన్నమాట.

పవన్ కళ్యాణ్ అభిమానులు నన్ను ఏదేదో చేసేస్తామంటున్నారంటూ.. తమ స్క్రిప్టులోని తదుపరి అంశాల గురించి పోసాని బాగానే లీకులిచ్చేశారు. కానీ, పోసాని ఆశించినట్లు.. ఆయన మీద ఎవరూ దాడికి వెళ్ళలేదు. ఎందుకంటే, ‘గ్రామ సింహాన్ని కొట్టినా, పోసాని కృష్ణమురళిని కొట్టినా ఒకటే..’ అన్న భావనతోనే.. అనే అభిప్రాయం పవన్ అభిమానుల నుంచి వ్యక్తమవుతోంది. ‘నేను వైసీపీ కార్యకర్తని..’ అని చెప్పుకుని మరీ పోసాని కృష్ణమురళి, మీడియా సాక్షిగా బూతులు మాట్లాడాడంటే, ఇలా బూతులు మాట్లాడేవాళ్ళని ఎవరు ప్రోత్సహించి పంపుతున్నారన్నది సుస్పష్టం.

దేనికోసం ఇదంతా.? పోసాని కృష్ణమురళి తెలుసుకోవాల్సిందేంటంటే.. ఎవరి కోసం ఆయన ఈ పని చేస్తున్నా.. పోసాని బదనాం చేసుకుంటున్నది తన సొంత కుటుంబాన్ని మాత్రమే. చిరంజీవి మీద ఇలాగే చాలామంది మొరిగారు.. అలా మొరిగినోళ్ళంతా చిరంజీవి ‘అందరివాడు’ అంటున్నారు. ఆ విషయం పోసాని, పోసానిని ఉసిగొల్పినోళ్ళు తెలుసుకుంటే మంచిదేమో.